دوای ئه‌وه‌ی كتێبێكی شیعری له بازاڕ كێشرایه‌وه، كه تێیدا زۆر به روونی‌و بێ هیچ پێچ‌و په‌نایه‌ك سوكایه‌تی به په‌روه‌ردیگاری مه‌زن ده‌كرد، بووه جێی ده‌ستخۆشی هاووڵاتیانی كوردستان، چونكه سوكایه‌تیكردن به عه‌قیده‌‌و باوه‌ڕی خه‌ڵك دوور‌و نزیك خزمه‌ت به بواری وشیاری‌و رۆشنبیری‌و كۆمه‌ڵایه‌تی خه‌ڵكی كوردستان ناكات‌و، شێواندنی پیشه‌ی رۆژنامه‌ڤانیشه له وشیاریكردنه‌وه بۆ سوكایه‌تیكردن به هه‌ستی دیندارانه‌ی هاووڵاتیان.
به‌ڵام به پێچه‌وانه‌ی هه‌موو عورف‌و عاده‌تێكی كۆمه‌ڵایه‌تی‌و ئه‌منی‌و ئایینی‌و رۆژنامه‌ڤانی، رۆژنامه‌ی (هه‌واڵ) وه‌ك شانازییه‌ك شیعره‌كه‌ی بڵاوكردۆته‌وه، گوێی به هیچ لایه‌ك نه‌داوه، حسێبیشی بۆ هه‌ست‌و سۆزی هاوولاتیان نه‌كردووه، داخۆ بریندار ده‌بێت یان نا.
بۆ ئه‌م مه‌به‌سته سه‌رۆكی زانایان له لێدوانێكی تایبه‌ت به سایتی (زانایان) رایگه‌یاند: به داخه‌وه قه‌ت چاوه‌ڕێمان نه‌ده‌كرد، خه‌ڵكێك هه‌بێت ئه‌وه‌نده نامه‌سئولانه مامه‌ڵه له‌گه‌ڵ هه‌ست‌و باوه‌ڕی هاووڵاتیان بكات، ئێمه ده‌ستخۆشانه له رۆژنامه‌‌و گۆڤاره‌كانی كوردستان ده‌كه‌ین، كه ئێستا زۆر خۆیان له سوكایه‌تیكردن به پیرۆزیه‌كان دوورده‌گرن‌و، فیعله‌ن هه‌وڵ ده‌ده‌ن، كار بۆ وشیاركردنه‌وه‌ی خه‌ڵكی بكه‌ن، نه‌ك سوكایه‌تیان پێ بكه‌ن، چونكه هیچ ناوه‌ندێكی رۆشنبیری به سوكایه‌تیپێكردن په‌یامه‌كه‌ی ناگاته هاوڵاتیان، له‌لای خۆشمانه‌وه رێگای یاسایی له دژی رۆژنامه‌ی (هه‌واڵ) ده‌گرینه به‌ر‌و، بۆ ئه‌م مه‌به‌سه‌ته‌ش نووسراوی ره‌سمیمان داوه‌ته داواكاری گشتی بۆ ئه‌وه‌ی یاسا رۆڵی خۆی له‌م نێوه‌دا ببینێت، هیوادارین ئه‌وانیش به جددی هه‌وڵی جێبه‌جێكردنی یاسا بده‌ن، هه‌روه‌ها ئه‌و لایه‌نه سیاسیه‌ش، كه له پشتی رۆژنامه‌كه‌وه‌یه، ده‌بێ پێداچوونه‌وه به‌و سیاسه‌ته بكات، كه له‌لایه‌ك هه‌زاران ئه‌ندامی نوێژخوێنیان هه‌بێت‌و، موجامه‌له‌یان بكه‌ن، له‌لایه‌كی دیكه‌ش له په‌نای ئه‌و رۆژنامانه‌وه سوكایه‌تی به پیرۆزیه‌كانیان ده‌كه‌ن، هیوادارین پێداچوونه‌وه به‌م شێوازه‌ی كاركردن بكرێت.
هه‌روه‌ها سه‌رۆكی زانایان گووتیشی: دڵگرانین كار بگاته ئه‌وه‌ی رێگای یاسایی له دژی رۆژنامه بگریت، بۆ ئه‌وه‌ی سوكایه‌تی به هاووڵاتیان نه‌كات، چونكه كاری رۆژنامه ئه‌وه‌یه، كه خه‌ڵكی وشیار بكاته‌وه، نه‌ك سوكایه‌تی پێ بكات، پێویسته رۆژنامه له رۆژێكی وه‌ك ئه‌مڕۆدا كێشه‌ی سودان ئیبراز بكات‌و، بیری وه‌رگرتنی سه‌ربه‌خۆیی كوردستان‌و هێنانه‌دی ئاواته‌كان له ناو جه‌ماوه‌ر قوڵ بكاته‌وه، گیانی برایه‌تی‌و پێكه‌وه‌ژیان په‌ره پێ بدات، خۆشه‌ویستی‌و برایه‌تی دروست بكات، نه‌ك دوو به‌ره‌كی‌و ناكۆكی.
| 
یەکێتی زانایان مەراسیمێکی رێزلێنان بۆ 130 مامۆستای ئایینی و هاوکارانی راگەیاندنی مەکتەبی تەنفیزی یەکێتی زانایان ساز دەکات
یەکێتی زانایانی ئایینی ئیسلامی کوردستان پەیامێکی پیرۆزبایی بە بۆنەی جەژنی رەمەزانی پیرۆز بڵاو دەکاتەوە
