رۆژنامه‌ی (تشارلی ئیبدۆ) كه رۆژنامه‌یه‌كی گاڵته‌ئامێزه‌‌و هه‌فتانه له پاریس ده‌رده‌چێت، دوێنێ شه‌و، به هۆی فڕێدانی شوشه‌ی ئاگرینی ناوه‌وه‌ی ژووره‌كان سووتێندرا.
چاودێران پێیان وایه هۆكاری سووتاندنه‌كه بۆ ئه‌وه‌ی ده‌گه‌ڕێته‌وه، كه ئه‌و رۆژنامه‌یه كۆمه‌ڵێك شتی كردووه، رۆژنامه‌نووسان‌و چاودێران به گاڵته‌پێكردن‌و سوكایه‌تیپێكردنی ده‌زانن به موسڵمانان، چونكه ئه‌و رۆژنامه‌یه به‌بۆنه‌ی كردنه‌وه‌ی هه‌ڵستا به بڵاوكردنه‌وه‌ی وێنه كاریكاتێرییه‌كان، كه وێنای پێغه‌مبه‌ری ئیسلامی ده‌كرد‌و، له‌لایه‌ن كاریكاتێرستێكی دانیماركی دروست كرابوون، هه‌روه‌ها له ژماره‌ی ئه‌مڕۆ چوارشه‌مه‌دا، هه‌ڵستاوه ناوی رۆژنامه‌كه‌ی گۆڕیوه بۆ (شه‌ریعه ئیبدۆ) هه‌روه‌ها ناوی سه‌رنووسه‌ره‌كه‌شی كردووه به (محه‌مه‌د پێغه‌مبه‌ر)، ئه‌و كاره‌شیان دوای ئه‌وه هاتووه، كه له توونس حزبی نه‌هزه‌ی ئیسلامی یه‌كه‌می ده‌نگه‌كانی هێنا‌و، هه‌روه‌ها له لیبیا مسته‌فا عه‌بدولجه‌لیل به سه‌رۆكی ئه‌نجومه‌نی كاتی لیبیا داندرا‌و، ئه‌ویش رایگه‌یاند: له حكومه‌تی نوێی لیبیا شه‌ریعه‌تی ئیسلام بنه‌مای سه‌ره‌كی ده‌ستووری نوێی لیبیا ده‌بیت.
له به‌رامبه‌ر ئه‌وه‌دا شه‌وی رابردوو (2-3/11/2011) كه‌سانێكی نادیار هه‌ڵستاون به سووتاندنی ناو باره‌گای رۆژنامه‌كه، كاتێك كۆمه‌ڵه كه‌سێك، كه هیچ زانیاری له باره‌یانه‌وه بڵاونه‌كراوه‌ته‌وه، هه‌ڵستاون شوشه‌یان پڕی به‌نزین كردووه‌‌و فڕێان داوه‌ته ناو باره‌گای رۆژنامه‌كه‌‌و، ته‌واوی كه‌ل‌و په‌لی ناوه‌وه‌ی سووتاندووه.
رۆشنبیران‌و رۆژنامه‌نووسانی فه‌ره‌نساش بوونه‌ته دوو به‌ش، هه‌ندێكیان ئه‌وه به به‌شێك له ئازادی رۆژنامه‌گه‌ری داده‌نێن، هه‌ندێكی دیكه پێیان وایه ئه‌وه ده‌رچوونه له كاری رۆژنامه‌وانی‌و، سوكایه‌تیكردن‌و گه‌مه‌كردنه به هه‌ستی موسڵمانان.
له‌لایه‌ن خۆیه‌وه محه‌مه‌د موساوی له لێدوانێكیدا بۆ كه‌ناڵی (فرانس 24) ئیدانه‌ی سووتاندنی باره‌گای رۆژنامه‌كه‌ی كرد. | 
یەکێتی زانایان مەراسیمێکی رێزلێنان بۆ 130 مامۆستای ئایینی و هاوکارانی راگەیاندنی مەکتەبی تەنفیزی یەکێتی زانایان ساز دەکات
یەکێتی زانایانی ئایینی ئیسلامی کوردستان پەیامێکی پیرۆزبایی بە بۆنەی جەژنی رەمەزانی پیرۆز بڵاو دەکاتەوە
