رۆژی پێنج شه‌ممه به‌رواری 25/11/2010 به هۆكاری نادیاره‌وه مه‌رقه‌دی شێخی باڵه‌ك ئاگری تێبه‌ر ده‌بێت‌و، زۆرێك له كه‌ل‌و په‌ل‌و ئه‌و به‌رماڵه سه‌وزانه‌ی سه‌ر گۆڕی شێخ‌و ته‌نانه‌ت به‌شێكی فه‌رشكانیش ده‌سووتێن، به‌ڵام تا ئێستا هۆكاری ئه‌و رووداوه دیار نیه‌‌و لێكۆڵینه‌وه‌ش له‌و باره‌وه به‌رده‌وامه، ئه‌مه‌ش نیگه‌رانی زۆری لای هاوڵاتیان‌و خه‌ڵكی باڵه‌كایه‌تی دروست كردووه‌‌و، ده‌نگۆی زۆرو جیاجیای به‌دوای خۆیدا هێناوه.
له‌و باره‌وه به‌رێز مامۆستا یوسف مه‌لا ئه‌حمه‌د تێبینه‌ری تێبینه‌رایه‌تی ئه‌وقافی چۆمان به (zanayan.org) راگه‌یاند: راسته مه‌رقه‌دی شێخی باڵه‌ك سووتێندراوه، به‌ڵام به‌و شێوه‌ش نیه كه له‌ناو خه‌ڵك باوه، گوایه به ته‌وجیهی لایه‌نێك ئه‌و كاره كرابێت، یان دیار بێ كێ ئه‌و كاره‌ی كردووه، بۆ ئه‌و مه‌به‌سته‌ش ئێمه مه‌یدانی سه‌ردانی شوێنی رووداومان كردووه‌‌و به‌دواداچوونی وورد‌و پێویستمان ئه‌نجام داوه، له‌گه‌ڵ لایه‌نی به‌رپرس له‌و ده‌ڤه‌ره‌ش قسه‌مان له‌سه‌ر ئه‌و رووداوه كرد، كه ئه‌وانیش وێڕای په‌رۆشیان بۆ ئه‌و جۆره كاره ناشیاوه، ئه‌و په‌ڕی هاوكاریان نواندو‌و كاری پێویستیش له‌و باره‌وه ئه‌نجام دراوه.
مامۆستا یوسف گوتیشی: قوڕئانی ناو مه‌رقه‌د نه‌سوتاون، به‌ڵام ئه‌و مه‌زاره تایبه‌تمه‌ندی خۆی هه‌یه‌‌و ئێمه به هیچ شێوه‌یه‌ك له‌گه‌ڵ ئه‌وه نین ئه‌و جۆره كارانه به هه‌ر ناوێك بێت بكرێت، یان هه‌ر كه‌س‌و لایه‌نێك ئه‌و كاره‌ی له‌سه‌ر ئاشكرا بێت كاری پێویست ئه‌نجام ده‌ده‌ین‌و به پێی یاسا مامه‌ڵه‌یان له‌گه‌ڵ ده‌كه‌ین.
هه‌ر له‌و باره‌وه به‌رێز مه‌غدید ئه‌حمه‌د به‌ڕێوه‌به‌ری شاره‌دێی حاجی ئۆمه‌ران ئه‌و هه‌واڵه‌ی پشت راست كردووه‌‌و گوتی: تا ئێستا هۆكاری ئه‌و رووداوه دیار نیه، ئێمه كاری پێویست ئه‌نجام ده‌ده‌ین‌و خه‌ریكی لێكۆڵینه‌وه‌ین.
ناوبراو گوتیشی له‌به‌ر ئه‌وه‌ی نووسینی سه‌ر دیواره‌كانی ئه‌و مه‌رقه‌ده به په‌مپ ره‌ش كراونه‌ته‌وه‌‌و دواتر ئاگریان به‌رداوه‌ته مه‌رقه‌دی شێخی باڵه‌ك، گومان ده‌كرێت به ئه‌نقه‌ست بێت، به‌س تا ئێستا له لێكۆڵینه‌وه به‌رده‌وامین‌و نه‌گه‌یشتینه هیچ ئه‌نجامێك له‌و باره‌وه، به‌ڵام به‌و په‌ڕی پێویسته‌وه ئێمه ئیجرائات ده‌كه‌ین‌و دوای لێكۆڵینه‌وه‌ش ئه‌نجامه‌كه بۆ خه‌ڵك راده‌گه‌یه‌نین.
شایانی باسه مه‌رقه‌دی شێخ موحه‌مه‌دی باڵه‌ك یه‌كێكه له‌و مه‌زاره دیارو رێز لێگیراوانه، كه له باڵه‌كایه‌تی سه‌نگی خۆی هه‌یه‌‌و تێكڕای خه‌ڵك له دڵسۆزیان بۆ هه‌ستی دینداری‌و خواناسی‌و زوهد‌و ته‌قوای شێخی باڵه‌ك ڕێز له‌و شوێنه ده‌گرن، كه كه‌وتۆته شاره‌دێی حاجی ئۆمه‌رانی ده‌ڤه‌ری باڵه‌كایه‌تی.
| 
یەکێتی زانایان مەراسیمێکی رێزلێنان بۆ 130 مامۆستای ئایینی و هاوکارانی راگەیاندنی مەکتەبی تەنفیزی یەکێتی زانایان ساز دەکات
یەکێتی زانایانی ئایینی ئیسلامی کوردستان پەیامێکی پیرۆزبایی بە بۆنەی جەژنی رەمەزانی پیرۆز بڵاو دەکاتەوە
