له‌م ژیان‌و دونیایه‌دا زۆر كه‌من ئه‌و كه‌سایه‌تی و مه‌ردانه‌ی كه بوونه‌ته چرای ڕوناكی ناو تاریكایی كه‌نده‌ڵان‌و تونێله‌كانی ژیان‌و مێژوو، له مێژووی دێرین‌و نوێی مرۆڤایه‌تیماندا ئێجگار ده‌گمه‌نن ئه‌و ڕه‌مزو پێشه‌نگانه‌ی كه به‌شێك له لاپه‌ڕه‌كانی مێژووی مرۆڤایه‌تییان جوان كردووه‌‌وبه گوفتار و كرداره چاك‌و پاك‌و جوانه‌كانیان ڕازاندوویانه‌ته‌وه، زۆر كه‌م ده‌بینرێن ئه‌و سه‌ركرده و پێشه‌وایانه‌ی كه لاپه‌ڕه‌كانی ژیانیان پڕ و لێوانلێو بن له وشه‌‌و دێڕ‌و داستان و هه‌ڵوێستی مه‌ردانه‌‌ودلێرانه، گه‌لێك دانسقه‌ن ئه‌و مه‌ردانه‌ی كه به خه‌بات و خزمه‌ت‌و ئاكار و هه‌ڵوێسته جوان و ناوازه‌كانیان، ڕێڕه‌وی ژیانی مرۆڤایه‌تییان گۆڕیوه و به‌شێك له كاروانی مرۆڤایه‌تییان له هه‌ڵدێر‌و زۆنگاوه‌كانی گومڕایی‌ونه‌زانی و سه‌راب وتراویلكه‌كانی نه‌فامی‌و ئاره‌زووه‌كان پاراستووه، به كردار‌و گوفتار‌و هه‌ڵوێسته‌كانیشیان ئاسۆكانی ژیانی سه‌ربه‌رزانه‌‌و به‌خته‌وه‌رانه‌یان نیشانداون، زۆر كه‌مینه‌ن ئه‌و سه‌ركرده‌‌و پێشهواو پێشه‌نگانه‌ی كه بوونه‌ته هه‌وێنی مه‌یینی ژیان و مێژووی گیرسانی خه‌باتی خه‌باتكاران، كه به ئه‌نجامدانی خه‌بات‌و خزمه‌ته‌كانیان منه‌ت ناكه‌ن به‌سه‌ر گه‌ل‌وشوێنكه‌وتووه‌كانیاندا‌و خه‌بات و خزمه‌ت و كاره‌كانی ڕابردووی خۆیان ـ به زیاده‌وه ـ پێ نافرۆشنه‌وه.
له نێوان ئه‌و پێشه‌نگ‌و سه‌ركرده‌‌و كه‌سایه‌تییه كه‌م و ده‌گمه‌ن و دانسقانه‌ی مێژووی مرۆڤایه‌تی به گشتی و مێژووی بڕواداران و په‌یامداران و بانگخوازانیشدا به تایبه‌تی، به‌و په‌ڕی بڕوا‌و متمانه‌وه ده‌توانین بڵێین كه: مامۆستا (سه‌عیدی نه‌وڕه‌سی) یه‌كێكه له دیارترین‌و گه‌وره‌ترین‌و ده‌گمه‌نترین‌و دانسقه‌ترینی ئه‌و سه‌ركرده‌‌و پێشه‌وا مه‌رد‌و دلێر‌و كه‌سێتییانه‌ی كه ڕووخساری به‌شێكی زۆر له ڕۆژ‌و لاپه‌ڕه‌كانی مێژووی گۆڕی، مێژووی خه‌بات له پێناو گه‌ل‌و نیشتیماندا، مێژووی خه‌باتی ده‌عوه و په‌یامداری و ئیسلامخوازی و قوربانیدان له پێناو بیر و باوه‌ڕه‌كه‌یدا، قوربانیدان به ماڵ و سامان و خزم و كه‌س‌و گیان‌و ژیان و خۆشگوزه‌رانی.
