روونكردنهوهیهك له لێژنهی باڵای فهتوا دهربارهی سروودی (ئهی رهقیب)
بهناوی خوای بهخشندهی میهرهبان
ماوهیهكه مشتومڕێك لهسهر سروودی (ئهی رهقیب) دروست بوووهو، لهسهر ئاستی شهقامی كوردیو ناوهنده رهسمییهكانیش دهنگدانهوهی ههبووه، ههروهها له چهند لایهنێكیشهوه وهكو پرسیار ئاراستهی لێژنهی باڵای فهتوای كوردستان كراوهو، وهزارەتی ئهوقافی حكومهتی ههرێمی كوردستانیش بە نووسراوی ژمارە (184) له (11/11/2013) به فهرمی داوای روونكردنهوهی لایهنی شهرعی سروودهكهی له لێژنهی باڵای فهتوا كردووه، بۆیه دوای لێكۆڵینهوهو بهدواداچوون لهگهڵ چهندان كهسایهتیو ناوهندی رۆشنبیری بهتایبهتی ئهكادیمیای كوردی، به پێویستمان زانی ئهم روونكردنهوهی خوارهوه بڵاوبكهینهوهو، له روونكردنهوهكهشدا تهنها تیشكمان خستۆته سهر لایهنه شهرعیو ئایینیهكانی سروودهكه.
یهكهم: سهرهتا به پێی نووسراوی ئهكادیمیای كوردی ژماره (582) له (13/11/2013) ئهم سرووده داندراوی (دڵدار)ی شاعیرهو، له كاتی ههڵكردنی ئاڵای كوردستان له كۆماری كوردستان به ئامادهبوونی چهندین مهلاو زانای ئاینیو گهوره پیاوانی كۆماری كوردستان له مهاباد ئهم شیعره به سروود گووتراوهو ههمووشیان وهك (مارشی نهتهوهیی) لهبهری ههڵساونهته سهر پێ.
دووهم: لهبهر ئهوهی ئهم شیعره كۆمهڵێك گومانو قسهی لێوه دروست بووه، به پێویستی دهزانین تیشك بخهینه سهر چهند لایهنێكی شیعرهكه:
سهرهتا دهستهواژهی (ئهی رهقیب) مانای (خالق – پهروهردیگار) ناگهیهنێت، بهڵكو مهبهست (دوژمن) یان (ناحهز) یان (حهسوود)ه، ئهمهش له دیوانی چهندان شاعیری كلاسیكی كورد وهك (نالی، كوردی، زێوهر) بهكار هاتووه.
سهبارهت به (دینمانو ئایینمان ههر نیشتیمان) ئهوهی زیاتر گومانی دروست كردووه، هاتنی وشهی (ههر)ه، كه ههندێكجار بهوه مانای دهكرێتهوه، كه ئایینی ئێمه تهنها نیشتیمانه، بهڵام له راستیدا دوای گهڕانهوهمان بۆ دهقه ئهسڵیهكهو، ههروهها بهپێی روونكردنهوهی ئهكادیمیای كوردی وشهی (ههر) له دهقه ئهسڵیهكه نییه. ئهمهش به مهبهستی خۆشهویستییهكی یهكجار زۆر بهكارهێنراوهو، له دهقه ئیسلامیهكانیش هاوشێوهی زۆری ههیه. كهواته ئهسڵی شیعرهكه بهم شێوهیه: (دینمان ئایینمانه نیشتیمان). ئهمهش بۆ ئهوهیه بڵێت: به هێندهی دینو ئاین نیشتیمانمان خۆش دهوێ، چونكه خۆشهویستی نیشتیمان بهشێكه له ئیمان، مرۆڤی موسڵمان ئایینی خۆی خۆش دهوێتو نیشتیمانهكهشی خۆش دهوێت، روونیشه كه ئایین بهبێ خاكو وڵاتێكی ئارام به باشی جێبهجێ ناكرێت.
سهبارهت به دهستهواژهی (نایشكێنێ دانهری تۆپی زهمان) ئهوهش مهبهست خوا نییه، بهڵكو دوو لێكدانهوهی بۆ كراوه:
یهكهم: مهبهست له (تۆپی زهمان) چهكه، كه لهو سهردهمهدا بههێزترینو كوشندهترین چهكی شهڕ بووه.
دووهم: به پێی ئهو دهقهی له كتێبی مێژووی ئهدهبی كوردی هاتووه، دهقهكه بهم شێوه نییه، بهڵكو شیعرهكه دهڵێت: (نایڕمێنێ دانهیی تۆپی زهمان).
له ههردوو حاڵهكهدا شاعیر دهیهوێت به دوژمن بڵێت: ئهی دوژمنو ناحهز: كورد ههر دهمێنێو ناڕوخێ به دهست ئهو وڵاته زۆردارانهی كه تۆپی ئهم زهمهنهیان دروست كردووهو خهڵكی كوردی پێ دهترسێنن، هیچ تۆپو دانهیهك لهو تۆپانه ناتوانێ كورد بڕمێنێو بیروخێنێ.
بۆیه روونی دهكهینهوه، كه سروودهكه شتێکی تێدا نییە كوفرو دژه ئایین بێتو، پێشنیاز دهكهین کە لایەنە پەیوەندیدارەکان بگهڕێنهوه سهر دهقه ئهسڵیهكهی، كه وشهی (ههر)ی تێدا نییه، هەروەک لە سەرچاوەکان هاتووە.
والسلام علیكم ورحمه الله وبركاته
لێژنهی باڵای فهتوای كوردستان
19/11/2013