بە ناوی خوای گەورەو میهرەبان (وَمَنْ يَقْتُلْ مُؤْمِنًا مُتَعَمِّدًا فَجَزَاؤُهُ جَهَنَّمُ خَالِدًا فِيهَا وَغَضِبَ اللَّهُ عَلَيْهِ وَلَعَنَهُ وَأَعَدَّ لَهُ عَذَابًا عَظِيمًا) دیارە سەر لە نێوەڕۆی رۆژی یەكشەمە (29/9/2013) چەند كەسێكی تیرۆریستی خۆكوژ، دوور لە هەموو بەها مرۆڤایەتیو ئایینیو هەموو بنەما ئەخلاقیەكانو دوور لە هەرچی ویژدانە، هەڵستان بە خۆتەقاندنەوەو ئەنجامدانی چەند تەقینەوەیەك لەبەردەم ئاسایشی گشتی لە هەولێر، كە بە داخەوە چەند شەهیدو بریندارێكی لێكەوتەوە. ئێمە لە یەكێتی زانایانی ئایینی ئیسلامی كوردستان بە تووندی ئیدانەی ئەم كارە نامرۆڤانەو دوور لە ئایینە دەكەینو، تەئكیدی دەكەینەوە، ئەم كارە بە هەموو شێوەیەك دژی بنەما پیرۆزەكانی ئیسلامو هەستو مافی مرۆڤانەیەو، شۆردنەوەی مێشكو بەلاڕێبردنی كەسانێكی دۆڕاوە لە ژیان، كە هیچ لە مانای ئایینو مرۆڤبوون نازانن، بەڵام ئەوەی لێرەدا گرنگە ئەركی هەموو لایێكە بەتایبەتی لایەنە سیاسیو راگەیاندنو مامۆستایانی ئایینیو رۆشنبیران، بەوپەڕی بوێرییەوە تیشك بخەنە سەر ئەم مەسەلەیە، بۆ ئەوەی هیچ تاكێكی دیكە نەبێتە قوربانی ئەم تێگەییشتنە ناتەندروستو سەقەتو دۆڕاوەو ئەمنو ئاسایشی وڵاتمان پارێزراو بێت، هەروەك پێویستە ململانێی لایەنە سیاسیەكانیش لە چوارچێوەی عورفو كوردبوونەوە دەرنەچێت، چونكە هەر هەڵسوكەوتێكی ناتەندروست هەستی وڵاتپارێزیو نیشتیمانپەروەری لەلای تاكی كورد لاواز دەكات، لە هەمان كاتیشدا ئەركێكی گرنگی هەموو لایەكمانە پشتیوانی تەواوی ئاسایش بكەینو، دژی هەر هەوڵێك بوەستینەوە كە بیانەوێت كەسایەتی هێزەكانی ئاسایشو پۆلیس ناشیرین بكەن. دووبارە داوا لە هەموو هاووڵاتیانو هەموو لایەك دەكەین بەوپەڕی جددی بن لە پارێزگاریكردن لە ئەمنو ئاسایشی وڵاتو، ئەگەر خوانەخواستە ئەمنو ئاسایشمان كەوتە مەترسییەوە، هیچ مانایەك بۆ ژیانو خۆشییەكانی نامێنێت. لە خوای گەورە داواكارین شەهیدەكان بە بەهەشتی بەرینی خۆی شاد بكاتو، شیفای عاجیلی بریندارەكانیش بداتو، وڵاتمان هەر ئارامو بەرەو ئاییندەیەكی باشتر بچێت. یەكێتی زانایانی ئاینی ئیسلامی كوردستان 29/9/2013 |