بەناوی خوای گەورەو میهرەبان شەوی دووشەمە 30/9/2013 لە دوا ئەڵقەی بەرنامەی كەوانەی تەلەفزیۆنی گەلی كوردستان میوانداری مامۆستا عەلی كەلەك كرابوو لەگەڵ پزیشكێك بۆ گفتوگۆكردن لەسەر چارەسەری نەخۆشی، لە ناو بەرنامەكەدا مامۆستا عەلی هێڕشی تووندی كردە سەر مامۆستایانی ئایینی بە گشتی و یەكێتی زانایانو، دوور لە هیچ زانیارییەك بڕیاری لەسەر فیكرو باوەڕو عەقیدەیان دەدا، ئەوە لە كاتێكدا تەواوی مامۆستایانی ئایینی كوردستان مەگەر ژمارەیەكی زۆر كەم نەبێت، هەموویان ئەندامی ئەم رێكخراوەن. بۆیە وەكو لقی هەولێری یەكێتی زانایان بە هەموو لایەكی رادەگەیەنین، مامۆستا عەلی كەلەك هیچ پیشەی مەلایەتی نییەو، مامۆستای ئایینی نییە، نە فەرمانبەری وەزارەتی ئەوقافو نە ئەندامی یەكێتی زانایانو نە پیشەی مەلایەتیشی هەیە، وەك خۆشی رایدەگەیەنێت مامۆستای سەرەتاییە، پێویستە راگەیاندنەكانیش ئەم كەسو بۆچوونانە لەسەر مامۆستایانی ئایینی هەژمار نەكەنو، وەكو مامۆستای ئایینی بانگهێشتییان نەكەن. سەبارەت بە هێڕشو تۆمەتەكانیشی بۆ سەر مامۆستایانی ئایینی كوردستان، ئەوە مافی ئەو هەزاران زانا ئایینیانەی كوردستان حەواڵەی خوای گەورە دەكەینو، خوای گەورە ئاگادارترە لە پاكیو مافی ئەو مێزەر سپیو سنگپڕ قورئانو نێوچەوان بە كڕنۆشانە. هەر لێرەشەوە روونی دەكەینەوە، لە ئیسلامدا هیچ شتێك نییە بەناوی پیشەی پزیشكی ئایینی، ئەمەش ئەركی وەزارەتی تەندروستییە سنوورێك بۆ ئەم جۆرە هەڵسوكەوتانە دابنێت. |