لە روونكردنەوەیەكدا لقی سلێمانی یەكێتی زانایان بڵاوی دەكاتەوە، كە ماوەیەكە رۆژنامەی هاوڵاتی خەریكە جۆرە هەواڵێك بڵاودەكاتەوە، كە بە هیچ شێوەیەك پەیوەندی بە راستییەوە نییە، كە دوا هەواڵیان لە ژمارە (1061) گوایە (157) مامۆستای ئایینی لەبەر ئەوەی ئیمزایان بۆ گێڕانەوە دەستوور كردووە لێچێچینەوەو لێكۆڵینەوەیان لەگەڵ كراوە.
لە روونكردنەوەكەی لقی سلێمانی هاتووە، ژمارەی ئەوانەی واژۆیان كردووە ئەوەندە نییە، كە رۆژنامەكە نووسیویەتی، بەڵكو زۆر لەوە كەمترە، لە كەمەكەش كۆمەڵە ناوێك دووبارە بۆتەوە، كۆمەڵە مامۆستایەكی دیكەش ناویان هاتووەو هیچ ئاگاداری نەبوونە.
لەوەش سەیرتر هەڵستاون وێنەیەكی مامۆستایانی لقی سلێمانیان لەگەڵ هەواڵەكە داناوە، كە كەمو زۆر پەیوەندیان بە هەواڵەكەوە نییەو، زیاتر لە خانەی تەشهیرەوە نزیكە. لە روونكردنەوەكەدا هاتووە: (وێنەكە لەدوورونزیك پەیوەندی بەو هەواڵەوە نیە، چونكە ئەوانەی لەوێنەكەدا هاتون كەسانی بەرپرسن لەیەكێتی زانایان لە سنوری سلێمانی ئەو كەمپینەش بەهیچ جۆرێك پەیوەندی بەیەكێتی زانایان و ئەو مامۆستا بەڕیزانەوە نیە كەلەوێنەكەدا هاتوە، بۆیە ناكرێت ڕۆژنامەی هاوڵاتی لەپێناو خۆیدا وێنەی كەسانی تر لەیەكێتی زانایان بڵاو بكاتەوە ، ئەمە یەكەم جاریش نیە شتی لەو جۆرە بڵاو بكاتەوە، دەكرا وێنەی ئەو مامۆستایانە خۆیان بڵاو بكاتەوە كەدیارە وێنەی پێشو تریشیان لای ئێوە هەیە، بۆیە پێمان وایە دەبێت ڕۆژنامەی هاوڵاتی لە سەر ئەو وێنەیە داوای پۆزش لە زانایانی ئاینی وئەو كەسانە بكات).
سەبارەت بە سزادانی ئەو مامۆستایانەش كە واژوویان كردووە، یان لێپێچینەوەیان، ئەوان روونی دەكەنەوە، لە سنووری سلێمانیو شارەزوور كەمترین قسە بە هیچ كەسێك نەگووتراوە، پێشتریش ئەوقافی هەولێر رایگەیاند: (پێمان سەیرە دروو لە هەستكردن بە بەرپرسیارێتی خەڵكێك رێگە بەخۆی دەدات، ئەم جۆرە هەواڵە ناراستانە بڵاوبكاتەوەو، بەیاننامەیەكی چەند مامۆستایەكی ئایینی بكاتە كارتی سیاسیو شەڕی پێ بكات، لە كاتێكدا كاری ئێمە ئیدارییەو، رێزی تەواوی مامۆستایانمان دەگرینو، پێشمان وایە مامۆستاش وەك هەر مرۆڤێكی دیكە راو سەرنجی خۆی هەیە، بەڵام ئێمە وەكو وەزارەت هەمیشە پیشەی مامۆستایانی ئایینی بە پیرۆزو گەورە دەزانین، بۆیە هیوادارین هەمیشە لە ئاست گەورەییو پیرۆزی ئایینیو پیشەییان دابنو، پیشە پیرۆزەكەیان بۆ ناو ململانێی سیاسی بچووك نەكەنەوە).
ئەمەی خوارەوە دەقی روونكردنەوەكەی لقی سلێمانییە.
بـۆ بـەڕێز/ ڕۆژنامەی هاوڵاتی
بابەت / ڕونكردنەوە
سڵاوی خواتان لێ بێت .
