بە بۆنەی هاتنەوەی ساڵیادی پەنجاو پێنج ساڵەی دامەزراندنیەوە، یەکێتی زانایانی ئایینی ئیسلامی کوردستان بەیاننامەیەکی گرنگ و تایبەت بڵاو دەکاتەوە، ئەمەی خوارەوە دەقی بەیاننامەکەیە:

به‌ناوی خوای به‌خشنده‌ی میهره‌بان

((وَاعْتَصِمُوا بِحَبْلِ اللَّهِ جَمِيعًا وَلَا تَفَرَّقُوا وَاذْكُرُوا نِعْمَةَ اللَّهِ عَلَيْكُمْ)) آل عمران:103.

لە یادی 55 ساڵەی دامەزراندنی یەکێتی زانایانی ئایینی ئیسلامی کوردستان؛ پیرۆزباییه‌كی گه‌رم ئاراستەی سەرجەم زانایانی بەرێزی ئایینی و گەلی کورد بەگشتی ده‌كه‌ین.

یه‌كێتی زانایان له‌ 21/9/1970 له‌پێناو ئامانجگەلێکی گرنگی ئایینی و پیشەیی و نیشتمانی، له‌سه‌ر راسپارده‌و سه‌رپه‌رشتی راسته‌وخۆی سه‌ركرده‌ی نه‌ته‌وه‌یی مه‌لا مسته‌فای بارزانی له‌ گه‌ڵاڵه‌ی باڵه‌كایه‌تی دامه‌زرا، کە تا ئێستاش لە خزمەتی بێوچان و ماندوونەناسانەو بەدیهێنانی مافه‌ ره‌واكانی زانایانی ئایینی‌و پارێزگاری لە دین و پاراستنی بەهاو سنوورەکانی دینداری و پشتیوانیكردن له‌ مافه‌ نه‌ته‌وه‌یی‌و نیشتیمانییه‌كان بەردەوامە.

رێڕەوی کارکردن و هەوڵدانی یەکێتی زانایان درێژەدانە بە رێبازی گەورە زانایانی کورد، لە چوارچێوەی شرۆڤەو تێگەیشتنی دروست و زانستی بۆ دەقەکان و، بەستنەوەی دوێنێی توراسی ئیسلامی بە ئەمرۆو گونجان لەگەڵ پێشهات و پرسە نوێیەکان، هاوکات بە لەبەر چاوگرتنی ئامانجە ستراتیژییەکانی خۆمان، برەودان بە دینداری و پەروەردەو پاراستنی بەها ئایینی و ئەخلاقی و خێزانی و کۆمەڵایەتیەکان لەلایەک و، گەیاندنی پەیامی ئیسلامپەروەری و نیشتمانپەروەری و هزری میانڕەوی و پێکەوەژیانی ئاشتیانەو رێزگرتن لە یەکتری و، نەهێشتنی رق و کینەو بیری توندڕەوی لەلایەکی ترەوە بە ئەرکی خۆمان دەزانین.

تەئکید لە پەیامی برایەتی و زمانی رێز لە مومارەسەی دینداری دەکەینەوەو، پێویستە هەمووان تایبەتمەندی رێڕەوی عەقیدەو مەزهەب و یەکهەڵوێستی و یەکڕیزی نێو موسڵمانانی کوردستان لەبەر چاوو بگرن، نابێ ئایین بکرێتە کەرەستەی ململانێی ناجۆرو درزو پەرتەوازەیی، بەڵکو بە پابەندی لە رێبازی پڕ رەحمەتی ئیسلام و پێشەوای مرۆڤایەتی (محمد المصطفى- درودی خوای لەسەر بێت) دەبێ لە بازنەی برایەتی و رێزگرتن لە یەکتری پەرە بە رەوشی دینداری و هەستی نەتەوەیی و نیشتمانی بدەین لە قۆناغی چاکبوون بەرەو قۆناغی چاککردن بڕۆین، بەوە دەتوانین هەموو ئەو ئاڵنگاری و پێشهاتانە بوەستێنین کە زیانی بۆ کیان و کۆمەڵگە هەیە.

داوا دەکەین سەرجەم لایەنەکان تەبایی و یەکهەڵوێستی نیشتمانی رابگرن و لەئاست بەرپرسیارێتی و دابینکردن و پاراستنی مافی گشتی و هاوڵاتیان بن، بە گرنگی دەزانین هەمووان بایەخی زیاتر بە رەوشی ئایینی و مزگەوت و زانایان و پاراستنی پێگەی ئایین و خوێندنی ئیسلامی بدەن، چونکە ئایین و نیشتمان لێک جیا ناکرێنەوەو پاڵپشتی هەرە گەورەش بۆ ئایندەی کوردستان ئەم رەهەندە گرنگەیە، لەم رووەوە رۆڵی زانایانی ئایینی لەبواری ئایینی و پیشەیی بەرز دەنرخێنین و سوپاسی ئەرک و ماندووبوونیان دەکەین.

دووبارە پیرۆز بێت 55 ساڵ خزمەت و بەردەوامی.. خوای گەورە هەموو لایەک سەرفراز بکات.

یه‌كێتی زانایانی ئایینی ئیسلامی كوردستان

20ی9ی2025