له‌ هه‌ڵمه‌تێكی فیدڕالیدا، كه‌ بۆ گه‌ڕان‌و دۆزینه‌وه‌ی منداڵانی لاقه‌كراو، رۆژی دووشه‌ممه‌ی رابردوو له‌ سه‌رتاسه‌ری وڵاته‌ یه‌كگرتووه‌كانی ئه‌مه‌ریكا به‌ڕێوه‌چوو، توانرا 69 منداڵ‌و، 884 تاوانبار‌و، 99 دزی منداڵ ده‌سگیربكرێن.

پێگه‌ی(CNN) بڵاویكرده‌وه‌: كه‌ هه‌ریه‌ك له‌ ده‌زگاكانی نوسینگه‌ی لێكۆڵینه‌وه‌ فیدڕالیه‌كان -ئێف، بی، ئای-و وه‌زاره‌تی دادو، سه‌نته‌ری نه‌ته‌وه‌یی بۆ منداڵانی شوێن بزر‌و كارپێكراو، به‌هه‌ماهه‌نگی ئه‌م هه‌ڵمه‌ته‌یان به‌ڕێوه‌بردووه‌‌و، زۆرترین هه‌وڵیان داوه‌ بۆ دۆزینه‌وه‌ی تاوانباران‌و منداڵانی لاقه‌كراو.

له‌ وته‌یه‌كیدا بۆ ده‌زگاكانی راگه‌یاندن (چۆن هینری) به‌رپرس له‌ ئێف، بی، ئای، رایگه‌یاند: به‌داخه‌وه‌ بازرگانیكردن به‌ منداڵان به‌ مه‌به‌ستی سێكس له‌گه‌ڵ كردنیان، له‌ كێشه‌ هه‌ره‌ سه‌ره‌كیه‌كانی وڵاته‌كه‌مانه‌، ئه‌مه‌ به‌ ئاشكرایی له‌ زۆری ژماره‌ی تاوانباران ده‌رده‌كه‌وێ‌.

له‌لایه‌ن خۆیشیه‌وه‌، ئایرنی ئالان سه‌رۆكی سه‌نته‌ری نه‌ته‌وه‌یی بۆ منداڵانی شوێن بزر‌و كارپێكراو، گوتی: ئه‌م هه‌ڵمه‌ته‌ هاوڵاتیانی ئه‌مه‌ریكا هۆشیار ده‌كاته‌وه‌، كه‌ زیاتر ئاگاداری منداڵه‌كانیان بن‌و، وه‌ك به‌نده‌ی سه‌ده‌كانی زوو كڕین‌و فرۆشتنیان پێنه‌كرێ‌.

شایانی باسه‌: زۆرینه‌ی هه‌ره‌ زۆری تاوانباران له‌ هه‌ریه‌ك له‌ شاره‌كانی: سیاتل، تاكۆما، واشینۆن، سكارامینتۆ ده‌سگیركران‌و، ساڵی رابردوویش له‌ هه‌ڵمه‌تێكی هاوشَیوه‌دا، زیاتر له‌ 600 تاوانباری لاقه‌كار ده‌سگیركران.