یه‌کێتی زانایانی ئاینی ئیسلامی کوردستان
كوردى | العربية ئێمە لە فەیسبوک په‌یوه‌ندی  |  لقه‌کان  |  ستافی کار  |  لینکی پێویست
*****    *****   لقی سۆرانی یەکێتی زانایان کۆدەبێتەوە چەند پرسێک گەنگەشە دەکات    *****    *****   لقی رانیەی یەکێتی زانایان کۆبوونەوەی ئاسایی خۆی ئەنجام دەدات و چەند پرسێک تاوتوێ دەکات    *****    *****   کونسوڵی گشتی فەرەنسا لەهەرێمی کوردستان سەردانی مەکتەبی تەنفیزی یەکێتی زانایان دەکات    *****    *****   دكتۆر شێخ تەها ئەحمەد ئەلزەیدی  ئەندامی كۆڕبەندی فیقهی عێراق: زانایانی كورد پێشەنگ بوون لە گۆڕەپانی زانستی و فەتوادان؛ به نووسین و پۆلێنبەندییەكانیان كتێبخانەی ئیسلامی و مرۆڤدۆستییان دەوڵەمەند كردووە    *****    *****   دكتۆر شێخ تەها ئەحمەد ئەلزەیدی ئەندامی كۆڕبەندی فیقهی عێراق: زانایانی كورد پێشەنگ بوون لە گۆڕەپانی زانستی و فەتوادان؛ به نووسین و پۆلێنبەندییەكانیان كتێبخانەی ئیسلامی و مرۆڤدۆستییان دەوڵەمەند كردووە    *****    *****   ئەنجومەنی باڵای فەتوا: ڕێژه‌ی زه‌كات و سه‌رفیتره‌و فیدیه‌ی ساڵی 1445هـ = 2024م دیاری دەکات    *****    *****   یەکێتی زانایانی ئایینی ئیسلامی کوردستان بەبۆنەی هاتنەوەی مانگی پیرۆزی رەمەزان پەیامێکی پیرۆزبایی بڵاودەکاتەوە    *****    *****   مامۆستا مەلا ياسين چیوەیی کۆچی دوایی کرد یەکێتی زانایان پرسەنامەیەک ئاراستەی خانەوادەکەی دەکات    *****    *****   لقی شقلاوەی یەکێتی زانایان پێشوازی لە شاندێکی وەزارەتی ئەوقاف و میوانان دەکات    *****    *****   لقی شێخانی یەکێتی زانایان لەگەڵ لێژنەی فەتوا کۆبوونەوەیەکی پەیوەست بە مانگی رەمەزان ساز دەکات    *****    *****   لقی هەڵەبجەی یەکێتی زانایان لەپێشوازی مانگی پیرۆزی ڕەمەزاندا مەراسیمێک ساز دەکات    *****    *****   لقی گەرمیانی یەکێتی زانایان سەردانی مەڵبەندی گەرمیانی یەکێتی نیشتمانی کوردستان دەکات   
یه‌كێتی زانایان وه‌ڵامی به‌یاننامه‌كه‌ی ئه‌زهه‌ر ده‌داته‌وه‌
به‌رواری دابه‌زاندن: 03/10/2017 : 14:13:41
قه‌باره‌ی فۆنت

به‌ناوی خوای به‌خشنده‌ی میهره‌بان


(وَإِذَا قُلْتُمْ فَاعْدِلُوا وَلَوْ كَانَ ذَا قُرْبَى)


له‌و كاته‌ی گه‌لی سته‌مدیده‌ی كوردستان تێده‌كۆشێت بۆ گه‌یشتن به‌ مافه‌ ره‌واكانی له‌ ئازادی و سه‌ربه‌خۆیی، بۆ ئه‌مه‌ش له‌ چه‌ند رۆژی رابردوودا ئاشتیانه‌ترین رێگه‌ی هه‌ڵبژاردووه‌ به‌ ئه‌نجامدانی گتشپرسی كه‌ زیاتر له‌ (92%) هاوڵاتیانی كوردستان به‌ (به‌ڵێ) ده‌نگیان بۆ سه‌ربه‌خۆیی كوردستان دا، ئێمه‌ هیواخواز بووین سه‌رجه‌م دام و ده‌زگا ئایینیه‌كان به‌تایبه‌تی ئه‌زهه‌ری شه‌ریف پشتیوانی داخوازییه‌ ره‌واكانمان بكه‌ن، به‌ڵام تووشی سه‌روڕمان هاتین كاتێك بینیمان ئه‌م ده‌زگایانه‌ پشتیان له‌ هه‌ق كردو له‌گه‌ڵ خه‌ڵكی سته‌ملێكراو نه‌وه‌ستان.


