دوای بڵاوبوونەوەی گرتە ڤیدیۆیەک لە تۆرە کۆمەڵایەتیەکان بەناونیشانی کارو چالاکیەکانی (ماڵی رۆشناو ئاشنا) لە کوردستان، کە شتگەلێک لەخۆ دەگرێت و پەردەش لەسەر زۆر شت لادەباو، مەترسی بۆ سەر نەریتی کۆمەڵگەی کوردی و هەستی دینداری و بەهای بەرزی کوردەواری لێ بەدی دەکرێت.
یەکێتی زانایان ماوەیەکە بەوردی بەدواداچوون بۆ ئەو دۆسیە دەکات و کاری پێویستی لەو بارەوە کردووە، بۆ ئەو مەبەستەش سکاڵاو رێکاری پێویستی گرتۆتە بەرو لایەنی پەیوەنداری لێ ئاگادار کردۆتەوە.
لە نوسراوی یەکێتی زانایان کە ئەمرۆ 30ی9ی2020 ئاراستەی داواکاری گشتی و لایەنی پەیوەندار کراوە هاتووە: بەداخەوە لەبەشێکی ئەو سەنتەرو شوێنانەی بەناوی هۆشیاری و وەرزشی جەستەو لەشجوانی و رەشاقەو چالاکی دیکە، ئەجێندای ترو بەرنامەی بەلارێدا بردن و دروستکردنی گومان و کەمکردنەوەی بەهای ئەخلاقی و بێشەرمکردنی بەشداربووان جێبەجێ دەکرێت.
هەروەها هاتووە: لەراستیدا ئەو جۆرە هەوڵانە دەبنە مایەی ترازانی کۆمەڵایەتی و شڵەژانی ئاشتەوایی و سەقامگیری کۆمەڵگەو هەڕەشەن بۆ لایەنی کۆمەڵایەتی و خێزانی، لەهەمان کات پێچەوانەی نەریتی کوردەواری و بنەماکانی شەریعەتی پیرۆزی ئیسلامەو لەگەڵ دەستوری عیراق و یاسا بەرکارەکانی هەرێمی کوردستانیش یەک ناگرێتەوە.
بۆ دڵنیایی و وەک ئەرکێکی ئایینی و پیشەیی و هەستکردن بە بەرپرسیارێتی بەرامبەر کیان و کۆمەڵگە، یەکێتی زانایان بە وردی کار لەسەر ئەم دۆسیە دەکات، تا دەرەنجامی پێویست لەپێناو نەهێشتنی ئەو جۆرە کارو هەوڵە نەشیاو هەنگاوە تاریکانەو، پاراستنی بەهاو رەوشتی کۆمەڵگەی کوردی بەدەست دێنێت.
