ماوه‌یه‌كه پرسیاری ئه‌وه ئاراسته‌ی ئه‌نجومه‌نی باڵای فه‌توا ده‌كرێت، كه ئایا دروسته ئافره‌ت سه‌فه‌ری حه‌ج یان عومڕه بكات بێ ئه‌وه‌ی مه‌حره‌می خۆی له‌گه‌ڵ بێت؟
له‌و باره‌وه ئه‌نجومه‌نی باڵای فه‌توا دوای لێكۆڵینه‌وه‌‌و به‌دوا داچوون بۆ ئه‌و بابه‌ته، به نوسراوی فه‌رمی له به‌رواری 19ی2ی2019 حوكمی شه‌رعی له‌و باره‌وه روون كردۆته‌وه.
به پێی فه‌توای ئه‌نجومه‌نی باڵا فه‌توا دروسته ئافره‌ت گه‌شتی حه‌ج‌و عومڕه‌ی واجب ئه‌نجام بدات به ته‌نیا به‌و مه‌رجه‌ی رێگا ئه‌مین بێ‌‌و هیچ مه‌ترسیه‌ك له‌ئارا نه‌بێت، به‌ڵام ئه‌و گه‌شته واجب نیه بۆ ئافره‌ت تا ئه‌و كاته‌ی له‌گه‌ڵ مه‌حره‌م یان ئافره‌تانی جێی متمانه بۆی رێك ده‌كه‌وێ.
له فه‌توایه هاتووه، كه له حه‌ج‌و عومره‌ی سوننه‌ت‌و له گه‌ڵ مه‌حره‌می خۆی یان ئافره‌تانی متمانه‌پێكراو ئاساییه ئافره‌ت ئه‌و گه‌شته ئه‌نجام بدات.
له به‌شێكی تری فه‌توایه‌كه هاتووه، له‌به‌ر ئه‌وه‌ی فه‌توا به پێی سه‌رده‌م گۆڕانی تێدا روو ده‌دات، وه گه‌شت بۆ وڵاتی سعودیه به فرۆكه ئه‌نجام ده‌درێت‌و له هه‌موو شوێنه‌كان كامیڕای چاودێری هه‌یه‌‌و مه‌ترسی نیه‌‌و ئارامی هه‌یه، دروسته ئافره‌ت له‌گه‌ڵ ئافره‌تانی جێی متمانه‌‌و باوه‌ڕپێكراو وه به مۆڵه‌ت وه‌رگرتن له هاوسه‌ری خۆی ده‌توانێ گه‌شتی عومڕه‌ی سوننه‌ت ئه‌نجام بدات‌و له‌رووی شه‌رعه‌وه ئاساییه.
له‌سه‌ر ئه‌وه‌ش ئه‌نجومه‌نی باڵای فه‌توا پشتی به به‌ڵگه‌ی دروستی فه‌رمووده‌ی پێغه‌مبه‌ر (درودی خوای له‌سه‌ر بێت) به‌ستووه‌‌و به جوانی ئه‌م پرسه‌ی روون كردۆته‌وه.
ده‌قی فه‌توای ئه‌نجومه‌نی باڵای فه‌توا له‌م لینكه‌ی خواره‌وه بخوێنه‌وه:
http://www.zanayan.org/t_detail.php?section=2&id=26511