به‌تایبه‌تی ئه‌و به‌یاننامه‌‌ بێویژدانه‌ی‌ رۆژی (2 ئۆكتۆبه‌ری 2017) له‌ ئه‌زهه‌ری شه‌ریف دژی مافه‌كانمان ده‌رچوو، ئێمه‌ چاوه‌ڕوانمان ده‌كرد ئه‌وان به‌شێوه‌یه‌كی دادگه‌رانه‌ له‌ ته‌ك گه‌لی كوردستان بوه‌ستنه‌وه‌و دادگه‌ربن له‌گه‌ڵ نه‌وه‌كانی سه‌ڵاحه‌دینی ئه‌یوبی كه‌ شكۆی بۆ ئه‌زهه‌ر گێڕایه‌وه‌و رێڕه‌وه‌كه‌ی راستكرده‌وه‌و هێنایه‌وه‌ سه‌ر راسته‌رێگا، پێویست بوو ئه‌زهه‌ری شه‌ریف به‌ ئه‌ركی وه‌فادارانه‌ی خۆیان هه‌ڵبستن و پشتیوانی نه‌وه‌كانی ئه‌م سه‌ركرده‌ مه‌زنه‌ بكه‌ن، كا چاكه‌ی زۆری به‌سه‌ر ئه‌زهه‌رو میسرو ته‌واوی ئوممه‌ی ئیسلامییه‌وه‌ هه‌یه‌.


له‌وه‌ش خراپتر، به‌داخه‌وه‌ بینیمان ئه‌زهه‌ر تا ناوی (كورد)یشی بۆ ئێمه‌ به‌ ڕه‌وا نه‌زانیوه‌و‌، وشه‌ی (كوردستان)ی گۆڕیوه‌ بۆ (ده‌ڤه‌ر باكوور).


له‌ هه‌مووی سه‌یرتر ئه‌وه‌یه‌ كه‌ ئه‌زهه‌ر دۆزی سه‌ربه‌خۆیی كوردستانی به‌ پیلانی ئیستیعماری داگیركاری به‌ستۆته‌وه‌، ئه‌مه‌ له‌ كاتێكدا كه‌ دۆزه‌كه‌ی ئێمه‌ تازه‌ سه‌ری هه‌ڵنه‌داوه‌، به‌ڵكو پێش دروستبوونی ده‌وڵه‌تی ئیسرائیل و دوای ئه‌وه‌ش هه‌ر هه‌بووه‌، له‌و كاته‌ش كه‌ كۆمه‌ڵه‌ گه‌نجێكی خوێنگه‌رم به‌شێوه‌ی هه‌ڕه‌مه‌كی ئاڵای ئیسرائیل به‌رز ده‌كه‌نه‌وه‌، ناكرێ وه‌كو تۆمه‌ت دژی گه‌لی كوردستان به‌كار بهێندرێت، پاشان ئه‌گه‌ر بوونی ئه‌م ئاڵایه‌ تاوان بێت، خۆ ئه‌م ئاڵایه‌ ده‌یان ساڵه‌ له‌ قاهیره‌و زۆرێك له‌ پایته‌خته‌كانی وڵاتانی عه‌ره‌بی و ئیسلامی به‌بێ نكۆڵیكردن به‌رزده‌كرێته‌وه‌.


نازانین ئه‌زهه‌ر داوای چ جۆره‌ یه‌كبوونێك له‌ گه‌لی كورد ده‌كات له‌گه‌ڵ رژێمی ئێستای عێراق؟ مه‌گه‌ر نازانن حكومه‌تی به‌غدا به‌ ته‌واوی بووه‌ته‌ تائیفی مه‌زهه‌بی، قبولی شه‌راكه‌ت له‌گه‌ڵ ئێمه‌ ناكات، هیچ به‌ڵێن و په‌یاننامه‌یه‌كی نه‌برده‌ سه‌ر، ده‌یان ماده‌ی ده‌ستووری پێشێل كرد، خراپترین ده‌ردو ماڵوێرانی تا به‌سه‌ر عه‌ره‌به‌ سوننه‌ هاونه‌ته‌وه‌كانیشی هێنا، په‌رت و بڵاوی كردن!، كه‌ دوو ملیۆن كه‌سیان په‌نایان بۆ كوردستان هێناو خۆیان له‌ په‌نای گولی چاكه‌خوازو لێبوورده‌ی كوردستان په‌نا دا، وه‌رن پرسیار له‌ برا عه‌ره‌به‌ سووننه‌كانمان بكه‌ن ئاخۆ چیان به‌سه‌ر هاتووه‌، بێجگه‌ له‌ كوردستان هیچ شوێنێكی ئه‌مینیان له‌ عێراق بۆ نه‌ماوه‌ به‌ ئاشتی و ئاسووده‌یی تێیدا بژین؟.


