وێڕای هاوخه‌می زۆرم بۆ خوێنی هه‌ر تاكێك له میلله‌ته‌كه‌م، هه‌روه‌ها بارگرژی‌و تێكدانی ئارامی‌و ژیانی خه‌ڵك‌و هه‌ر توندو تیژیه‌ك له‌هه‌رلایه‌كه‌وه بێت.. هه‌ر تیخ تیخه‌و هاندان بۆ به‌ره‌و توندوتیژی بردن تا ئه‌و ئه‌ندازه‌ی كه خه‌می وا به‌سه‌ر گه‌له‌كه‌مان دابێت.. ئیدانه‌ی ده‌كه‌م! كورده‌واری خۆمان جوانیان گوتوه كه ده‌ڵێن: (با دێ به‌فر ده‌بات‌و بارانیش دێ به‌فر ده‌بات) كه‌واته: هه‌رهه‌مووی به‌فر ده‌بات!
هه‌ركه‌سێك شتێكی به‌سه‌ر بێت له ناومان (ئینجا له‌هه‌رلایه‌ك بێت).. هه‌ر له رۆڵه‌ی ئه‌م میلله‌ته خێر له‌خۆ نه‌دیوه ده‌ڕوات!
تكایه وه‌زعه‌كه به‌ره‌و ئاراسته‌ی خه‌راپی مه‌به‌ن! (خێرتان ده‌گات) وه‌زع‌و بارو دۆخی كوردستان به‌راورد ناكرێت له‌گه‌ڵ هیچ شوێنێك..،
تكاتان لێ ده‌كه‌م با به‌ده‌ست‌و زمانی خۆمان فیتنه هه‌ڵنه‌گیرسێنین! كوردستانی ئاراممان نه‌شێوێنین! ماڵی خۆمان تێك نه‌ده‌ین! خه‌ڵكی ئاواره‌و ده‌ربه‌ده‌ر نه‌كه‌ین! با چیتر رۆڵه‌ی ئه‌م میلله‌ته (به‌ده‌ستی یه‌كتری) شه‌هید نه‌كرێن! با چیتر چاره‌نوسیان نادیار نه‌كرێت! باچیتر منداڵان بێ باوك نه‌كرێن! چیتر ئافره‌تی گه‌نج بێوه‌ژن نه‌كرێت...!
تكا ده‌كه‌م: ماڵی كورد یه‌كخه‌نه‌وه، نه‌هێڵن كه‌له‌ن بكه‌وته نێوان یه‌ك ریزی گه‌له‌كه‌مان!
هه‌ر به‌م مه‌به‌سته داواده‌كه‌م له مامۆستایانی ئاینی به‌گشتی له وتاره‌كانیان رۆڵی ئیجابی خۆیان (بۆ هێوركردنه‌وه‌ی بارودۆخی ناسكی كوردستان) ببینن (كه دڵنیاشم رۆڵی ئیجابی خۆیان وه‌ك پیشه‌ی هه‌میشه‌ییان ده‌بینن)، هه‌روه‌ها یه‌كێتی زانایان‌و وه‌زاره‌تی ئه‌وقاف‌و هه‌موولایه‌نه سیاسی‌و مه‌ده‌نی‌و كه‌سایه‌تیه‌كان.. رۆڵی ئیجابی خۆیان ببینن (ئینجا: به‌ده‌ركردنی به‌یاننامه یان هه‌ر كارێكی تر).. به‌مه‌به‌ستی پاراستنی برایه‌تی‌و یه‌ك ریزی میلله‌ته‌كه‌مان..بۆ ئه‌وه‌ی بارگرژی سه‌رهه‌ڵنه‌دات (له‌وه زیاتر)!، دوژمنان‌و چاو پێهه‌ڵنه‌هاتوانی ئاشتی‌و ئارامی‌و پێكه‌وه ژیانی (شاهێدی بۆ دراوی) كوردستان دڵیان پێ ئاسووده نه‌بێت‌و پیلانه‌كانیان سه‌ر نه‌گرێت‌و (به‌ڵكو) به‌سه‌ر خۆیان دا بشكێته‌وه..
له كۆتاییدا: ده‌ستی نزا به‌رز ده‌كه‌مه‌وه بۆ (په‌روه‌ردگار) كه بارودۆخی كوردستانمان بۆ چاك بكات، یه‌ك ریزی گه‌له‌كه‌مان بۆ بپارێزیت، میلله‌تی كورد به ئاوات‌و داوای ره‌وای خۆی بگات، خوای گه‌وره شیفا بۆ نه‌خۆش‌و برینداران بنێرێت‌و له قوربانیانیش خۆشبێت‌و سه‌بوری كه‌س‌و كاریان بدات‌و ئه‌م رووداوه دڵ ته‌زێنه(ی 17/2/2011 له سلێمانی) دووایین كاره‌سات بێت كه به‌سه‌ر میلله‌تمان دادێت..
به‌رزو پیرۆزی بۆ دینی(خوا)، سه‌ربه‌رزی بۆ كوردو كوردستان. | 