ئه‌و مه‌رده نه‌به‌رده ـ به درێژایی ژیانی ـ هه‌ڵوێستی زۆر مه‌ردانه‌ی نواند و چرای ڕووناككردنه‌وه‌ی ژیانی تاریكی ناو تونێله‌كانی خه‌ڵكی هه‌ڵكرد، ئه‌و پێشه‌وا ڕاسته‌قینه‌یه (به چرای ڕوناكی په‌یامداری و بانگخوازی و ئیسلامخوازی) به ئیلهام وه‌رگرتن له ئایه‌ته‌كانی قورئان‌و فه‌رمووده شیرینه‌كانی پێغه‌مبه‌ری خۆشه‌ویست ـ درودی خوای لێبێت ـ سه‌رلێشێواوه‌كانی سه‌ر توله‌ڕێگه‌كانی خسته‌وه سه‌ر ڕاسته شه‌قامی هیدایه‌ت‌و خواپه‌رستی‌و خواناسی ڕاسته‌قینه، هه‌روه‌ها فێری وانه‌كانی كۆڵنه‌دان و نه‌ته‌وه‌دۆستی و خواویستی و نیشتیمان په‌روه‌ری و بۆخوا ژیانی كردن.
به‌دیعوززه‌مان مامۆستا سه‌عیدی نه‌وڕه‌سی، به ژیانی پڕ به‌ره‌كه‌تی بانگخوازانه و په‌یامدارانه‌ی خۆی، ڕۆحی دین و دینداری به كرده‌یی باسكرد‌و جێبه‌جێی كرد، ئه‌و سه‌ركرده خواناس و پێشه‌وا كۆڵنه‌ده‌ر‌و هیممه‌ت به‌رزه، به وته و بریسكه‌‌و نووسین‌و په‌یامه نورینه پڕ چێژه‌كانیشی، له‌زه‌ت‌و چێژی دینی پێ چه‌شتین‌و تامه‌زرۆی دینداری‌و خواناسی‌و دڵسۆزی‌و بۆخواصوڵحانی كردین.
مامۆستا نه‌وڕه‌سی، پیاوێكه كه خه‌می ژین و دین و دونیا و قیامه‌تی خه‌ڵكی و گه‌له به‌شمه‌ینه‌تی و سته‌ملێكراوه‌كه‌ی، خه‌و‌و خۆراسی له چاوی تۆراند‌و له‌و پێناوه‌شدا (ئارامگرانه و كۆڵنه‌ده‌رانه) ئه‌شكه‌نجه‌‌و ئازار‌و ئاواره‌یی و ده‌ربه‌ده‌ری زۆری چه‌شت و مه‌ینه‌تی زۆری قبوڵكرد.
نه‌وڕه‌سی به‌دیعول ززه‌مان، باوه‌ڕدارانه‌‌و موخلیصانه و دڵسۆزانه گه‌وره‌ترین و زۆرترین قوربانی به‌خشی له پێناوی خزمه‌ت به دین‌و ژینی گه‌له‌كه‌یدا، هیچ كاتێكیش سه‌ركزی‌و چاو شۆڕی‌و زه‌لیلی به‌رده‌م سته‌مكارانی قبوڵ نه‌كرد‌و به‌رده‌وام وشه‌ی حه‌ق‌و ڕاستی له به‌رده‌م پێشهواو ده‌سه‌ڵاتداره سته‌مكاره‌كاندا ده‌وته‌وه، به‌رامبه‌ر سته‌م‌و ناعه‌داله‌تی سته‌مكاران‌و ده‌سه‌ڵاتدارانیش بوێرانه و ڕاوه‌ستاوانه و پایه‌دارانه ده‌وه‌ستایه‌وه.
مامۆستا نه‌وڕه‌سی، له لاپه‌ڕه دره‌وشاوه و نورینه‌كانی (ڕه‌سائیلی نور)دا، گه‌لێك ڕیساله و په‌یامی گه‌وره و گرنگ و جوانی فێركردین، وته‌ی جوان‌و بریسكه‌ی ئیمانی به‌خشییه چاو و دڵمان، ده‌رونمانی ڕوناك كرده‌وه، تینوویه‌تی دڵمانی شكاند، برسییه‌تی ڕۆحمانی كه‌م كرده‌وه، وه‌شت و نمه‌ی خۆشه‌ویستی‌و عیشقی خواناسی بارانده سه‌ر مه‌زرای دڵی وشكهه‌ڵاتوومان، تامه‌زرۆی به‌ندایه‌تی‌و ملكه‌چی‌و خواپه‌رستی زیاتری كردین، بڕستی كۆڵنه‌دان‌و نه‌فه‌س درێژی‌و به‌رده‌وامی خه‌باتی بانگخوازانه‌‌و نیشتمانپه‌روه‌رانه‌‌و نه‌ته‌وه‌دۆستانه‌ی پێ خه‌ڵات كردین.
