رۆژی دووشەممە 3/ 7/ 2023 بە ئامادەبوونی ژمارەیەكی بەرچاوی زانایان و كەسایەتی و هاوڵاتیانی دەڤەرەكه، لقی پشدەری زانایان؛ دژ بە سووتاندنی قورئانی پیرۆز لە وڵاتی سوێد؛ گردبوونەوەیەكی ناڕەزایی سازكرد.
سەرەتای گردبوونەوەكە بە خوێندنی چەند ئایەتێك لە قوڕئانی پیرۆز دەستی پێكرد، پاشان بەڕێز مامۆستا مەلا ئەحمەدی خانەقا بەرپرسی لق وتەی بەخێرهاتنی خوێندەوەو تیایدا بەخێرهاتنی بەشداربووانی كردو سوپاسی سەرۆكایەتی شارەوانی قەڵادزێ و ئاسایش و پۆلیسی كرد كە پاڕكی نێوبازاڕیان ئامادەكرد بۆ پێشوازی ئەم گردبوونەوەو ئەمنیەتی گردبوونەوەكەشیان پاراست، پاشان وتارو بەیاننامەی لقی زانایان لەلایەن مامۆستا مەلا علی هێرۆیی خوێنرایەوە" كە تیایدا چوار داواكاری خرانە بەردەم ڕای گشتی:
یەكەم/ حكومەتی سویدی بە فەرمی داوای لێبوردن لە موسڵمانانی جیهان بكات و ڕەگەزنامەی سویدی لەم تیرۆرستە بسەنێتەوەو ڕەوانەی عێڕاق بكرێتەوە. 2ـ لە ئەگەری داوای لێبوردن نەكردن سەرجەم وڵاتانی موسڵمان بانگهێشتی كونسوڵی سویدی لە وڵاتەكەیان بكەن بۆ لێپرسینەوەو سەرجەم پەیوەندیەكانیان لەگەڵ وڵاتی سوید هەڵپەسێرن.
سێهەم/ داواكارین لە حكومەتی عێڕاقی جدیانەتر كاربكات بۆ گێڕانەوەو دادگایی كردنی ئەم تیرۆرستە.
چوارەم/ داواكارین لە حكومەتی هەرێمی كوردستان دەنگی بخاتە پاڵ دەنگی حكومەتی عێڕاقی و داوا لە حكومەتی سویدی بكات بۆ لێسەندنەوەی ڕەگەزنامەی سویدی لەم تیرۆرستەو گێڕانەوەی بۆ عێڕاق و دادگایی كردنی.
دواتر هەر یەك لە بەڕێزان مامۆستا حەسەن عبدالله بەرپرسی ناوچەی قەڵادزێی كۆمەڵی دادگەری و مامۆستا مەلا ئیبڕاهیم بەرپرسی لقی پشدەری یەكگرتووی ئیسلامی كوردستان وتەیان پێشكەشكرد.
لە كۆتاییشدا بەڕێز دكتۆر صالح ئیبڕاهیم بەیاننامەی لقی پشدەری یەكێتی زانایانی بە زمانی ئینگلیزی خوێندەوە.
جێگای ئاماژەیە ژمارەیەكی زۆر لە موسڵمانانی دەڤەرەكە لە هەردوو ڕەگەز بەشداری ئەم گردبوونەوەیان كردو دەستخۆشیان لە لقی پشدەری زانایان كرد بۆ ڕێكخستنی ئەم گردبوونەوەیە.
ڕاگەیاندنی لق
