دكتۆر عەلی قەرەداغی ئەمینداری گشتی یەكێتی جیهانی زانایانی مسوڵمان، لە لێدوانێكدا بۆ سایتی (یەكێتی جیهانی زانایانی مسوڵمان) ئیدانەی ئەو كارە تیرۆریستیانە دەكات كە (گروپە توندڕەوەكان) پێی هەڵدەستن لە سوریا كە دژ بە كورد و سوپای ئازادو هاوڵاتیان ئەنجامی دەدەن و دەڵێت ئەم رەوشتانە دوورن لە ئیسلام.
ئەو دوپاتی كردۆتەوە "هیچ گومانم نییە كە لە ئێستادا پلانێكی گشتگیر لەسەر ئیسلام هەیە، نەك تەنها لەلایەنی سیاسییەوە، بەڵكو لە لایەنی ئایینی و كۆمەڵایەتی و تەنانەت ئەخلاقیشەوە، لەكاتێكدا كە ئەخلاق پێگەیەكی گەورەی لە ئیسلامدا هەیە و مێژوونوسان هەڵس و كەوتی سەڵاحەدینی ئەیوبی بە دادپەروەر لەگەڵا دیل و نەیارو بەرامبەرەكاندا بێ وێنە لە قەڵەم دەدەن".
دكتۆر قەرەداغی جەختی لەسەر ئەوەش كردەوە كە ئاینی پیرۆزی ئیسلام هەموولایەنەكانی سیاسیی و ژینگەیی و كۆمەڵایەتی دەگرێتەوە. هەتا ئێستا هیچ توێژەرێك نەیتوانیوە رەخنەیەك لە قورئاندا پدۆزێتەوە كە دژ بێت بە مافەكانی مرۆڤ.
وتیشی" بەپێی سەرژمێریەك لە رۆژئاوادا 67%ی جولەكەكان رقیان لە جولەكەیە، بەڵام ئەم رقەیان روكردە مسوڵمانان بەهۆی هەڵس و كەوتی دەسەڵاتدارەكان لەگەڵا گەلەكانیان، بەڵام كە رۆژئاواییەكان زانیان ئەم دەسەڵاتدارانە نوێنەرایەتی ئیسلام ناكەن، گەڕانەوە بۆ سەر گروپە توندڕەوەكان و لەم رێگەیەوە دەستیان دایە هێرش كردن بۆسەر ئیسلام.
پاشان دەڵێت: ئێمە ئیدانەی ئەوە دەكەین كە دژ بە راهیبە مەسیحیەكان كرا، ئێمە دژ بە هەموو كارێكی تیرۆرستین. ئیدانەی هەموو ئەو كارە تیرۆریستیانە دەكەین كە گروپی ئەوەی پێی دەڵێن (دەوڵەتی عێراق و شام) ئەنجامی دەدەن. ئەمانە ئەوەندەی لە سوننەیان كوشتووە ئەوەندەیان لە شیعە نەكوشتووە.. ئەمە لەكاتێكدایە كە كوشتنی هەركەسێك بە ناحەق حەرامە.
جەختی لەسەر ئەوەش كردەوە كە ئەوانە بە گەمژەیی و نەفامی و هەڵسوكەوتی نابەجێیان، وێنەیەكی ناشیرینیان بۆ ئیسلام دروست كردووە، بۆ ئەم مەبەستە پێویستە زانایانی ئایینی رۆڵی خۆیان هەبێت، ئێمە لە ئەنجوومەنی ئەمیندارێتی یەكێتی جیهانی زانایانی مسوڵمانەوە كە دەیان هەزار ئەندام لەخۆ دەگرێت كۆ بوینەوە بۆ باسكردن لە بارودۆخی جیهانی ئیسلامی و ئیدانەی ئەو جۆرە هەڵوێستانەمان كردوو بەبەشێك لەو هەوڵانەمان لە قەڵەمدا كە بۆ ناشیرین كردنی ئیسلام بەكار دێت.
لە کوردیو
