لە سەروبەندی ئەنجامدانی ڕەشەكوژیی دژ بە موسڵمانانی (بۆڕما)، كەسانێك ئەو ڕووداوەیان بە پەرچەكردار و تۆڵەكردنەوە لە موسڵمانان وەسفكرد، گوایە پێشتر موسڵمانەكان دەسپێشخەربوون لە سەربڕینی بوزییەكان، بۆیەش ئەو ڕەشەكوژییەی لێكەوتەوە، من ئەو بۆچوونە پێكەنیناوییە بە ناهەقیكردنێكی تر دەرهەق بە تەواوی موسڵمانان دەزانم، چونكە ئەگەر بە ویژدانەوە ئەو شێوە ڕەفتار و كردارانە هەڵبسەنگێنین، هەموومان خاوەنی ڕاستەقینەیان دەناسینەوە و، دەزانین كە كێن ئەوانەی لە ڕابردوو و لە ئێستا و لە داهاتووشدا، ئەو دڕندایەتییە دەنوێنن و، كێن ئەوانەی بە پەروەردەی مەنهەجییانەوە بوونەتە كارەكتەری شارەزای مرۆڤكوژیی، بۆیە من بەو برادەرانە دەڵێم: ئایا ئەوە موسڵمانەكانن ئیڕهابین؟!، من چەند پرسیارێك دەكەم و بەس، ئیدی هەقوایە مێژووی ڕووناك بكەنە سەرچاوەی هیدایەت بۆ ئەو گومڕاییەی تووشی سەرلێشێواویی كردوون:
ئایا موسڵمانەكانن بەرپرسیارن لە قەسابخانەكەی (قانا) كە (106) پەنابەری لوبنانی تێدابوونە قوربانی كە نیوەیان منداڵ بوون؟!.
ئایا موسڵمانەكان بوون شاری (هیرۆشیما)یان كیمیاباران كرد كە گیانلەدەستدانی (78150) كەسی لێكەوتەوە؟!، ئەی موسڵمانەكان بوون شاری (ناغازاكی)یان بە چەكی ئەتۆمی بۆمباباران كرد؟!.
ئایا موسڵمانەكان بوون هیندییە سوورەكانییان جینۆساید كرد و، لە گەڵیشیاندا، شارستانییەتەكانی (مایا) و (ئەزیتا) و (بوهاتن)یان لەناوبرد؟!.
ئایا موسڵمانەكان بوون لە جەنگی جیهانی دووەمدا، شارەكانی ووڵاتی (یابان) یان بە بۆمبی ئاگرین بۆمببارانكرد؟!.
ئایا موسڵمانەكان بوون توخمی پرتەقاڵییان لە جەنگی ڤێتنامدا بەكارهێنا؟!.
ئایا موسڵمانەكان بوون ڕەشەكوژیی (سەبڕا و شاتیلا) یان ئەنجامدا؟!.
ئایا موسڵمانەكان بوون خاوەنی (أبو غریب) بوون، كە ڕكابەری دادگاكانی پشكنینی ئەوروپای لە چەرخە تاریكەكاندا كرد؟!.
كێ بەرپرسیارە لە دادگاكانی پشكنین لە ئیسپانیا كە پیاوەكانیان دەكرد بە دوو كەرتەوە و لە سەر كورسی دروستكراو لە بزمار دایاندەنیشاندن، ئایا ئەوە موسڵمانەكان بوون؟!، یان ئەوە موسڵمانەكان بوون لە قودسی پیرۆزدا خوێنی شوێنكەوتووانی سێ ئایینیان ڕشت، كە خوێنەكانیان گەیشتە ئاست بڵندیی قاچی ئەسپەكان؟!.
ئایا موسڵمانەكان بوون پیاوە سۆماڵییەكانییان بە سەر ئاگرەوە ڕادەگرت تاوەكو بە قرچە قرچی سووتانی جەستەیان سەریان دەنایەوە؟!.
ئایا موسڵمانەكان بوون، زانا و فەیلەسوف (جیرانو برۆنۆ) یان بە هۆی تیۆرە زانستییەكانییەوە بە زیندوویی گڕ تێبەردا ؟!.
ئایا موسڵمانەكان بوون گەلی (هیریرۆ) یان جینۆسایدكرد كە ئێستا بە (نامیبیا) ناسراوە؟!.
بۆیە بانگەوازیخوازی ئەڵمانی (بییر فوجل) پرسیار دەكات و دەڵێت: كێ بوون جەنگی جیهانی یەكەمیان هەڵایساند؟!، ئایا موسڵمانەكان بوون؟!.
كێ بوون بۆمبی ئەتۆمیان فڕێدایە سەر هیرۆشیما؟!، ئایا موسڵمانەكان بوون؟!.
كێ بوون (20) ملیۆن (ئەبوریجین) یان لە دانیشتووانە ئەسڵییەكەی ئوستوڕاڵیا كوشت؟!، ئایا ئەوە موسڵمانەكان بوون؟!.
كێ بوون زیاتر لە (100) ملیۆن لە هیندییە سوورەكانییان لە باكوری ئەمریكا و، زیاتر لە (50) ملیۆن لە هیندییە سوورەكانییان لە باشووری ئەمریكا جینۆسایدكرد؟!، ئایا موسڵمانەكان بوون؟!.
كێ بوون ئەوانەی زیاتر لە (180) ملیۆن مرۆڤیان لە ئەفریقیا وەكو كۆیلە گرت كە (77%) یان لە ڕێگادا مردن و فڕێدرانە نێو ئۆقیانووسی ئەتڵەنتی؟!، ئایا موسڵمانەكان بوون؟!.
نا، نەخێر موسڵمانەكان نەبوون ...
ئێستا پێموایە ئەو چەند نموونەیە، بەسە بۆ ئەوەی پێویستمان بەوە نەبێت بۆ داكۆكیكردن لە ئیسلام، بەرسڤی ئەوانە بدەینەوە كە دەیانەوێت بە چەواشەكارییەوە وێنای ئەو واقیع و ڕووداوە تراژیدیایانەمان بۆ بكەن ...
