ئه‌مڕۆ سێشه‌ممه‌ 12/7/2011 له‌ باره‌گای مه‌كته‌بی ته‌نفیزی یه‌كێتی زانایانی ئایینی ئیسلامی كوردستان، له‌ لایه‌ن به‌ڕێز مامۆستا مه‌لا جه‌لال خه‌یلانی جێگری سه‌رۆكی یه‌كێتی زانایان‌و، به‌ڕێزان ئه‌ندامانی مه‌كته‌بی ته‌نفیزی، پێشوازی كرا له‌ به‌ڕێز جوان پشتیوان به‌رپرسی رێكخراوی تواناسازی ئافره‌تان.

ئه‌مه‌و له‌ دانیشتنێكدا، باس له‌ هه‌ماهه‌نگی له‌ به‌ڕێوه‌چوونی خولی زیاتر بۆ زانایانی ئایینی كرا، كه‌ پێشتر ژماره‌یه‌ك خول به‌ هه‌ماهه‌نگی هه‌ردولا بۆ ژماره‌یه‌ك زانای ئاینی ناوچه‌ جیاجیاكانی هه‌رێم سه‌ركه‌وتووانه‌ به‌ڕێوه‌چووه‌.

شایانی باسه‌: هه‌ر له‌ كۆبوونه‌وه‌كه‌دا بڕیاردرا، كه‌ له‌ داهاتوویه‌كی نزیكدا، خولێكی فراوانتر كه‌ 40 مامۆستای ئایینی له‌ خۆبگرێ‌‌و، به‌ به‌شداری زانایانی هه‌ریه‌ك، له‌ شاری هه‌ولێرو، كۆیه‌و، سۆران‌و، خه‌بات‌و، شه‌قڵاوه‌، بكرێته‌وه‌‌و، دواتر مامۆستایانی به‌شداربوو له‌سنووری خۆیان خولی هاوشێوه‌ به‌ڕێوه‌ببه‌ن.

له‌ لایه‌ن خۆیه‌وه‌، به‌ڕێز مامۆستا مه‌لا جه‌لال خه‌یلانی، ته‌واوی پشتیوانی‌و هاوكاری یه‌كێتی زانایانی بۆ هه‌ر هه‌وڵێكی بڵاوكردنه‌وه‌ی رۆِشنبیری دروست نیشانداو، كارو هه‌وڵه‌كانی رێكخراوی ناوبراویشی له‌م بواره‌دا به‌ گرنگ‌و پێویست پێناسه‌ كرد‌و، بوونی ئه‌و هه‌ماهه‌نگیه‌ی نێوان رێكخراوه‌كه‌و یه‌كێتی زانایان به‌ سوپاسه‌وه‌ به‌ به‌رزه‌وه‌ نرخاند.