ئەمرۆ 13ی4ی2023 بەرێز د. عبدالله مەلا وەیسی سەرۆکی یەکێتی زانایان بە ئامادەبوونی بەرێزان مامۆستا مەلا جەلال خەیلانی جێگری سەرۆک و ژمارەیەک لە ئەندامانی مەکتەبی تەنفیزی و بەرپرس و کارگێرانی لقی هەولێری یەکێتی زانایان؛ پێشوازیان لە بەرێز سەربەست لەزگین ئەندامی مەکتەبی سیاسی و بەرپرسی مەکتەبی ڕێکخستنی پارێزگای هەولێری(پ.د.ک)، شاندی یاوەری بەڕێزان ئاری نانەکەلی و چیا هەرکی کرد.

لە دانیشتنێکدا هەردوولا باسیان لە رۆڵ و پێگەی زانایانی ئایینی لە خزمەتی ئیسلام و بزاڤی نەتەوەیی و قوڵکردنەوەی گیانی نیشتمانپەروەری و سەقامگیری کۆمەڵگەو بڵاوکردنەوەی پەیامی میانڕەوی و برایەتی و تەبایی و بەرەنگاربوونەوەی بیری توندڕەوی کرد.

لەلایەن خۆیەوە بەرێز سەربەست لەزگین وێڕای خۆشحاڵی دەربڕین بە سەردانی بۆ یەکێتی زانایان، ئاماژەی بە هەڵوێست و کاریگەری ماۆمستایانی ئایینی کردو گوتیشی لە بزاڤی رزگاریخوازی نەتەوەیی مامۆستایانی ئایینی شەریحەیەکی گرنگ و پاڵپشتیەکی گەورەی قەزیەی کورد بوون، لەرووی کاری خۆیان و خزمەلایەتی کۆمەڵایەتی و لێبوردەیی و پێکەوەژیانی ئایینی و ئاشتیانە خزمەتیان دیارە، بۆیە هەمیشە جێگەی رێزو تەقدیری زۆرن.

دواتر بەرێز سەرۆکی یەکێتی زانایان وێڕای سوپاس و خۆشحاڵی بە سەردانی بەرێزیان، پوختەیەکی لە کارو هەنگاوەکانی یەکێتی زانایان و دۆخی ئێستای مامۆستایانی ئایینی و رەوشی ئایینی لە هەرێمی کوردستان باس کردو ئاماژەی بەوە دا کە یەکێتی زانایان لەسەر هەرسێ رەهەندی ئایینی و نەتەوەیی و پیشەیی خزمەت دەکات و ئامادەی هەر هەنگاوێکە لەخزمەتی ئیسلام و موسڵمانان و نیشتمان بێت.