به‌ پێی به‌رنامه‌ی دامه‌زراوه‌ی فه‌رهه‌نگی ئیمام خومه‌ینی، زانایانی ئایینی هه‌ردوو مۆزه‌خانه‌ی شه‌هیدان‌و كۆنه‌ سه‌فاره‌تی ئه‌مریكایان به‌سه‌ر كرده‌وه‌.

ئه‌مرۆ سێشه‌ممه‌ 21/12/2010 له‌ گه‌ره‌كی شه‌هیدانی په‌یامانی پایته‌ختی تاران شاندی زانایان چوونه‌ مۆزه‌خانه‌ی ناوبراو‌و، سه‌ره‌تاش له‌ هۆڵی مۆزه‌خانه‌ كۆبوونه‌وه‌یه‌ك ئه‌نجامدرا، كه‌ تێیدا ئه‌بو جه‌واد نه‌جه‌فی راوێژكاری ئه‌و دامه‌زراوه‌یه‌ تیشكی خسته‌ سه‌ر گرنگی ئه‌و جۆره‌ به‌ یه‌ك گه‌یشتنانه‌ی شاندی وڵاتان له‌ تاران، دواتریش له‌ پێناسه‌ی مۆزه‌خانه‌كه‌دا گوتی: ئه‌و موزه‌خانه‌یه‌ دیكۆمێنتی هه‌موو سته‌م لێكراوێكی ئه‌و وڵاته‌ی له‌خۆ گرتووه‌ به‌ جیاوازی مه‌زهه‌ب‌و ره‌گه‌زه‌وه‌.

دوای به‌سه‌ر كردنه‌وه‌ش زانایان له‌ په‌یامی خۆیاندا له‌ هۆڵی كۆبوونه‌وه‌، ره‌خنه‌یان له‌وه‌ گرت كه‌ بۆچی په‌تی سێداره‌ی سه‌ركرده‌ قازی موحه‌ممه‌د، یان هه‌ر شتێكی تر، كه‌ ته‌عبیر له‌و سته‌مه‌ی به‌ ده‌ستی ده‌سته‌ڵاتدارانی سه‌رده‌می شا له‌ كورد كرا، له‌و مۆزه‌خانه‌دا نیه‌.

له‌و باره‌شه‌وه‌ به‌رێز شێخ باسیت بالیسانی له‌ لێدوانێكی بۆ ماڵپه‌ری زانایان گوتی: ئێمه‌ ره‌خنه‌مان له‌وه‌ گرت كه‌ بۆ شتێكی وا له‌و مۆزه‌خانه‌ دانیه‌ ته‌عبیر له‌ مه‌زلومیه‌تی سه‌ركرده‌ی كورد قازی موحه‌مه‌د بكات، ئه‌وانیش گوتیان ئێوه‌ راست ده‌كه‌ن به‌ڵام تا ئێستا كه‌س بۆ ئێمه‌ی نه‌هێناوه‌ تا دایبنێین، هه‌ر كاتیش هه‌ر شتێكی قازیمان بگاته‌ ده‌ست به‌ شانازیه‌وه‌ له‌و مۆزه‌خانه‌ی داده‌نێین.

پاشان شانده‌كه‌ سه‌ردانی باڵه‌خانه‌ی كۆنی سه‌فاره‌تی ئه‌مریكایان كرد، كه‌ له‌سه‌رده‌می شا هه‌بووه‌‌و له‌گه‌ڵ سه‌رهه‌ڵدانی ده‌سته‌ڵاتی ئیمام خومه‌ینی به‌كۆتا هاتووه‌، به‌ڵام تێكڕای شته‌كانی ئه‌وسای سه‌فاره‌تی ئه‌مریكی هه‌ر ماون‌و له‌و باڵه‌خانه‌دا پارێزراون.