سەر لە بەیانی رۆژی چوارشەممە 6/4/2016 لە تەمەنی حەفتاو یەك ساڵیدا پاش ململانێیەكی زۆر لەگەڵ نەخۆشی كەسایەتی كۆمەڵایەتی و ئاینی كەلارو گەرمیان مامۆستا مەلا محمد غیدان قادر بەرپرسی ناوچەی كەلاری یەكێتی زانایانی ئاینی ئیسلامی كوردستان كۆچی دوایی كرد.
مامۆستا مەلا محمد كەسێتیەكی بوێرو بەئەمەك و كۆمەڵایەتی و ئاینی دەڤەرەكە بوو و ساڵانێكی دورو درێژ لەڕێگەی پێشنوێژو وتارخوێنیەوە خزمەتی ئاینی پیرۆزی ئیسلام و موسوڵمانان و هاوڵاًتیانی سنورەكەی خۆی كردووەو هەرلەسەرەتای دروستبوونی یەكێتی زانایانی ئاینی ئیسلامی كوردستان پەیوەندی بەڕێكخراوەكەوە كردووەو ئەندامێكی كارای یەكێتی زانایان بووە و پلەكانی ئەندامێتی و بەرپرسی ڕێكخراو و ئەندامی ناوچەو بەرپرسی ناوچەی لەئەستۆ گرتووەو دڵسۆزانەو ماندونەناسانە و بەرپرسیارانە ئەركەكانی راپەراندووە.
هەر هەمان رۆژ لە مەراسیمێكی شایستەدا بەئامادەبوونی لێپرسراوی لقی گەرمیانی یەكێتی زانایان و كارگێڕو ئەندامانی لقی گەرمیان و ناوچەی كەلارو بەشێكی زۆر لە زانایانی ئاینی و كەسایەتیەكانی دەڤەرەكە لە گۆڕستانی بان ئاسیاو لە زێدی خۆی بەخاك سپێردرا .
بەوبۆنەیەوە لقی گەرمیانی یەكێتی زانایانی ئاینی ئیسلامی كوردستان بەیاننامەی كۆچی دوایی مامۆستای ناوبراوی راگەیاند كە ئەمەی خوارەوە دەقەكەیەتی :
بەناوی خوای بەخشندەی میهرەبان
بەڕەزابوون بەقەدەری پەروەردگار كۆچی دوایی مامۆستا مەلا محمد غیدان قادر بەرپرسی ناوچەی كەلاری یەكێتیەكەمان ڕائەگەیەنین و دواواكارین لەخوای میهرەبان سەبوری زانایانی ئاینی و بنەماڵەو كەسوكاری بدات و جێگای مامۆستاش فیردەوسی ئەعلا بێت.
مامۆستا مەلا محمد مامۆستایەكی ماندونەناس و بەئەمەكی كاروانی خزمەتی رێكخراوەیی یەكێتی زانایانی ئاینی ئیسلامی كوردستان و كوردپەروەرێكی دڵسۆزو خۆنەویست و كەسایەتیەكی كۆمەڵایەتی كەلارو گەرمیان بوو .
زانایان و براو دۆستانی مامۆستا ئاگادار ئەكەین كەپرسەی مامۆستای كۆچكردوو لە مزگەوتی ئیمامی عباسە لە شاری كەلار .
انا لله وانا الیە راجعون
لقی گەرمیانی
یەكێتی زانایانی ئاینی ئیسلامی كوردستان
6/4/2016
دانا مەلا حەمەئەمین – گەرمیان. | 
