ئەمرۆ 5ی7ی2023 بەرێز د. عبدالله مەلا وەیسی سەرۆکی یەکێتی زانایان بە ئامادەبوونی مامۆستا مەلا جەلال خەیلانی جێگری سەرۆک و ئەندامانی مەکتەبی تەنفیزی، پێشوازیان لە بەرێز پ.د.جمیل عەلی سورچی راگری کۆلێژی زانستە ئیسلامیەکانی زانکۆی سەلاحەدین شاندی یاوەری دکتۆر ئەحمەد سەیدەو د.عمران مزوری و مامۆستا احمد گرتکی کرد.
سەرەتای دانیشتنەکە بەرێز د. عبدالله سەرۆکی یەکێتی زانایان وێرای بەخێرهێنان و دەربڕینی خۆشحاڵی، جەختی لە پێگەی گرنگی کۆلێژی زانستە ئیسلامیەکان کردەوە لە برەودان بە رەوتی زانستی و ئەکادیمی و پێگەیاندنی کادری بەتوانا بۆ خزمەتکردنی ئایین و نیشتمان، هەروەها گوتیشی: کۆلێژی زانستە ئیسلامیەکان دەسکەوت و شانازییەکی گەورەیە بۆ یەکێتی زانایان و کوردستان و بەچاوی رێزو تەقدیرەوە لە هەوڵەکانیان دەڕوانین.
لە بەشێکی تری قسەکانی سەرۆکی یەکێتی زانایان گوتی: لێک نزیکی و هەماهەنگی نێوانمان بۆ ئەنجامدانی کۆمەڵێک کاری هاوبەش و ئەکادیمی بناغەیەکی گرنگە بۆ ئەوەی لە ئایندە بتوانین خزمەتێکی شایستە و گرنگ پێشکەش بە کوردستان بکەین.
پاشان بەرێز پ.د.جمیل عەلی سورچی راگری کۆلێژی زانستە ئیسلامیەکان لە وتەیەکدا سوپاسی خۆی و ستافی مامۆستایانی کۆلێژەکەی گەیاندە مەکتەبی تەنفیزی و جەژنی قوربانی لێ پیرۆز کردن، دواتر رۆڵ و پێگەو کاریگەری یەکێتی زانایانی لە گۆڕەپانی کوردستان بە گرنگ وەسف کردو گوتیشی: یەکێتی زانایان و کۆلێژی زانستە ئیسلامیەکان دوو لایەنی پەیوەستن بە خزمەتکردنی ئایینی پیرۆزی ئیسلام و زانستە شەرعیەکان و ئامانج و خاڵی هاوبەش و مەیدانی کارکردنیان یەکەو بە یەکەوەش دەتوانین کاری گرنگ و هاوبەش بکەین، بەتایبەت لەبواری گەیاندنی پەیامی میانڕەوی و نەهێشتنی توندڕەوی و ناکۆکی و ئەو ململانێیەی بەرۆکی گەلەکەمانی گرتووە.
شایەنی باسە هەر لەو دانیشتنە کۆمەڵێک پرس و بابەتی پەیوەست بە هەردوولا گفتوگۆی لەبارەوە کراو تەئکید لە هەماهەنگی کاری هاوبەش لەنێوان هەردوولا کرایەوە.
