به‌شێویه‌كی ره‌سمی بڕیاره‌ی كه‌مكردنه‌وه‌ی رێژه‌ی حاجیانی هه‌رێمی كوردستان بۆ سعودیه گه‌یشته ده‌ست وه‌زاره‌تی ئه‌و قاف و كاروبای ئایینی هه‌رێمی كوردستان، بۆ ئه‌و مه‌به‌سته‌ش وه‌زاره‌تی ناوبراو رێوشێونی كه‌مردنه‌وه‌ی رێژه‌ی حاجیان بۆ ئه‌و وڵاته ده‌گرێته‌به‌ر. له‌و باره‌یه‌وه ئه‌مرۆ (19ی حوزه‌یرانی 2013) كامیل حاجی عه‌لی، وه‌زیری ئه‌و قاف و كاروباری ئایینی له كۆنگره‌یه‌كی رۆژنامه‌نوسیدا له شاری هه‌ولێر رایگه‌یاند: ماوه‌یه‌كه ده‌نگۆی كه‌مكردنه‌وه‌ی رێژه‌ی حاجیانی ئه‌مساڵ له ئارادایه، بۆ ئه‌و مه‌به‌سته‌ش رۆژی 17/6 به شێوه‌یه‌كی ره‌سمی داوایه‌كی له‌و جۆره‌یان به‌ده‌ست گه‌یشت و ئێستا سه‌رقاڵی دۆزینه‌وه‌ی شێوازێكی گونجاون بۆ كه‌مكردنه‌وه‌ی ئه‌و رێژه‌یه كه پێویسته 930 حاجی كه‌مبكه‌نه‌وه. كامیل حاجی عه‌لی وتیشی: "یه‌كێك له‌و رێگایانه داوامان له‌و كه‌سانه كردووه كه ئه‌مساڵ سه‌رفه‌ری حه‌ج ده‌كه‌ن، به‌ڵام خۆیان به‌شێوه‌یه‌كی ئاره‌زوو مه‌ندانه نایه‌نه‌وێت ئه‌مساڵ سه‌فه‌ر بكه‌ن، ده‌توانن سه‌ردانی به‌ڕێوه‌به‌رایه‌تیه‌كانی حه‌ج و عومه‌ره بكه‌ن له پارێزگاكان و ناوی خۆیان بسڕنه‌وه، به‌ڵام بۆ ساڵێكی تر به‌بێ تیرپشك مافی سه‌فه‌ری حه‌جیان پێده‌درێت". هه‌ر له‌و كۆنگره رۆژنامه‌نوسیه‌دا قاسم ره‌سوڵ، به‌ڕێوه‌به‌ری گشتی حه‌ج و عومه‌ره‌ی هه‌رێم رایگه‌یاند: بۆ ئه‌وه‌ی ئه‌م كه‌مكردنه‌وه‌یه‌ی رێژه‌ی حاجیانی هه‌رێم كاریگه‌ری له‌سه‌ر كه‌س نه‌بێت، چه‌ند رێوشێنی تریان داناوه، له‌وانه كه‌مكردنه‌وه‌ی رێژه‌ی سه‌دا 20 كه‌سوكاری شه‌هیدان و زیندانیانی سیاسی و مورشیده ئایینیه‌كان، هه‌روه‌ها بڕیاربوو 517 كه‌س له‌جیاتی ئه‌و كه‌سانه‌ی بڕیاربوو سه‌فه‌ری حه‌ج بكه‌ن به‌ڵام كۆچی دواییان كردووه رابگیرێت. بڕیاربوو ئه‌مساڵ له هه‌رێمی له چوار هه‌زار و 650 كه‌س سه‌فه‌ری حه‌ج بكه‌ن، به‌ڵام به‌هۆی نۆژه‌نكردنه‌وه‌ی به‌شێكی شاری مه‌ككه، به‌رپرسانی ئه‌و وڵاته داوایان له وڵاتانی ئیسلامی كردووه رێژه‌ی هاتنی حاجیایان كه‌مبكه‌نه‌وه. ساڵانه خه‌ڵكی موسڵمان له دوای جه‌ژنی ره‌مه‌زان و نزیك جه‌ژنی قوربان به‌مه‌به‌ستی به‌جێگه‌یاندنی فه‌ریزه‌ی حه‌ج سه‌ردانی وڵاتی سعودیه ده‌كه‌ن، بۆ ئه‌مساڵیش رێوره‌سمه‌كه ده‌كه‌وێته مانگی 10 تشرینی یه‌كه‌م. خه‌ندان | 
