سه‌ر له‌به‌یانی رۆژی پێنجشه‌ممه 22/5/2014 شاندێكی لقی سلێمانی یه‌كێتی زانایانی ئاینی ئیسلامی كوردستان كه پێكهاتبوون له به‌ڕێزان مامۆستا نجم الدین قادر ڕه‌حیم لێپرسراوی لق‌و هاوڕێیه‌تی مامۆستا ئه‌حمه‌دی شافیعی ئه‌ندامی مه‌كته‌بی ته‌نفیزی یه‌كێتی زانایان‌و ئه‌ندامانێتی كارگێڕانی لق سه‌ردانی باره‌گای ئه‌نجومه‌نی سه‌ركردایه‌تی پارتی دیموكراتی كوردستانیان كرد له‌شاری سلێمانی، له‌لایه‌ن عیزه‌دین به‌رواری به‌رپرسی ئه‌نجومه‌نی سه‌ركردایه‌تی پارتی دیموكراتی كوردستانه‌وه پێشوازیان لێكرا.
سه‌ره‌تا لێپرسراوی لق له وته‌یه‌كدا سوپاسی به‌رێزیان كرد بۆ ئه‌و پێشوازیه‌ی له زانایانی ئاینی كرد، دواتر پیرۆزبایی سه‌ركه‌وتنی پرۆسه‌ی هه‌ڵبژاردنه‌كانی له‌سه‌رجه‌م گه‌لی كورد كردو هیوای خواست ئه‌م سه‌ركه‌وتنه ببێته مایه‌ی به‌دیهێنانی خواست‌و ئاواته‌كانی گه‌لی كورد.
له‌به‌شێكی تری وته‌كه‌یدا مامۆستا نجم الدین باسی زه‌روره‌تی یه‌كڕیزی گه‌لی كورد كرد به تایبه‌تی له ناوچه جێگا ناكۆكه‌كانی هه‌رێمی كوردستان‌و ئه‌وه‌شی خسته‌ڕو له هه‌ڵبژاردنی ئه‌م جاره چه‌نده سه‌ركه‌وتنمان به‌ده‌ست هێناوه هێنده‌ش توشی زیان بوین به‌هۆی یه‌كڕیزی نه‌بونمان له وناوچانه.
به‌شێك له وته‌كه‌كانی لێپرسراوی لق تایبه‌ت بو به داهاتوی هه‌رێمی كوردستان له گه‌ڵ حكومه‌تی ناوه‌ندو ڕۆڵی سه‌رۆكی هه‌رێمی كوردستان‌و پارتی دیمكراتی كوردستان به وپێیه‌ی لیستی براوه‌ن ده‌بێت ئه‌ركی زیاتریان له سه‌ربێت‌و زیاتر كاربكه‌ن بۆ یه‌كخستنی ده‌نگ‌و سه‌نگ‌و قورسایی كورد له گه‌ڵ حكومه‌تی ناوه‌نددا‌و چیتر درێژه به‌و قه‌یرانه داراییانه نه‌درێت كه سه‌رجه‌م چین‌و توێژه‌كان توشی زیان هاتون به‌و هۆیه‌وه‌‌و ناكرێت حكومه‌تی ناوه‌ند به‌و جۆره ده‌ست بخاته بژێوی ژیانی كه‌سانی موچه خۆرو فه‌رمانبه‌رانی هه‌رێمی كوردستانه‌وه. له كۆتایی وته‌كه‌یدا لێپرسراوی لق باسی له پاراستنی ئاسایشی هه‌رێمی كوردستان به گشتی‌و شاری سلێمانی به تایبه‌تی كرد كه زۆرتر بوه‌ته جێگای كێشمه كێشی لایه‌نه سیاسیه‌كان له پرۆسه‌ی هه‌ڵبژارنه‌كاندا.
دواتر عیزه‌دین به‌رواری به‌رپرسی ئه‌نجومه‌نی سه‌ركردایه‌تی پارتی دیمكراتی كوردستان له وته‌یه‌كدا به‌ناوی ئه‌نجومه‌نی سه‌ركردایه‌تی پارتیه‌وه به‌خێرهاتنی شاندی زانایانی ئاینی كردو سوپاسی سه‌رجه‌م په‌یامه‌كانی كردن‌و ده‌ورو ڕۆڵی گرنگی زانایانی ئاینی له مێژوی شۆڕشه‌كانی كورددا به‌رز نرخاندو، ئاماژه‌شی به سه‌ركه‌وتنی پرۆسه‌ی هه‌ڵبژاردنه‌كان كردو جه‌ختی له یه‌كڕیزی و ته‌بایی سه‌رجه‌م لایه‌نه سیاسیه‌كان له هه‌رێمی كوردستان كرده‌وه له پێناو به‌دیهێنانی سه‌رجه‌م خواسته‌كانی گه‌لی كورد له گه‌ڵ حكومه‌تی ناوه‌نددا. له به‌شێكی وته‌كه‌یدا عیزه‌دین به‌رواری باسی له كابینه‌ی هه‌شته‌می حكومه‌تی هه‌رێمی كوردستان كرد.
له دوای گفتوگۆو وتو وێژێكی تێروته‌سه‌ل سه‌ردانه‌كه به‌سه‌ركه‌وتویی كۆتایی هات.