دواجار‌و له كۆتاییدا ده‌توانین بڵێین كه: مامۆستا نه‌وڕه‌سی، له ڕێی ژیان‌و نووسین‌و هه‌ڵوێسته جوان‌و گه‌وره‌‌و گرنگه‌كانییه‌وه، هه‌روه‌ها له ڕێی نوری دینداری‌و خواناسی و خوادۆستییه‌كه‌یه‌وه، له ڕێی نووسین و په‌یامه‌كانی‌وخزمه‌ته كه‌م وێنه‌كه‌یه‌وه، هه‌روه‌ها به ئاواره‌یی و زیندانی بوون‌و ئه‌شكه‌نجه‌كانی، ته‌مه‌نی جاویدانی‌و نه‌مری له دونیادا بۆ خۆی ده‌سته‌به‌ر كردووه، پشت به خوا له دواڕۆژیشدا یه‌كێكه له‌سه‌ر قافڵه‌ی خه‌باتكاران‌و موجاهیدان‌و تێكۆشه‌رانی خواناسی‌و پێشه‌نگی كاروانیانی به‌هه‌شت ده‌بێت، له‌وه‌ش زیاتر (ان شا‌والله) شه‌ره‌فی خه‌ڵات و مه‌دالیا و تاجی زێڕینی (شه‌هیدی‌و پیاوچاكی‌و ڕاستگۆیی) پێده‌به‌خشرێ‌‌و ده‌بێته دراوسێی زۆر نزیكی پێغه‌مبه‌ران ـ سه‌لامی خوایان لێبێت ـ و نوێنه‌ر و وه‌فدی گه‌لی كوردی موسڵمانی سته‌ملێكراو‌و ماف زه‌وتكراو، له‌وێ‌‌و له ساحه‌ی مه‌حشه‌ر‌و له‌به‌رده‌م عه‌رش‌و له خزمه‌تی په‌روه‌ردگاردا ـ وه‌ك نوێنه‌رێكی دڵسۆز‌و ڕاستگۆ‌و ئه‌مین ـ شه‌كوا‌و سكاڵای موسڵمانان به گشتی‌و گه‌له‌كه‌ی به تایبه‌تی ده‌گه‌یه‌نێته لای په‌روه‌ردگاری دادپه‌روه‌ر‌و مافسێنی سته‌ملێكراوان، هه‌روه‌ها له ڕاپۆرته‌كه‌یدا ئاهو نزوله‌ی جه‌رگ سوتاوان‌و خه‌می گه‌وره‌ی خه‌مداران‌و بێ نازی هه‌ژاران و ده‌ردی ده‌رده‌دارو بێ نه‌وایان باسده‌كات.
ئه‌و سه‌ركرده‌‌و پێشه‌وا گه‌وره‌‌و ده‌گمه‌ن‌و دانسقیه، پێویسته هه‌موو لایه‌كمان بیكه‌ینه قدوه‌‌و پێشه‌نگی خۆمان و په‌ند‌و وانه‌ی لێوه فێرببین، به تایبه‌ت بانگخوازان‌و مۆژیاریكاران و زانایانی ئایینی، چونكه وه‌ك ئاشكرایه كه ئه‌و زاته مه‌زنه هه‌موو ئه‌و كارانه‌ی به به‌رگ‌و پۆشاكی زاناییه‌وه ئه‌نجام داوه‌‌و سومعه‌‌و ناوبانگی مێزه‌ره‌كه‌ی به سپییه‌تی‌و بوێری هێشته‌وه‌‌و ڕووسورانه گه‌ڕایه‌وه باره‌گای خوای میهره‌بان.
خوای گه‌وره بیخاته به‌ر ڕه‌حمه‌تی فراوانی خۆیی‌و مه‌قامه زۆر به‌رز‌و بڵنده‌كانی به‌هه‌شتی پێ ببه‌خشێ‌‌و له‌و دونیا هه‌تاهه‌تاییه‌دا ئاسوده‌ی بكات‌و ماندووون و زه‌حمه‌ت و ڕه‌نج و ئازاره‌كانی ئه‌م دونیایه‌ی له‌بیر بباته‌وه.
***
تێبینی: ئه‌م بابه‌ته له ژماره (76)ی گۆڤاری په‌یامی زانایان بڵاوكراوه‌ته‌وه. | 