لەسەر مەسەلەی پێگەی ئایین لە دەستووری هەرێمی کوردستان ماڵپەڕی رووداو راپرسیەکی کردووە، لە راپرسیەکە پرسیاری کردووە: (لەگەڵ چ جۆرە دەستوورێکی بۆ کوردستان؟) ئینجا سێ بژاردەی داوەتە خوێنەر: (ئیسلامی، عەلمانی، بۆم گرنگ نییە).

لێرەدا ئامانج ئەوە نییە وەك خەڵکێك بکەومە بێرێزیکردن بەرامبەر ئەو کەناڵە چونکە ئەگەر کەموکوڕیشی هەبێت بەڵام لە رووی میدیایی و نەتەوەیی هەندێك شتی کرد داهاتوو پیشانی دەدات کە چەندە شتی تازە بوون، بەڵام لەم راپرسیەدا ورد نەبووە، چونکە دەبوو راپرسی بۆ شتێك بکات کە ململانێی لەسەر بیت، ئاخر کەس داوای نەکردووە دەستوورێکی ئیسلامی بێت، لەبەر ئەوەی ئەم دەستەواژەیە روون نییە، چونکە ئێران و سعودیەو داعشیش بە دەستووری خۆیان دەڵێن ئیسلامی، لە کاتێکدا تەنها گوزارشت لە یەك رەنگ دەکەن، ئەمەش پێچەوانەی وەسیقەی مەدینەیەو هەروەها ئەو دەستوورە مەدەنییە نییە کە داوا دەکرێت. ئێستا قسە ئەوەیە ئایا لەم دەستوورەی هەرێمی کوردستان ئیسلام سەرچاوەیەکی سەرەکی یاسادانان بێت یان نا؟ کە دڵنیاین بۆ دەستوورێك کە گوزارشت لە خەڵکی کوردستان بکات پێویستە ئەم بڕگەیە بچەسپێت.

بۆیە تا کاتی نووسینەوەی ئەم بابەتە (69.8%) دەنگیان بە بەڵێ داوە بۆ دەستوورێکی ئیسلامی و (28.9%) بۆ عەلمانی و (1.3%) بۆم گرنگ نییە. ئەگەر وەکو خۆی بنووسرایە بەشێکی زۆری (28%)ەکە دەچوونە پاڵ (69%) یەکە.

سەرباری هەموو ئەوانەش دەبێ لیژنەی نووسینەوەی دەستوور چاك لە ئەنجامی ئەم راپرسیانە تێ بگات و داخوازی کەمینەیەك بەسەر زۆرینە نەسەپێنێت، بەڵکو دەنگی هەمووان بێت هەر یەکەو بە قەبارەی خۆی.