"نوری مالیکی سه‌رۆکوه‌زیرانی حکومه‌تی عێراق، له‌کۆبوونه‌وه‌یه‌کدا له‌گه‌ڵ فراکسیۆنه‌که‌ی، ئه‌مڕۆ هه‌ینی رایگه‌یاندووه که سه‌رکرده کورده‌کان له به‌غدا میوانن‌و کاتی ئه‌وه هاتووه ده‌ستی هه‌ندێکیان ببڕدرێت.”1
مالیكی عەرەبێكی درۆزن نییه چونكا پێت دەڵێ : سفرەی تو كوردستانە!؟
لەم چەند رۆژەی دواییندا و به هۆی لاوازیی پێَوەندییەكانی (كورد – ئامریكا) بەو پێیەی زۆر یەك لە بەڵێنەكانی خۆیان بۆ پاراستنی كورد فەرامۆش كردووە و بە هۆی نەبوونی پلانی تۆكمە و كارا بۆ ساخكردنەوەی پەیكەرەی كورد و جوغرافیا و دەسەڵاتەكەی، كە جاری وایە بەغدا ماڵی كوردە و كورد دەیپارێزێ و جاری وایشه مانەوەی كورد بە میوانیش لەو پێتەختە سپڵەیەدا مەترسییە بۆ سەر كەرامەتی ئێمە، بریار و بەڵێنی هەژدیهایەكی بەدەستی خۆمان گەرمكراوە دەبیسترێ كە هەرەشەی كوشتنمان دەكات.
كێ ناڵێ وەكو "احمد چلبی" خوا سەری لێ نەشێواندبێت و نانی شوان نەخوات یان كۆتایی هاتبێت و بیهەوێ ناوێك لە مێژووی عێراقدا وەكو سەرۆكەكانی رابردووی خۆی تۆمار بكات بۆ ئەوەی رەخنە لە جەنابیان نەگرن كە تۆ ئەگەر پیاوەتیشت بووبێ ئەوا لە هێز و جەربەزەی كورد و سەرۆكەكەیانەوە سەرچاوەی گرتبوو.
بەم داستانەی جەنابی مالیكیدا بیرم بۆ لای "ئاتاتورك"چووەوە، كە چۆن هێندە زیرەكانە لە هێزی كورد، دەسەڵات و شكۆمەندیی بۆ خۆی و نەتەوەكەی بنیات نا، بێ ئەوەی پەیامی "پانتوركیزم"ی خۆی لە بیر كردبێت، كە بۆ هێشتنەوەی تورك دەبێ كورد و رەگەزەكانی تر قوربانی بن... قوربانییەكی هەمیشەیی و ئەم نەریتەشیان بۆ ناو عەرەبەكانی جێگرەوەی خۆیان و بە تایبەت بەعسی و شێوە بەعسییەكانی وەك مالیكی و بەشدارانی كۆبوونەوەكەی هەینیی رابردوو ( 16/9/2011)گواستەوە.
سەعدییە و جەلەولا : سەرەتای تاقیكاریی مەزنی عەرەبی دێمۆكراتە!
"به پێی سایتی “ساحه التحریر”، رۆژێک دوای کۆبوونه‌وه‌که‌ی هه‌ولێر، هێزه‌کانی هاوپه‌یمانی نیشتمانی له کۆبوونه‌وه‌یدا به سه‌رۆکایه‌تی ئیبراهیم جه‌عفه‌ری سه‌رکرده‌ی ره‌وتی چاکسازیی‌و به ئاگاداری نوری مالکی و عادل عه‌بدولمه‌هدی‌و چه‌ند به‌رپرسێکی تر کۆبوونه‌ته‌وه، سه‌باره‌ت به هه‌رێمی کوردستان و به‌تایبه‌تی مه‌سعود بارزانی. هه‌ندێک له‌وسه‌رکردانه، تازه گه‌ڕاونه‌ته‌وه له ئێران‌و چاویان به‌هه‌ریه‌که له عه‌لی لاریجانی سه‌رۆکی ئه‌نجومه‌نی شوراو جه‌نه‌ڕاڵ قاسم سلێمانی به‌رپرسی دۆسیه‌ی عێراق له سوپای پاسدارانی ئێران که‌وتووه."2
بە گوێرەی ئەم هەواڵانە ئێمە دەبێ ئامادەی شەڕە گەورەكەی باشوور بین، شەڕێك كە ئەگەر بە لاوازیش بیكەین باشترە لەوەی ببینین، ئەوان فێر بكرێن چۆن كێشەكانیان وەلانێن و بگەڕێنەوە سەر مێزی دانوستانەكانی "سەعدئاباد" و جەزایر... كە كورد و بێبەشكردن و قڕكردنی لە دەستووری كاریاندا بێت.
