سەرلەئێوارەی ڕۆژی شەممە 17/ربیع الاول/1435 كۆچی بەرامبەر 18/1/2014 لە مزگەوتی ڕزگاری ناحیەی ڕزگاری ئەنفالستان سەر بەقەزای كەلار بۆ ساڵی دووەم بەسەرپەرشتی لقی گەرمیان ناوچەی كەلاری یەكێتی زانایانی ئاینی ئیسلامی كوردستان بەئامادەبوونی لێپرسراوی لقی گەرمیان یەكێتی زانایانو بەڕێوەبەری گشتی ئەوقافی گەرمیانو ژمارەیەكی بەرچاوو فراوان لە دانیشتوانی ناحیەكە ئاهەنگێگی شایستەو شكۆداری بەبۆنەی یادی لەدایكبوونی پێشەوای مرۆڤایەتی حەزرەتی موحەمەد موستەفا درودی خوای لەسەربێت ڕێكخست.
سەرەتای ئاهەنگەكە بەخوێندنەوەی چەند ئایەتێك لەقورئانی پیرۆز لەلایەن مامۆستا مەلا عبدالمجید خوێنرایەوە، پاشان لەووتەیەكدا مامۆستا مەلا محمد غەیدان بەرپرسی ناوچەی كەلاری بەخێرهاتنی ئامادەبوانی كرد، مامۆستا مەلا حەمەئەمین كەلاری لێپرسراوی لقی گەرمیان پەیامی پیرۆزبایی یەكێتی زانایانی ئاراستە ئامادەبوانی ئاهەنگەكە كردو، پاشان مەلا غەریب حەمە تۆفیق بەڕێوەبەری گشتی ئەوقافی گەرمیان لە ووتەیەكیدا بەناوی خۆیو بەڕێوەبەرایەتیەكەیەوە پیرۆزبایی ئاراستەی موسڵمانان كرد.
دواتر مامۆستا مەلا تارق هەمەوەندی بەرپرسی ناوچەی كفری یەكێتی زانایان ووتارێكی ئاینی ڕۆحی پێشكەشی ئامادەبوانی مەراسیمەكە كردوو تیشكی خستە سەر ژیان ئامۆژگارییەكانی پێغەمبەرو داوای كرد كە بتوانین پەیامی ئەو سەروەرە لە گوفتارو كردارماندا ڕەنگ بداتەوە.
ئاهەنگەكە بەخوێندنەوەی هۆنراوەو سرودی ئاینی گەرمو گوڕتر كراو، لەكۆتایشدا شیرینی بەسەر ئامادەبوانی ئاهەنگەكەدا دابەشكرا.
![](files/k-t-1-23-1-2014.gif)
![](files/k-t-4-23-1-2014.gif)
![](files/k-t-5-23-1-2014.gif)