د. كه‌مال كه‌ركوكی سه‌رۆكى په‌رله‌مانى كوردستان، پێشوازى له‌شاندێكى باڵاى یه‌كێتى زانایانى ئاینیى ئیسلامى كرد.
له‌دیدارێكدا كه سه‌رۆك و ئه‌ندامانى لیژنه‌ى تایبه‌تى په‌رله‌مان بۆ به دواداچوون و گوێ گرتن له خۆپشانده‌رانى سلێمانى ئاماده‌یبون، به ناوى شانده‌كه پوخته‌یه‌كى ئه‌و هه‌وڵانه‌ى یه‌كێتى زانایانى ئیسلامى و ئیمام و خوتبه خوێنى شارى سلێمانى و ده‌وروبه‌رى خرانه ڕوو كه له‌پێناو هێوركردنه‌وه‌ى بارودۆخه‌‌كانى ئه‌م دواییه‌ى شارى سلێمانى روویان داوه‌و، سه‌ردانى هه‌موو لایه‌نه‌كانیان كردوه‌و، وه‌ك مامۆستایانى ئاینى هه‌وڵى خۆیان بۆ هێوركردنه‌وه‌ى دۆخه‌كه داوه‌و، ئه‌وه‌شیان خسته روو كه زۆربه‌ى داواكارى خۆپیشانده‌ران ره‌وایه، به‌ڵام با شارستانیانه و دوور له‌توند و تیژى داوا بكرێ و، ئیدانه‌ى هه‌موو جۆره توند و تیژیه‌ك ده‌كه‌ین له هه‌رلایه‌نه‌كه‌وه بێت. وه خۆشحاڵین به ووته‌كانى رێزدار سه‌رۆكى هه‌رێمى كوردستان كه له‌به‌رژوه‌ندى خه‌ڵكى كوردستان دایه و هه‌ر بۆ چاكسازى یاداشتێكیان له‌رێگه‌ى لیژنه‌ى تایبه‌تى په‌رله‌مان ئاراسته‌ى سه‌رۆكایه‌تى په‌رله‌مان كردووه بۆ ئه‌وه‌ى كار بۆ جێبه‌جێ كردنى بكرێ.
له‌به‌رامبه‌ردا د.كه‌مال كه‌ركوكى به‌گه‌رمى به‌خێرهاتنى شانده‌كه‌ى كرد و رۆڵى مامۆستایانى ئاینى و ووتار خوێنى مزگه‌وته‌كانى به‌رز نرخاند له‌پێناو هێوركردنه‌وه‌ى دۆخه‌كه ووتى هه‌ر هه‌وڵێكى كه بۆ هێوركردنه‌وه‌ى دۆخه‌كه و پاراستنى ئه‌زموونى هه‌رێمى كوردستان درابێ به به‌رزى سه‌یر ده‌كرێ، ئه‌وه‌شی راگه‌یاند كه هه‌موو داواكاریه‌كان به هه‌ند وه‌ردرگیرێ و به‌رده‌وامین له كاركردن له‌سه‌ریان چونكه ئه‌وه‌ى ئه‌مرۆ به‌ده‌ست هاتووه به هه‌وڵ و خه‌باتى هه‌موو تاكێكى ئه‌م هه‌رێمه‌یه و هیچ ماڵێك نییه له كوردستان خۆى یا نزیكێكى قوربانى له‌م پێناوه دا نه‌دابێ و ئه‌ركى ئێمه‌شه ئه‌و كه‌موكورتى و بێ یاساییه‌ى هه‌بێ ده‌ستى له‌سه‌ر دانێین و كه‌مته‌رخه‌مه‌كان سزا بده‌ین و نه‌هێڵین ناحه‌زانى ئه‌م ئه‌زموونه سود ببینن و پێویسته له هه‌موو كاتێك ماڵى كوردستانى رێكتر بخه‌ین و په‌رله‌مان بریاره حه‌ڤده خاڵیه‌كه‌ى خۆى ده‌ركردوه‌و حكومه‌ت مولزه‌مه به جێبه‌جێ كردنیان و سه‌رۆكى ئه‌نجومه‌نى وه‌زیرانیش بانگێشتى دانیشتنى په‌رله‌مان ده‌كرێت و هه‌موو لایه‌كمان سه‌رۆكى هه‌رێمى كوردستان و په‌رله‌مان و حكومه‌تى هه‌رێمى كوردستان په‌رۆشیی ئه‌و بارودۆخه‌ین چونكه به داخه‌وه خوێن رژاوه‌و ئه‌وانه‌ى شه‌هید كراون كوڕ و رۆڵه‌ى هه‌ژار و بێ ده‌ره‌تانى ئه‌م كوردستانه‌ن.
هه‌ر له‌دیداره‌كه‌دا سه‌رۆكى په‌رله‌مانى كوردستان ئه‌وه‌ى راگه‌یاند به‌ڵى خۆپیشاندان مافێكى ده‌ستوری یاسایى و شه‌رعى خه‌ڵكى كوردستانه هه‌موو كه‌س بۆى هه‌یه به‌پێى یاسا داخوازى خۆى به‌رێگه‌ى ئسولى بگه‌ێنێ و ئه‌ركى هه‌موومانه چاكى بكه‌ین چونكه ئێمه هێشتا كێشه‌ى كه‌ركوك و ناوچه دابڕینراوه كوردستانیه‌كان و كۆمه‌ڵێك كێشه‌ى هه‌ڵپه‌سیراومان ماوه‌و پێویسته له‌هه‌موو كاتێك زیاتر یه‌كریزى و ته‌بایى خۆمان بپارێزین چونكه یه‌ك هه‌ڵوێستى به‌ره‌و به‌ده‌ست هێنانى گشت مافه‌كانمان و كوردستانێكى سه‌قامگیر و ئاوه‌دان و پێشكه‌وتوو مان ده‌بات.
جێی گووتنه شانده‌كی یه‌كێتی زانایان پێ:هاتبوو له جێگری سه‌رۆكی زانایان‌و چه‌ند ئه‌ندامێكی مه‌كته‌بی ته‌نفیزی‌و به‌رپرس‌و كارگێرانی لقی سلێمانی‌و چه‌ند مامۆستایه‌كی دیكه.
| 
یەکێتی زانایان مەراسیمێکی رێزلێنان بۆ 130 مامۆستای ئایینی و هاوکارانی راگەیاندنی مەکتەبی تەنفیزی یەکێتی زانایان ساز دەکات
یەکێتی زانایانی ئایینی ئیسلامی کوردستان پەیامێکی پیرۆزبایی بە بۆنەی جەژنی رەمەزانی پیرۆز بڵاو دەکاتەوە