ئەم هەواڵەی دوایین بۆنی خەیانەتی ئاشكرای مالیكی بە سەرۆك بارزانی و بۆنی دروستبوونی یەكیەتییەكی گەورەی عێراقییانە لە دژی كورد دەدات و گومانی تێدا نییە بە ناوهێنانی "قاسم سلێمانی" و لاریجانی، بودجەیەكیش بە مەبەستی كورد قڕان تەرخانكراوە و پارەكەشی "بەیتی رێبەری"ی رژێمی ئێران دەیدات!
لە هەواڵەكەشدا زۆرزانییەك دیارە كە لە لایەن جەنابی مالیكی بۆ دروستكردنی درزێك لە دیواری ماڵی كورددا كراوە.
سه‌رچاوه‌یه‌کی نزیک له‌سایتی “ساحه التحریر” رایگه‌یاند که مالکی له کۆبوونه‌وه‌که‌دا به توندی له‌سه‌ر قسه‌کانی بارزانی هه‌ڵوێسته‌ی کردووه، به‌ڵام وه‌سفی هۆشیار زێباری وه‌زیری ده‌ره‌وه‌ی عێراقی کردووه."لە هەمانكاتیشدا باسی لە ناپاكیی وەزیرێكی كورد كردوە، كە جاسووسی ماڵی مالیكییە و ئێمەش دەتوانین هەر بەو وتەیەی جەنابی مالیكی ئەو وەزیرەی پێدەربخەین یان شەرمەزاری بكەین كە بۆچی دەیهەوێ ماڵی كورد و ریزەكانی تێك بدات.(3)
ئەمەش لە وتەی سەرۆكە نهێنییەكانی مالیكی لە قوم مەشهەد دەچێت، كە ئێمەی رۆژهەڵاتی ئاشنای هەڵسوكەوتی ئەوانین، كە چۆن بە سانایی و بە قسەی خۆش دیواری كورد دەڕووخێنن و بۆیەش سەرۆكایەتیی هەرێم و بەرپرسانی كورد لە بەغدا و بەرپرسانی ئۆپۆزیسیۆنیش ئاگادار دەكەینەوە، لە بەرانبەر عەرەبدا هۆشیار و یەكگرتووبن و جارێكیتر و ئەمجارەیان بۆخۆتان ماڵیان هەرەس پێ بێنن و بیانهێننەوە بۆ هەولێر، بۆ ئەوەی دان بە گەورەیی و مافە بێ ئەملاوئەولاكانی كورددا بنێن.
دیارە راكێشانی سوپای كورد بۆ سەعدییە لەگەڵ ئەوەیدا بانگەشەی جەنگێكی نهێنی بۆ شكانی كورد – بەدەستی مالیكی و بە سەركردایەتیی ئێران و لەوانەیە تورك و ئیسلامییە توندڕەوەكانی برایان – بووبێت، باسێكی تازەشی خستە ناو شەقامی عەرەبی عێراقەوە كە مەترسیی بە كۆیلەكردنی ئێوە لە لایەن ئامریكا و نەتەوەیەكگرتووەكانەوە بە دەستی كورد لە ئارادایە و ئێوە نابێ بێدەنگ و پەرتەوازە دانیشن. ئەمەش تاقیكارییەكی شكستخواردووی مالیكی و دۆستانی ناوخۆ و دەرەوەی بوو، چونكا نە كورد داردەستی ئامریكا و نەتەوەیەكگرتووەكانە و نەمالیكیش ئەو پیاوەیە بتوانێ رۆحی مردووی شكستخواردووی عێراقچێتیی (سوننە و شێعە بە تێكڕایی) زیندوو بكاتەوە و عێراقی ئەنفالچیی هەشتاكانی پێ ساغ بكاتەوە... ئەو عێراقەی قەت نابێتەوە و توركیا و ئێرانیش چاولێكەری - ی دوای هاتنە ئارای بەهاری تورك و ئێرانی - و بەمۆدێلكردنی عێراق بۆ هەڵوەشانەوەی دواجاری دوو ئێمپراتوورییەكەیان، بە دوایین تراژێدیای پێش چاوی خۆیان و مەرگی خەونە ترسناكەكانیان دەزانن. بۆیە هێندە ماندوو و سەرقاڵی كزكردنی لۆبیی كوردن.
ژێدەر:
http://www.anews.blogsky.com/1390/06/26/post-754/ | 