لـ روژا ئه‌ینی 19 / 9 / 2014 ێ سه‌روكێ هه‌رێما كوردستانێ (مسعود ملا مصگفی بارزانی) سه‌ره‌دانا پارێزگه‌ها دهوكێ كر، هه‌ر لـ هه‌مان روژدا لـ ده‌مژمێر 4:30 ێ ئێڤاری لـ هولا سه‌روكاتیا زانكویا دهوك دگه‌ل هه‌ژماره‌یه‌كا ماموستایێن ئاینی یێن سنوورێ پارێزگه‌ها دهۆكێ جڤیا بـ ئاماده‌بونا به‌رێز فه‌رهاد ئه‌مین ئه‌تروشی پارێزگه‌رێ دهوكێ وبەر‌ێز سمیان عبدالخالق رێڤه‌به‌رێ گشتی یێ ئه‌وقاف وكاروبارێن ئاینی لـ پارێزگه‌ها دهوك و وشاندێ ئێكه‌تیا زانایێن ئاینێ ئیسلامێ لقێ دهوك‌و هه‌ر ئێك ژ رێڤه‌به‌رێ ئه‌وقافا دهوك و زاخو وئاكرێ و شێخان و به‌رده‌ره‌ش وئامێدی وسێمێل)ێ. لـ ده‌ستپێكا ڤێ جڤیانێ سه‌روكێ هه‌رێما كوردستانێ سوپاسیا ماموستایێن ئاینی كر بو به‌رده‌ستكرنا ڤێ ده‌لیڤێ وحازربونا وان .. پاشان جه‌نابێ سه‌روكی باسی كاودانێت نوكه لـ ئیراقێ بگشتی و كوردستانێ بـ تایبه‌ت كر و رولێ پێشمه‌رگه‌هی د سه‌نگه‌ران دا به‌رامبه‌ر هێزێن توندره‌وێن (داعش) نرخاند .. دیسان راگه‌هاند شانازیه‌كا مه‌زنه بۆ پێشمه‌رگه‌ی هێزه‌كا دڕنده تێكبشكێنن كو پێشتر سوپایێ پێشكه‌ڤتیێ دو وه‌لات نه‌شیا لبه‌رسینگێ وان راوه‌ستت، ودیاركر كو گه‌له‌ك پلان و ته‌كتیكێن وان بۆ پێشمه‌رگه‌ی ئاشكرابوینه و نها پێشمه‌رگه ژ حاله‌تێ به‌ره‌ڤانیێ ده‌ركه‌ڤتییه‌و هه‌وا ئازادكرنا ده‌ڤه‌رێن داگیركری ده‌ستپێكرییه و ئێدی تیرۆرست نه‌شێن خوه ل هه‌مبه‌ر هێرشێن پێشمه‌رگه‌ی بگرن .. بارزانی خویا ژی كر: كوردستان د ده‌مێ بوریدا هه‌ر په‌ناگه‌ها لێقه‌ومایان رێزگرتنا وان بوویه، لێ چ جاران نه بووینه پشكه‌ك ژ هه‌ڤركییا پێكهاته‌یێن ئیراقێ. هه‌روه‌سا داخاز ژ ماموستایێن ئاینی كر رێ نه‌ده‌ن گه‌نج به‌ره‌ڤ توند و تیژیێ بچن، ئاماژه‌ژی ب رولێ هه‌ستیارێ ماموستایێن ئاینی د په‌روه‌رده‌كرنا گه‌نجان دا، ل سه‌ر بهایێن بلندێن نشتیمانپه‌روه‌ری و لێبورین و پێكڤه‌ژیانێ ژی كر. لـ دوماهیا كومبونێ به‌رێز (ملا جهاد حسن بێسفكی) رێڤه‌به‌رێ ئه‌وقافا قه‌زا دهوك هاتنا سه‌روكێ هه‌رێما كوردستانێ دڤان كاودانان دا بگرنگ زانی وبخێرهاتنا جه‌نابێ وی كر ودا دیاركرن كو ماموستایێن ئاینی كاریگه‌ریا هه‌ره سه‌ره‌كی بویه د ئارامكرنا ڤان كاودانێت هه‌ستیار وبه‌رفره‌هكرن وگه‌شه‌كرنا مێشكی گه‌نجێن خودا وهه‌رده‌م پێشی هه‌ر كه‌سه‌كی ئه‌ڤ چه‌نده وه‌ك ئه‌رك زانیه .. هه‌ڤده‌م ماموستایێن ئاینی ژی هه‌لویستێن سه‌رۆكێ هه‌رێمێ بلند ل قه‌له‌مدان و ئاماده‌ییا خوه ژی بۆ به‌ره‌ڤانیكرن ژ ئاخا كوردستانێ مل بملێ پێشمه‌رگه‌ی دیار كر راگه‌هاندنا ئێكه‌تیا زانایان / لقێ دهوك ... | 
