خودێ مهزن د دهرحهقێ (محمد)ی سلاف لێبن دبێژیت: { وَمَا أَرْسَلْنَاك إِلَّا رَحْمَة لِلْعَالَمِينَ } ... بـ ههلكهفتنا روژا ژدایكبونا سهروهرێ پێغهمبهران و ههلگرێ دلوڤانی ورێبازا ئاشتی و دادیێ (محمد)ی سلاف لێبن ولـ روژا دوو شهمبی رێكهفتی 12ی ربیع الأول 1435ێ مشهختی بهرامبهر 13 / 1 / 2014ێ زاینی رێڤهبهریا ئهوقاف وكاروبارێت ئاینی لـ دهوك وئێكهتیا زانایێن ئایینێ ئیسلامێ لقێ دهوك رابوون بـ گێرانا ئاههنگهكا مهزن وبهرفرههـ لـ مزگهفتا (شهید ملا حسێن مارونسی) بـ ئامادهبونا چهند رێڤهبهر وبهرپرس وریسپی وماقیلێن دهوكێ .. لـ دهستپێكا ڤێ ئاههنگێ پهیڤا بخێرهاتنێ هاته پێشكێشكرن ژلایێ ماموستا (ملا دلشاد بێسفكی) پێش نڤێژو گوتارخینێ ڤێ مزگهفتێ تێدا بخێرهاتنا ئامادهبویان كر وئهڤ یاده لـ وان پیروزكر .. ههروهسا چهندین سرودێن ئاینی ژلایێ تیپا (المحمدیه)ڤه هاتنه گوتن .. پاشان پهیڤا ئێكهتیا زانایان لقێ دهوك هاته پێشكێشكرن ژلایێ بهرێز (ملا أنس محمد شریف) سهروكێ ئێكهتیا زانایان لقێ دهوك وئهندامێ پهرلهمانێ كوردستانێ، تێدا پیروزباهی لـ موسلمانێن جیهانێ گشت وموسلمانێن كوردستانێ بـ تایبهت بڤێ یادا پیروز كر و ژخودایێ مهزن خاست بـ ڤێ بیرهوهیێ دلوڤانیا خو بدارێشته سهر ههمی وهلاتێن ئیسلامی وبكهته ئێك دهست وئێك دل .. دیسان پهیڤا رێڤهبهریا گشتی و رێڤهبهریا ئهوقافا قهزا دهوكێ هاته خاندن ژلایێ بهرێز (ملا جهاد حسن بێسفكی) رێڤهبهرێ ئهوقافا دهوكێ، پشتی پیروزباهیكرنێ ئاماژه بـ وێ چهندێ دا كو ئهڤ بیرهوهریا پیروز ببیته وهك خولێزڤرینهك ژ گونههان وبیرا خوه لێ بینین وپهند وشیرهتان ژ ژیانا ڤی كهسێ مهزن وبقهدر وقیمهت وهربگرین و وهك چاڤلێكهر بوخو بزانین ... و لـ دوماهیا ئاههنگێ چهند شریناهی هاتنه بهلاڤهركرن لـ سهر ئامادهبویان ... راگههاندنا ئێكهتیا زانایان |