ئه‌م قسه‌یه‌شتان له‌ جێگه‌ی خۆی نییه‌ كه‌ پێتان وایه‌ به‌م هه‌نگاوه‌ ئوممه‌ی ئیسلام پارچه‌ پارچه‌ ده‌بێت، چونكه‌ برا عه‌ره‌به‌كان یه‌كه‌مین كه‌س بوون لاشه‌ی ئه‌م ئوممه‌ته‌یان پارچه‌ پارچه‌ كردو بیست و دوو ده‌وڵه‌تیان لێ دروست كرد، بۆ ده‌بێ ئه‌وه‌ی بۆ خه‌ڵكی تر حه‌ڵاڵه‌ له‌ ئێمه‌ حه‌رام بكرێت!؟.


شیاوتر بوو بۆ ئه‌زهه‌ری شه‌ریف جه‌ختی بكردباوه‌ له‌سه‌ر لابردنی سته‌م و سه‌ركوتكاری به‌رنامه‌ بۆدارێژراو دژی كورد، هه‌مووشمان ده‌زانین ویستنی چاكه‌ بۆ برای مسوڵمان‌ یه‌كێكه‌ له‌ بنه‌ماكانی ئیمان: (لا يؤمن أحدكم حتّى يحبّ لأخيه ما يحبّ لنفسه).


چاوه‌ڕوان بووین ئه‌زهه‌ر پشتیوانی سته‌ملێكراو بكات و به‌رگری له‌ گه‌لێك بكات كه‌ تووشی جینۆسایدی به‌ ئاشكرا هاتووه‌ له‌ ئه‌نفال و ده‌ركردن و بۆمبه‌بارانكردنی به‌ چه‌كی كیمیایی و قه‌ده‌غه‌كراوی نێوده‌وڵه‌تی، هه‌زاران مزگه‌وت و گوندیان سووتێندران، چاوه‌ڕوانبووین به‌رگری له‌ پێنج ملیۆن كه‌سی بێتاوانی كوردستان بكات كه‌ به ‌ده‌ست ئابڵۆقه‌دان و بڕینی رۆزی و ده‌رمان و شیری منداڵان له‌لایه‌ن حكومه‌تی مه‌زهه‌بی به‌غداوه ده‌ناڵێنێت‌‌، چاوه‌ڕوان بووین دادگه‌ربن له‌گه‌ڵ گه‌لی سته‌مدیده‌مان كه‌ ته‌نیا داوای ژیانێكی ئازادو شكۆمه‌ندانه‌ ده‌كات، نایه‌وێت ئازار به‌ كه‌س بگه‌یه‌نێت، له‌ بری مرۆڤایه‌تی به‌ره‌نگاری تووندترین شێوازه‌كانی تووندڕۆیی و تیرۆر بوویه‌وه‌.


ئه‌گه‌ر ئه‌و ئه‌زهه‌ره‌ی وه‌كو قیبله‌ی زانسته‌كانی مسوڵمانان پشتمان پێده‌به‌ستی و به‌ چرای ئازادی گه‌له‌ چه‌وساوه‌كانی رۆهه‌ڵات و رۆژئاوامان ده‌زانی، ئه‌مه‌ هه‌ڵوێستی بێت و نكۆڵی له‌ مافه‌كانمان بكات، كه‌واته‌ كێ به‌ راستی و ده‌دگه‌رانه‌ ته‌ماشامان ده‌كات؟.


له‌ كۆتاییدا داوا له‌ ئه‌زهه‌ری شه‌ریف ده‌كه‌ین خوێندنه‌وه‌یه‌كی دادگه‌رانه‌و بابه‌تیانه‌ی بۆ رووداوه‌كانی عێراق هه‌بێت، رێز له‌ ویست و ئیراده‌ی گه‌لی مسوڵمان و ئاشتیخوازی كوردستان بگرێت، كه‌ ده‌نگیان دا له‌ پێناوی گێڕانه‌وه‌ی مافه‌ زه‌وتكراه‌كان و گه‌یشتن به‌ كاروانی گه‌لانی سه‌ربه‌خۆی مسوڵمان... خوا پشتیوانی هه‌موو لایه‌ك بێت‌.


 


یه‌كێتی زانایانی ئایینی ئیسلامی كوردستان


3/ ئۆكتۆبه‌ر/ 2017