دوای ئه‌وه‌ی ماوه‌یه‌ك به‌ر له ئێستا قه‌شه‌یه‌كی ئه‌مه‌ریكی به ناوی (تیری جۆنز) قه‌شه‌ی كڵێسای (دۆڤ وۆڵد ئۆتریچ سه‌نته‌ر) ی مه‌عمه‌دانی له (جینیسڤێڵا) ی ولایه‌تی فلۆریدای ئه‌مه‌ریكی، له بڕیارێكی بێ رێزو حورمه‌تدا په‌یمانیدا: له ساڵیادی 11 ی سێپتیمبه‌ردا وه‌ك تۆڵه‌یه‌ك بۆ قوربانیانی رووداوه‌كه، خۆی‌و هاموشۆكه‌رانی كڵێساكه له رۆژی 11/9/2010 قوڕئانی پیرۆز بسوتێنن.
ئه‌م وته‌یه‌ی قه‌شه‌كه بووه مایه‌ی په‌ست كردنی موسڵمان‌و شه‌پۆڵێكی توندی ناڕه‌زایی به‌رپاكرد لای موسڵمانانی هه‌موو جیهان، لای خۆیانه‌وه موسڵمانانی ئه‌مه‌ریكا وێڕای ده‌ربڕینی ناڕه‌زایی گله‌یی ئه‌وه ده‌كه‌ن: كه نابێ رووداوی 11 ی سێپتێمبه‌ر به‌سه‌ر هه‌موو موسڵمان دا بشكێننه‌وه چونكه لای هه‌موان ئاشكرایه سه‌دان موسڵمانیش له ناو كاره‌ساته‌كه بوونه قوربانی‌و پاشان نابێ ئه‌وه‌یش له یاد بكرێ سوتاندنی قوڕئانی پیرۆز له كات‌و رۆژی جه‌ژنی ره‌مه‌زانی پیرۆز، نیشانه‌ی حورمه‌ت نه‌گرتنی تێكڕای موسڵمانانه‌‌و ئه‌مه‌یش واده‌كات پێشهات‌و رووداوی ناخۆش به‌رپا بكات له نێوان كریستیان‌و موسڵمانانی هه‌موو جیهان.
هه‌ر له‌سه‌ر ئه‌م بێ رێزیه‌ی كڵێساكه رۆژی هه‌ینی رابردوو موسڵمانانی ئه‌ندۆنیسیا رژانه سه‌ر شه‌قامه‌كان‌و له به‌رده‌م باڵوێزخانه‌ی ئه‌مه‌ریكا له وڵاته‌كه‌یان به‌ڵێنی كاردانه‌وه‌ی زیاتریاندا گه‌ر بێتو كارێك نه‌كرێت بۆ راگرتنی سوتاندنی قورئانی پیرۆز.
له‌لایه‌ن خۆیانه‌وه موسڵمانانی ئه‌فغانستانیش له رێپێوانێكی فراواندا چه‌ندین دروشمی دژ به سه‌رۆكی ئه‌مه‌ریكاو وڵاته‌كه‌یان به‌رز كرده‌وه‌و له به‌رامبه‌ر هه‌وڵی بێ رێزی نواندن به قورئانی پیرۆز، هه‌ر ئه‌مه‌یش وای له (دێڤد په‌تڕایۆس) ی سه‌ركرده‌ی هێزه ئه‌مه‌ریكیه‌كان كرد له لێدوانێكیدا له به‌رده‌م ده‌زگاكانی راگه‌یاندن، دان به هه‌ڵه‌یی بڕیاری سوتاندنی قوڕئان بنێ‌‌و گوتی: ئه‌نجامدانی ئه‌م كاره له لایه‌ن كلێسایه‌كی ئه‌مه‌ریكی، گیانی سه‌ربازه‌كانمان له‌سه‌رتاپای جیهان‌و ئه‌فغانستان به‌تایبه‌تی ده‌خاته مه‌ترسیه‌وه.
هه‌ر له‌سه‌ر بڕیاری كڵێساكه، ئه‌نجومه‌نی باڵای ئه‌زهه‌ری پیرۆز رایگه‌یاند: گه‌مژه‌ییه‌‌و كارێكی گوماناویه كه قه‌شه‌یه‌ك به‌م كاره هه‌ڵبستێ، ئه‌مه له كاتێكدا موسڵمانان له‌گه‌ڵا كریستیانان له سه‌رانسه‌ری جیهان هیچ كێشه‌یه‌كی نیه، ئه‌مه جگه له نه‌توانینی قه‌بوڵا كردنی به‌رامبه‌ر چیتر نیه.
شایانی باسه هه‌وڵی سوتاندنی قوڕئان له كڵێسا به‌ده‌ستی قه‌شه‌یه‌ك ته‌نها موسڵمانانی نیگه‌ران نه‌كردووه، به‌لكو ئه‌وه‌تا له كالیفۆڕنیا ئافره‌تێكی چاڵاكوان به‌ناوی (چارڵ چارڵی) كه به‌رپرسی ده‌زگای (ویتیێر)ه بۆ داد‌و ئاشتی، له هه‌وڵێكیدا بۆ به‌رپه‌رچدانه‌وه‌ی كڵێساكه له‌سه‌ر پێگه‌ی ئه‌لیكتڕۆنی ده‌زگاكه‌ی رێكلام‌و ئاماده‌سازی ده‌كات بۆ كۆكردنه‌وه‌ی ده‌نگی به‌رهه‌ڵستكار‌و دژ به سوتاندنی قوڕئانی پیرۆز.
| 
یەکێتی زانایان مەراسیمێکی رێزلێنان بۆ 130 مامۆستای ئایینی و هاوکارانی راگەیاندنی مەکتەبی تەنفیزی یەکێتی زانایان ساز دەکات
یەکێتی زانایانی ئایینی ئیسلامی کوردستان پەیامێکی پیرۆزبایی بە بۆنەی جەژنی رەمەزانی پیرۆز بڵاو دەکاتەوە
