چاپی یەكەمی كتێبی (راگەیاندنی سەربەخۆیی كوردستانو مافی گەلی كورد لە روانگەی ئیسلامەوە) لە نووسینی دكتۆر حەسەن خالید مستەفا موفتی كەوتە بەر دیدی خوێنەرانەوە.
كتێبەكە بە قەبارەی مامناوەندی لە (228) لاپەڕە پێكهاتووەو، بە زمانی عەرەبی نووسراوە، لەلایەن دەزگای ئاراس چاپو بڵاوكراوەتەوە.
دكتۆر حەسەن لە كتێبەكەداو، بە تێڕوانینەكی زانستیانەی ئیسلامی تیشك دەخاتە سەر كۆمەڵێك بابەتی گرنگو، چەمكە پێوەندیدارەكانی ئەم بابەتە شی دەكاتەوە، وەك: (مەبەست لە مافی كوردو مافی سەربەخۆیی كورد چییە، هەروەها سەربەخۆیی هەرێمی كوردستانی باشوور مافێكی شەرعیو دەستوورییەو، سەربەخۆیی بەشێكی باشوور هەنگاوێكە بەرەو سەربەخۆیی كوردستان، گرنگی راگەیاندنی سەربەخۆیی هەرێمی كوردستان لە چیدایە؟)، پاشان تیشكێك دەخاتە سەر مێژووی كوردستان لە رووی جوگرافیاو دانیشتوانەوە.
دواتر باس لە جۆرەكانی یەكسانیبوون دەكات لە مرۆڤبوونو یەكسانی ژیانێكی سەربەرزانەو كاری حەڵاڵو، یەكسانی مافی بیركردنەوەو تاقیكردنەوەو، یەكسانی لە بەرپرسیارێتیدا.. لەگەڵ كۆمەڵێكی دیكە لە جۆرەكانی یەكسانی.
پاشان باس لە مافەكانی كورد دەكات لە بەرەنگاربوونەوەی ستەمكارو داگیركەرانو، مافی شانازیكردن بە نەتەوایەتی خۆتو مافی قسەكردن بە زمانی دایكت، كە زمانی كوردییە.
دكتۆر حەسەن بەشێكی سەرەكیشی تایبەت كردووە، بە مافی سەربەخۆیی كوردستان لە روانگەی شەریعەتی ئیسلامەوە.
دەرەنجام دەگاتە ئەوەی كورد ئوممەتێكی گەورەو دێریننو، وەك هەموو نەتەوەكانی دیكە خاوەنی خاكو زمانو كەلەپەوورو كەلتووری خۆیاننو، پێش زیاتر لە هەزار ساڵ وشەی كوردستان بەكارهێندراوەو، بەتایبەتیش لە سەرددەمی دەسەڵاتی سولتانی سەلجوقی (سەنگەری كوری مەلیك شا) كە لە ساڵی (552كۆچی) كۆچی دوایی كردووە.
لە بارەی زمانی كوردیشەوە نووسەر باس لەوە دەكات، كە زمانی كوردی خاوەنی كۆمەڵێك شێوەزارەو پتر پەرە بە ئەدەبیاتی زیندووو قوڵ و جوانی دەدات، ئینجا باس لە سنووری جوگرافیای كوردستان دەكات.
هەروەها موفتی بەشێكی كتێبەكەی تایبەت كردووە بە پیرۆزی خاكی كوردستانو، كۆمەڵێك بەڵگەی قورئانی و قسەی راڤەكارانی قورئانو شارەزایان دەهێنێتەوە.
دەربارەی شارستانێتی كوردیش پێی وایە یەكێكە لە شارستانییە هەرە كۆنەكان، لەوەشدا باس لە چەند شوێنێكی دێرینی وەك قەڵای هەولێر دەكات.
دوای خستنە رووی كۆمەڵێك لەم جۆرە بابەتانە دكتۆر حەسەن پێی وایە شەریعەتی ئیسلامی وەك هەر گەلێكی دیكە، مافی چارەنووسو دامەزراندنی دەوڵەتێكی سەربەخۆ لەسەر جوگرافیاكەی بە كورد داوە، هەروەها ئەوە لە بەندەكانی رێكەوتنە نێودەوڵەتییەكانیش هەیە.
پاشان دەچێتە ناو بەڵگەكانی شەریعەتی ئیسلامی، بەوەی بە هیچ شێوەیەك ئەم كارە، بەتایبەتی بۆ ئەم سەردەمە مانای پەرتەوازەكردنی ئوممەتی ئیسلامی نییەو، بەتایبەتی كە گەلی كورد هەمیشە خۆشەویستو پابەندو پشتو پەنای ئایینی ئیسلام بووەو، مێژووناسان شاهێدی بۆ ئەو رۆڵە مەزنەی زانایانی كورد دەدەن.
كۆمەڵێك تەوەری دیكەی گرنگی تێدایە، كە خوێنەر دەتوانێت بگەڕێتەوە سەر كتێبەكەو زانیاری پتر وەدەست بهێنێت.
شایانی باسە دكتۆر حەسەن موفتی زانایەكی ئایینیەو، هەڵگری بڕوانامەی دكتۆرایەو، ئێستا سەرۆكی بەشی شەریعەیە لە كۆڵیژی زانستە ئیسلامییەكانی سەر بە زانكۆی سەلاحەدینو، چەندین نووسراوو كتێبی چاپكراوی هەیە.
![](files/estiqlal-kurdistan0.gif)