دانا مه‌لا حه‌مه‌ئه‌مین – گه‌رمیان:
سه‌رله‌ئێواره‌ی ڕۆژی یه‌ك شه‌ممه‌ به‌رواری 14/11/2010 شاندێكی لقی گه‌رمیانی یه‌كێتی زانایانی ئاینی ئیسلامی كوردستان، كه‌ پێكهاتبو له‌ به‌ڕێزان: مامۆستا مه‌لا حه‌مه‌ئه‌مین كه‌لاری به‌رپرسی لق‌و، چه‌ند كارگێڕلقێك‌و، به‌رپرسی ناوچه‌ی كفری‌و، چه‌ند وتاربێژێك به‌ئاماده‌بونی چه‌ند ئه‌ندامێكی مه‌كته‌بی سیاسی (پ.د.ك) و به‌رپرسی نوسینگه‌كانی (ی.ن.ك) له‌سنوره‌كه‌‌و، به‌رپرسی ده‌زگاحیزبی‌و حكومیه‌كانی سنوره‌كه‌و، لایه‌نه‌سیاسیه‌كان‌و، ڕێكخراوه‌كانی كۆمه‌ڵگه‌ی مه‌ده‌نی‌و، كه‌س و كاری سه‌ربه‌رزی شه‌هیدان.. به‌شدارییان كرد له‌ مه‌راسیمی هێنانه‌وه‌ی ڕوفاتی شه‌هیدانی قاته‌كانی كفری كه‌ له‌ شۆڕشی ئه‌یلولی مه‌زن له‌ 24/8/1963 له‌ شه‌ڕێكی قاره‌مانانه‌دا شه‌هید كران.

سه‌ره‌تای مه‌راسیمه‌كه‌ به‌ چه‌ند ئایه‌تێك له‌ قورئانی پیرۆز ده‌ستی پێكردو، پاش ده‌قیقه‌یه‌ك وه‌ستان بۆگیانی پاكی شه‌هیدان، وته‌ی به‌خێرهاتن پێشكه‌ش كرا، پاشان وتاری مه‌كته‌بی سیاسی پارتی دیموكراتی كوردستان له‌ لایه‌ن به‌ڕێز مامۆستا موحه‌ممه‌د مه‌لا قادر خوێندرایه‌وه‌، دواتر چه‌ند وتارو پارچه‌ شعر به‌و بۆنه‌یه‌وه‌ خوێندرایه‌وه‌.

شایانی باسه‌ لقی گه‌رمیانی یه‌كێتی زانایانی ئاینی ئیسلامی كوردستان به‌ بروسكه‌یه‌ك به‌شداری له‌و مه‌راسیمه‌ كرد، كه‌ تیایدا" به‌ناوی ته‌واوی زانایانی ئاینی سنوره‌كه‌وه‌ سه‌ره‌خۆشی خۆیان ئاراسته‌ی كه‌س‌و كاری ئه‌و پۆله‌ شه‌هیده‌كردو، ئه‌وه‌یان بیرهێنانه‌وه‌ كه‌ ئه‌وان له‌ ڕێگه‌ی سه‌ربه‌ستی وڵاتدا گیانی خۆیان به‌خت كرد، كه‌ ئه‌وه‌ش خۆی له‌ خۆیدا ئه‌ركێكی ئاینی‌و نیشتمانی یه‌، كه‌ بێگومان خوای گه‌وره‌ پاداشتیان به‌ به‌هه‌شتی به‌رینی خۆی ده‌داته‌وه‌".

جێگه‌ی ئاماژه‌پێدانه‌ 47 ساڵ له‌مه‌و به‌رو له‌ ساڵی 1963 دا، له‌ كاتی شۆڕشی ئه‌یلولی مه‌زن 28 ڕۆڵه‌ی لێهاتووی ئه‌م كوردستانه‌، له‌ شه‌ڕێكی قاره‌مانانه‌دا ڕۆحی خۆیان به‌خشیه‌ گه‌ل و نیشتمانه‌كه‌یان، به‌م بۆنه‌یه‌وه‌ ئه‌م مه‌راسیمه‌ له‌ لایه‌ن مه‌كته‌بی ڕۆشنبیری‌و ڕاگه‌یاندنی لقی 22 ی پارتی دیموكراتی كوردستانه‌وه‌ ڕێكخرابوو.