مینبەر موڵکی خۆشەویستە -صلَّى اللهُ عَليهِ وَآلِهِ وَسَلَّم- و، موڵکی کەس نییە. وتاربێژ هەرچەندە تۆمەتبار بکرێت و، تانە لە شەرەف و نامووسی بدرێت و، سومعەتی لەکەدار بکرێت، درووست نییە مینبەر بەکار بێنێت بۆ بەرژەوەندیی و بەرگریی لە خۆی، یان لە کۆمەڵ و تاقمەکەی، چونکە دەتوانێت لە چەندەها شوێنی تری وەک تۆڕە کۆمەڵایەتییەکان و کەناڵە ئاسمانییەکاندا بەرگریی لە خۆی بکات و، دەنگی بگەیەنێتە خەڵک. بەڵام بەداخەوە بەشیکی دیار لە وتاربێژ و بانگخوازان دەبینین مینبەر بەکاردێنن بۆ خۆدەرخستن و ستایشکردن و بەرگریی لە خۆیان. نازانم ئەو نوێژخوێنانە تاوانیان چیە کە ڕوو دەکەنە ماڵێک لە ماڵەکانی خودا بۆ ئەوەی زانستێک فێر ببن، یان ئیمان و باوەڕیان زیاد ببێت، یان ئامۆژگارییەک ببیسن دڵیان زیندوو بکاتەوە، یان بابەتێکی فیکریی نوێ فێر ببن عەقڵ و هۆشیان بکاتەوە، بەڵام لەبری ئەوە ناچار دەکرێن بە بیستنی ستایش و بەرگریی جەنابی وتاربێژ لە خۆی. لەبەر ئەمە بە ڕاشکاویی دەڵێم: هەر وتاربێژێ مینبەر و مزگەوت بۆ بەرژەوەندی خۆی و بەرگریی لەخۆی بقۆزێتەوە، ئەوە نەزانە و دەبێت فێر بکرێت، یاخود خیانەتکارە و دەبێت ڕێی لێ بگیرێت و سەرزەنشت بکرێت.
د.عوسمان محەممەد غەریب هەولێر 13/جمادى الأولى/1445هـ -27/11/2023م | 