ئەمرۆ 2ی7ی2023 بەرێز د. عبدالله مەلا وەیسی سەرۆکی یەکێتی زانایان بە ئامادەیی مامۆستا مەلا جەلال خەیلانی جێگری سەرۆک و ژمارەیەک لە ئەندامانی مەکتەبی تەنفیزی و سەرکردایەتی یەکێتی زانایان پێشوازی لە شاندێکی مەتڕانەکانی مەسیحی کە پێکهاتبوو لە بەرێزان: مەتران بەشار متی وردە سەرۆکی ئەساقیفەی هەولێری کلدانی و، مەتران نیقودیموس داود سەرۆکی ئەساقیفەی سریانی ئوثدوکس لە کوردستان و موسڵ و کەرکروک و، مەتران ابرس یوخنا مەترانی کەنیسەی رۆژهەڵاتی ئاشوری و مەتران نثنائيل نزار مەترانی کەنیسەی سریانی کاسۆلیک لە کوردستان و، خالد جەمال ئەلبێر بەرێوەبەری گشتی کاروباری مەسیحیەکان لە وەزارەتی ئەوقاف و، امیل اسطيفان ملحم راوێژکاری وەزری ئەوقاف و مامۆستا فەهمی صليوه بەرێوەبەری پەروەردەی دەوروبەر کرد، کە بە مەبەستی پیرۆزبایی جەژنی قوربانی پیرۆز لە موسڵمانان و زانایانی ئایینیەوە هاتبوون.
لەدەسپێکدا سەرۆکی یەکێتی زانایان وێڕای بە گەرمی بەخێرهێنان، خۆشحاڵی خۆی بە سەردانەکەی بەرێزیان دەربڕی و ئاماژەی بەوە کرد کە سەردانی لەم شێوە بەرهەمی ئەو پێکەوەژیانەیە لەکوردستان هەیەو ئەرکی هەموو لایەکە کار لەپێناو زیاتر قوڵکردنەوەی بکەین، هەروەها باسی لە بایەخدانی ئیسلام و رۆڵی زانایانی ئایینی لە پتەوکردنی پەیوەندییەکان و ئاشتی کۆمەڵایەتی و پێکەوەژیانی ئایینی کردو هیوای خواست جەژن بۆ هەموو کوردستان ببێتە مایەی برایەتی و بەردەوامی ئاشتی و سەقامگیری.
دواتر شاندەکە وێڕای خۆشحاڵی و سوپاسی پێشوازی گەرمی یەکێتی زانایان، پیرۆزبایی جەژنی قوربانیان ئاراستەی یەکێتی زانایان کردو، رایانگەیاند؛ هەست بە خۆشی و گرنگی ئەم پێکەوەژیانە دەکەین و پێویستیشە هەمووان کار بکەین بۆ بەردەوامبوونی ئاشتی و پێکەوەژیانی ئایینی لەکوردستان.
هەر لە دیدارەکەدا باس لە گرنگی هەماهەنگی پەیوەندی دوولایەنەو رۆڵی پیاوانی ئایینی لە بەهێزکردنی بنەماکانی پێکەوەژیانی ئاشتیانە و بەها هاوبەش و ئینسانیەکان کراو، دوا پێشهاتەکانیش گفتوگۆی لەبارەوە کراو هەردوولا هاوڕابوون لەوەی سوکایەتی بەرامبەر پیرۆزییەکان و بەتایبەت ئەو کردەیەی لە وڵاتی سوید ئەنجام درا قبوڵکراو نین و پێویستە ئیدانە بکرێن. |