سەبارەت بە پرۆژە پێشنیاری هەمواری یاسای باری کەسی لە عیراق، کە ئێستا لە پەرلەمانی عیراق هەوڵی تێپەڕاندنی دەدرێت و دووجار خراوەتە بەرنامەی کار بە ئامانجی خوێندنەوەو پەسند کردنی، ئەمەش نیگەرانی زۆری بەدوای خۆیدا هێناوە.

لەم بارەوە بەرێز مەلا عبدالله شێرکاوەیی وتەبێژی یەکێتی زانایان رایگەیاند: یەکێتی زانایانی ئایینی ئیسلامی کوردستان بەدواداچوونی ورد بۆ هەموو ئەو پرسانە دەکات کە رەهەندی ئایینیان هەیەو پەیوەستن بە باری کەسی و کاروبارەکانی خێزانەوە، دوای تاوتوێکردنی پرسی هەمواری یاسای باری کەسی گەیشتینە ئەو ئەنجامەی، کە یاسای باری کەسی ژمارە 188ی ساڵی 1959 وەک یاسایەکی بەرکارو وەرگیراو لە شەریعەتی ئیسلامی توانیویەتی کاروبارەکانی پەیوەندیدار بە خێزان رێک بخات و کێشەو هاوسەنگی و یەکڕیزی نێوان پێکهاتەکان بە جیاوازیی مەزهەبی و نەتەوەیی و کلتوری رابگرێت و، وەک یاسایەکی مەدەنی مامەڵە لەگەڵ هاوڵاتیان بکات و سەقامگیری و شیرازەی خێزان بپارێزێت، وە هیچ پێویستی و بۆشاییەکی یاسایی نەهاتۆتە پێش تا هەموار بکرێتەوە، لەم سۆنگەوە تێڕوانینمان وایە ئەم پرۆژە پێشنیارە خزمەت بە کۆمەڵگەو خێزان ناکات و لێکەوتەی خراپی بۆ عیراق و کوردستان لێدەکەوێتەوەو مەبەستی تری لە پشتەوەیە، لەبەر ئەوە لەگەڵ ئەم پرۆژە پێشنیارەی هەموارکردنەوەی یاسای باری کەسی نین و، داواش لە لایەنی پەیوەندیدار دەکەین بە هەستکردن بە بەرپرسیارێتی کاری پێویست ئەنجام بدەن.