بەرەبەیانی ئەمرۆ3ی6ی2020 گەورە بیرمەندو زانای بەناوبانگی وڵاتی میسڕو جیهانی ئیسلامی دکتۆر شێخ محمد فوزەیل ئەلقوسی ئەندامی دەستەی گەورە زانایان و سەرۆکی رێکخراوی جیهانی دەرچووانی ئەزهەرو وەزیری پێشووتری ئەوقافی میسر کۆچی دوایی کرد. بەو بۆنەوە سەرۆکی یەکێتی زانایانی ئایینی ئیسلامی کوردستان پرسەنامەیەک ئاراستەی شێخی ئەزهەر دەکات، ئەمەی خوارەوە دەقەکەیەتی:
بەناوی خوای گەورەو میهرەبان
رێزدار شێخ دکتۆر ئەحمەد طیب شێخی ئەزهەری شەریف
سڵاوی خوای گەورەت لێ بێت
بەداخ و پەژارەیەکی زۆرەوە هەواڵی کۆچی دوایی گەورە نووسەرو زاناو بیریار دکتۆر (محمد عەبدولفوزەیل ئەلقوسی) جێگری سەرۆکی رێکخراوی جیهانی دەرچووانی ئەزهەرو ئەندامی دەستەی گەورە زانایان و وەزیری پێشووتری ئەوقافی میسڕم پێگەیشت.
ناوبراو وێڕای ئەوەی کەسایەتیەکی زانستی و ئەکادیمی بوو، لەهەمان کات ئەو زانا مەزنە هەموو ژیانی خۆی لە پێناو تەدریس و فەتواو نووسینی کتێب خەرج کردو سیمبولێکی دیاری بیری میانڕەوی و وەسەتیەت بوو، بۆیە لەدەستدانی ئەو زانا هەڵکەوتووە کەلێنێکی گەورەو خەسارەتێکی زۆر بوو لەناو پەیڕەوانی رێبازی زانست و شەریعەت، لەگەڵ ئەوەشدا خوالێخۆشبوو کەسایەتیەکی دیندارو خواناس و سادەو سەنگین و خاوەن هەستێکی جوان و رەوشت و بەهای بەرزی مرۆیی بوو، جێگەی دڵنەوایی دەوروبەرو دۆستانی بوو، لەقسەکردنیش لەسەرخۆو قسە خۆش و بەهرەدار بوو.
هاوکات وەک یەکێ لە گەورە زانایانی مەشیخەی ئەزهەر جێدەستی لە پەیوەندی دوولایەنەی نێوان کوردستان و میسڕو زانایانی کوردو مەشیخەی ئەزهەر هەبوو، کە ئەم هەستەی بەرێزیان جێی تەقدیری ئێمەیەو لەچوارچێوەی ئەو هەستە پڕ لە پەیوەندیەی و زانستی و برایەتیەی کە نەخشاندویەتی بەردەوام دەبین.
بەو بۆنە خەمناکەوە بەناوی خۆم و زانایانی کوردستان پرسەو سەرەخۆشی لە بەرێزتان و ئەنجومەنی رێکخراوی جیهانی دەرچووانی ئەزهەر دەکەم، لەخوای گەورە داواکارم خوالێخۆشبوو بخاتە ژێر رەحمەتی خۆی و بەدیداری پێغەمبەران و راستگۆیان و شەهیدان شادی بکات، خوای گەورە سەبرو ئارامی بەهەموو لایەک بەتایبەت خانەوادەکەی ببەخشێت.
انا لله وانا الیه راجعون
د. عبدالله مەلا سەعید گرتکی
سەرۆکی یەکێتی زانایانی ئایینی ئیسلامی کوردستان
11/شەوال/1441هـ
3ی6ی2020 |