ئەمرۆ 8ی6ی2022 شاندێکی باڵای ئەنجومەنی ئیسلامی جیهانی زانایانی ئایینی عیراق کە پێکهاتبوو لە بەرێزان شێخ محمد باقر ئەلبدیری سەرۆکی ئەنجومەن و شێخ بیلال ئەلعەبدەلی و شێخ عەلی جەمالی و سەید عەلی موسەوی و شیخ عەبودلموتەلیب ئەلبدیری و مامۆستا جاسم حسێن ئەندامانی ئەنجومەن، سەردانی مەکتەبی تەنفیزی یەکێتی زانایان کردو لە لایەن بەرێز د. عبدالله مەلا وەیسی سەرکی یەکێتی زانایان و مامۆستا مەلا جەلال خەیلانی جێگری سەرۆک و ژمارەیەک لە ئەندامانی مەکتەبی تەنفیزی پێشوازی کران.
سەرەتای دانیشتنەکە شاندی ناوبراو خۆشحاڵی خۆیان بەسەردانی یەکێتی زانایان دەربڕی و سوپاسی ئەو پێشوازیە گەرمەیان کرد کە لەلایەن مەکتەبی تەنفیزیەوە لێیان کرا، دواتر باسیان لە رۆڵ و پێگەو کاریگەری زانایانی کورد بەگشتی و یەکێتی زانایان بەتایبەتی کردو تەئکیدیان لەوە کردەوە، کە پێویستە لەسەر خاڵە هاوبەش و ئامانجە گشتی و پیشەییەکان هەماهەنگ و پەیوەندی بەردەوام هەبێت.
لەلایەن خۆشیەوە بەرێز د. عبدالله مەلا وەیسی سەرۆکی یەکێتی زانایان سوپاسی شاندی ناوبراوی کردو خۆشحاڵی خۆی دەربڕی و پوختەیەکی لە دۆخی کوردستان لەرووی پێکەوەژیانی ئایینی و نەتەوەیی باس کردو ئاماژەی بەوەدا کە خاڵی هاوبەش لە نێوان و هەردوولا زۆرن، کە زەمینەی راوێژو هەماهەنگی و پێکەوە کارکردن لەسەر بنەما گرنگەکانی سەقامگیری و ئاشتی کۆمەڵگەو بڵاوکردنەوەی پەیامی میانڕەوی خۆش دەکەن.
هەروەها باسی لەوە کرد کە پێکەوەژیان لە کوردستان قەناعەتەو هەڵقوڵاوی ئاستی تێگەیشتنی تاکی کورد، لە رێز لە پێکهاتەو مەزهەب و بیرو ڕای جیاواز دەگرێت و وەک بەهایەکی گرنگ لێی دەڕوانێ، ئەمەش دەگەڕێتەوە بۆ رۆڵی زانایانی ئایینی لە هۆشیارکردنەوەی کۆمەڵگەو پەروەردەیەکی دروست و بڵاو کردنەوەی بیری میانڕەوی و هەستی یەکتر قبوڵکردن. هەر وەک ئاماژەی بە پەیوەندی دۆستانەی نێوان زانایانی کوردو عیراق داو تەئکیدی لە هەماهەنگی پەیوەندی دۆستانەی نێوان هەردوولا کردەوە. |