مه‌لا ته‌یب زیاره‌تی (زانایان):

ئه‌مڕۆ 21/2/2010 سه‌رۆكی یه‌كێتی زانایان له‌ ئاهه‌نگی یادی مه‌ولود له‌ كۆلێژی زانسته‌ ئیسلامیه‌كانی زانكۆی سه‌لاحه‌دین هێمنی كوردستانی به‌ نیعمه‌تی خوایی وه‌سف كرد‌و، پاراستنیشی به‌ ئه‌ركی هه‌مووان زانی.

مه‌لا عه‌بدولا مه‌لا سه‌عید سه‌رۆكی زانایان له‌ ده‌ستپێكی قسه‌كانی پیرۆزبایی مه‌ولودی له‌ مامۆستایان‌و قوتابیانی كۆلێژی خوێندنی ئیسلامی كرد‌و، ئه‌م هه‌نگاوه‌شی به‌ با جێگه‌ی شانازی دانا.

به‌لای سه‌رۆكی یه‌كێتی زانایان یادی مه‌ولود یادی عیلم‌و خوێندن‌و خوێنده‌واری‌و عیلم‌و زانیاری‌و قه‌له‌مه‌، چونكه‌ ئه‌وانه‌ په‌یامی هاتنی پێغه‌مبه‌ری خوا بوون.

هه‌روه‌ها سه‌رۆكی زانایان په‌یامی ئه‌م كۆلێژه‌ی به‌ پیرۆز وه‌سف كرد، كه‌ به‌ شانازییه‌وه‌ زۆربه‌ی وتاربێژانی كوردستان به‌تایبه‌تیش هه‌ولێر ده‌رچووانی ئه‌م كۆلێژه‌ن، هه‌روه‌ها ژماره‌یه‌كی زۆری مامۆستایانی وانه‌ی عه‌ره‌بی له‌ قوتابخانه‌كان به‌ هه‌مان شێوه‌ له‌وێوه‌ ده‌رچوونه‌، بۆیه‌ ئه‌ركی ئه‌و قوتابیانه‌ قورستره‌ به‌وه‌ی هه‌وڵبده‌ن زانست‌و ره‌وشت فێری خه‌ڵكی بكه‌ن.

ئینجا سه‌رۆكی یه‌كێتی زانایان هاته‌ سه‌ر ئه‌و ره‌وشه‌ی ئه‌مڕۆ له‌ شاری سلێمانی دروست بووه‌، ئه‌و رایگه‌یاند: خۆپیشاندان مافێكی سرووشتی هاووڵاتیانه‌ به‌ڵام به‌ هێمنی‌و شارستانیانه‌، ئینجا گووتی: ئه‌م ئه‌من‌و ئاساییشه‌ی كوردستان نیعمه‌تێكی خواییه‌‌و، پێویسته‌ هه‌موومان پارێزگاری لێبكه‌ین‌و، به‌ هیچ شێوه‌یه‌ك رێگه‌ نه‌ده‌ین ئه‌م دۆخه‌مان له‌ ده‌ست بچێت.

جیاوازی كاركردن‌و بۆچوونیش شتێكی ئاساییه‌، ده‌كرێ‌ له‌ ناو خێزان‌و لایه‌نی سیاسی‌و بگره‌ مامۆستایان‌و زانایانی ئایینی‌و هه‌موو چین‌و توێژێك هه‌یه‌، به‌ڵام ده‌بێ‌ جیاوازییه‌كان بۆ خزمه‌تكردن بێت، نه‌ك پشێوی نانه‌وه‌، پێویستیشه‌ حزب‌و حكومه‌ت به‌وپه‌ڕی سنگفراوانییه‌وه‌ به‌ پیر خواسته‌كانی جه‌ماوه‌ر بچن‌و، هه‌وڵ بده‌ن هه‌میشه‌ چاكسازی له‌ كاره‌كانیان بكه‌ن.