بەڕیزان ڕۆژنامەكەتان ماوەیەكە هەندێ شتی تێدا بڵاو دەكرێتەوە بەهیچ پێوەرێك لەگەڵا ڕاستیەكاندا یەك ناگرێتەوە، وەپێشمان وایە كەلەبواری تردا هەنگاوی باشی ناوە لەبەرەو پێش چونی خزمەتكردن بەڕۆژنامەگەری كوردیدا بۆیە لەژمارە (1061) ڕۆژی پێنج شەممە لەلاپەڕەی (2) هەواڵێك بڵاو كراوەتەوە لەژێر ناوی (157) مامۆستای ئاینی لەسەر واژۆی گەڕانەوەی دەستور لێ پرسینەوەیان لەگەڵدا دەكەن، لەهەمان كاتدا وێنەیەك بڵاو كراوەتەوە لەسەری لەدور ونزیك پەیوەندی بەو هەواڵەوە نییە، بۆیە ئێمە لەلقی سلێمانی یەكێتی زانایان لەگەڵ بڕوابونمان بەتەواوی ئازادی تاكەكان بەپێویستمان زانی لەم چەند خاڵەی خوارەوەدا بەشێك لەڕاستیەكان بۆ ڕای گشتی بخەینە ڕو بەو هیوایەی هەمومان بتوانین خزمەتی ڕاستی بكەین پەیامی ڕاست وئاشتی خوازانە بگەیەنین.
یەكەم: وێنەكە لەدور ونزیك پەیوەندی بەو هەواڵەوە نیە، چونكە ئەوانەی لەوێنەكەدا هاتون كەسانی بەرپرسن لەیەكێتی زانایان لە سنوری سلێمانی ئەو كەمپینەش بەهیچ جۆرێك پەیوەندی بەیەكێتی زانایان و ئەو مامۆستا بەڕیزانەوە نیە كەلەوێنەكەدا هاتوە، بۆیە ناكرێت ڕۆژنامەی هاوڵاتی لەپێناو خۆیدا وێنەی كەسانی تر لەیەكێتی زانایان بڵاو بكاتەوە ، ئەمە یەكەم جاریش نیە شتی لەو جۆرە بڵاو بكاتەوە، دەكرا وێنەی ئەو مامۆستایانە خۆیان بڵاو بكاتەوە كەدیارە وێنەی پێشو تریشیان لای ئێوە هەیە، بۆیە پێمان وایە دەبێت ڕۆژنامەی هاوڵاتی لە سەر ئەو وێنەیە داوای پۆزش لە زانایانی ئاینی وئەو كەسانە بكات.
دووەم: مانشێتی هەواڵەكە وادەردەخات گوایە ئەو ژمارەیە لێپرسینەوەیان لەگەڵدا دەكەن و بەپێی مانشێتەكە قسەی مامۆستاكانە.
لەڕاستیدا ئەمشیان چەواشەكردنی خوێنەر وجەماوەرە لەبەر ئەم هۆیانە.
أ- ژمارەكە ئەوەندە نییە وكەمترە بەوانەشەوە كەدوبارە بۆتەوە هێشتا ناگاتە ئەو ڕێژەیە
ب- ئەوانەی ناویان هاتوە بەداخەوە دەكرێت بڵێین بەشێكیان بەبێ ئاكاداری خۆیان ناویان نوسراوە ، چونكە هەر لەو ناوانە كەسی تیایە دەڵێت: لەدورو نزیك من ئاگادار نیم وپێشم نەوتراوە واژۆ لەسەر هیچ بكەم ئەمەش پێچەوانەی هەمو یاساكانە بەبێ ئاگاداری واژۆ بكرێت
ج- ئەوانەی ناویان هاتوە دابەش بون بەسەر ئەوقافەكانی هەولێر وكۆیە وسلێمانی وشارەزوردا، لەكەڵا ئەوەی وەزارەتی ئەوقاف ئەو دەنگۆیانەی ڕەتكردەوە بەباسیان لەئەوقافی هەولێر دەكرد لەگەڵا ئەوەشدا بەهیج جۆرێك لەسنورەكانی ئەوقافی سلێمانی وشارەزور بەكەس نەوتراوە پشتی چاوت برۆیە لەسەر واژۆ كردن، بۆیە هیوا دارین ڕاستیەكان وەكو خۆی بخرێتە ڕو.
لەگەڵا ڕێزدا.
لقی سلێمانی
یەكێتی زانایانی ئاینی ئیسلامی كوردستان