روژا ئێكشه‌مبی رێكه‌فتی 4/1/2015ێ لـ هولا كونفرانسان لـ زانكویا دهوك كومبونه‌ك هاته‌ رێكئێخستن بو هه‌ردوو به‌رێزان (فه‌رهاد أمین ئه‌تروشی) پارێزگه‌رێ پارێزگه‌ها دهوك و(ملا عبدالله سعید وه‌یسی) سه‌روكێ ئێكه‌تیا زانایێن ئاینێ ئیسلامێ لـ كوردستانێ د گه‌ل سه‌رجه‌م گوتارخینێن پارێزگه‌ها دهوك ژلایێ رێڤه‌به‌ریا گشتی‌و رێڤه‌به‌ریا ئه‌وقافا قه‌زا دهوك و بهه‌ڤكاری دگه‌ل ئێكه‌تیا زانایان لقێ دهوك بـ ئاماده‌بونا لقین ئاكری و زاخو و شیخان یین ئیكه تیا زانایان و گشت رێڤه‌به‌رێن ئه‌وقافێن قه‌زایێن سه‌ر ب سنورێ پارێزگه‌ها دهوك ڤه‌..

لـ ده‌ستپێكا ڤێ كومبونێ رێڤه‌به‌رێ گشتی یێ ئه‌وقافا دهوكێ بخێرهاتنا جه‌نابێ پارێزگه‌ری وسه‌روكێ ئێكه‌تیا زانایێن كوردستانێ وسه‌رجه‌م گوتارخینان ومێڤانان كرو، یادا ژ دایك بونا پێغه‌مبه‌رێ مروڤایه‌تیێ (محمد) ی سلاڤ ل سه‌ر بن ل هه‌میان پیروزكر.

 پاشان ده‌لیڤه‌ هاته ‌دان بو كاك (فرهاد)ی و پێشكێشكرنا چه‌ند په‌یڤان، تێدا جه‌نابێ پارێزگه‌ری چه‌ند تیشكه‌ك دانه‌ لسه‌ر بارودوخێ نوكه‌ وه‌لاتێ مه‌ تێدا دبوریت وئه‌و ئاسته‌نگ وگرفتاری وزولم وسته‌م وخین رێتن ودژایه‌تیا دهێته‌ كرن دگه‌ل كوردستانا مه‌ بناڤێ ئیسلامێ ژلایێ گروپا توندره‌وا به‌رنیاس بـ (داعش)ڤه‌ وئیسلام دیر ژڤێ چه‌ندێ دیسان رونكرنا ڤێ چه‌ندێ بو خه‌لكێ مه‌ وه‌ك ئه‌ركه‌ك لسه‌ر ملێن ماموستایێن ئاینی قه‌له‌مدا، ولدوماهیا په‌یڤا خو سوپاسیا حازربون وگوهداریا هه‌می لایه‌نان كر..

پاشان ماموستا (ملا عبدالله سعید وه‌یسی) دپه‌یڤه‌كێ دا دوپات لسه‌ر نه‌گونجینا زولم وخرابێن ده‌سته‌كا (داعش) دگه‌ل ئیسلاما پاقژ كرو، گوت: زور په‌یڤ وسه‌رچاوێن ئیسلامی ڤان گروپێن توندره‌و ره‌ش كرینه‌ لپێش چاڤێن خه‌لكی مینا (الجهاد والتعایش السلمی بین كافه‌ الادیان) و چه‌ند بابه‌ته‌ك رونكرن بو حازربویان و وه‌ك بیرئینانه‌ك وه‌ك (موضوع السبی والجزیه‌ وعلاقه‌ المسلم مع غیر المسلم)، و لداویا په‌یڤا خو پێخوشحالیا خو دیاركر بو چاڤپێكه‌فتنا وی دگه‌ل گوتارخینێن پارێزگه‌ها دهوك وهیڤیا سه‌ركه‌فتنێ بو وان خاست..

راگه‌یاندنی لقی دهۆك.

  هـ بالیسانی