ڕاگه‌یاندنی لقی هه‌ولێر: مه‌عروف مه‌لا عولا روستایی: دوای نیوه‌ڕۆی رۆژی 23/1/2013 به‌بۆنه‌ی یادی له دایكبوونی پێغه‌مبه‌ر (دروودی خوای له‌سه‌ر بێت)و، به‌مه‌به‌ستی به‌رز ڕاگرتنی یادی مه‌ولود، لقی هه‌ولێری یه‌كێتی زانایانی ئاینی ئیسلامی كوردستان، به‌هه‌ماهه‌نگی له‌گه‌ڵ به‌رێوه‌به‌رایه‌تی گشتی ئه‌وقافی هه‌ولێر به ئاماده‌بوونی ژماره‌یه‌كی به‌رچاو له وه‌زیر‌و به‌رپرسانی حكومی‌و حیزبی‌و، شێخانی ته‌ریقه‌ت‌و، مامۆستایانی ئاینی‌و، كه‌سایه‌تی‌و، جه‌ماوه‌ری ئیسلام دۆستی شاری هه‌ولێر، ئاهه‌نگێكیان ساز كرد سه‌ره‌تای ئاهه‌نگه‌كه به خوێندنه‌وه‌ی چه‌ند ئایه‌تێك له قوڕئانی پیرۆز ده‌ستیپێكردو، دواتر وته‌ی به خێرهێنان به ناوی لقی هه‌ولێری یه‌كێتی زانایان‌و به‌رێوه‌به‌رایه‌تی گشتی ئه‌وقاف له لایه‌ن به‌ڕێز شێخ قاسم به‌رزنجی به‌رێوه‌به‌ری گشتی ئه‌وقاف خوێندرایه‌وه. پاشان به‌رێز وه‌زیری ئه‌وقاف‌و كاروباری ئاینی كاك حاجی كامیل حاجی علی وته‌یه‌ك له‌سه‌ر په‌یامی مه‌ولود پێشكه‌شكردو، جه‌ختی له‌سه‌ر گرنگی گه‌یاندنی دروشمه به‌رزه‌كانی ئاینی پیرۆزی ئیسلام‌و، به‌گه‌وره زانینی په‌یامبه‌ری ئیسلام كرده‌وه پاشان مامۆستا مه‌لا عه‌بدوڵڵا مه‌لا سه‌عید گرتكی سه‌رۆكی یه‌كێتی زانایان وته‌یه‌كی پێشكه‌ش كردو په‌یامی زانایانی به بۆنه‌ی له دایكبوونی فه‌خری كائینات به ناوی سه‌رجه‌م زانایانی ئیسلام به ئاماده‌بووان راگه‌یاند، هه‌روه‌ها تیشكی خسته سه‌ر گرنگی ئه‌و یاده له‌قۆناغی ئێستای گه‌له‌كه‌مان، به‌وه‌ی ئه‌ركه هه‌مووان هه‌وڵی ئه‌وه بده‌ن، كه یه‌كریزی نێو ماڵی كوردو برایه‌تی‌و به‌ها ئه‌خلاقیه‌كان‌و پێكه‌وه‌ژیان ببێـته هه‌وێن‌و ئاسۆی هه‌میشه‌یی له كوردستاندا. ئه‌مه‌و له‌لایه‌ن ژماره‌یه‌ك سروودبێژ، ئاهه‌نگه‌كه به‌سروودی ئاینی رازێنرایه‌وه‌‌و، بووه جێگه‌ی خۆشحاڵی ئاماده‌بووان. | 
