ئەمرۆ 8ی10ی2023 بەرێز د. عبدالله مەلا وەیسی بە ئامادەیی بەرێز مامۆستا مەلا جەلال خەیلانی جێگری سەرۆک و د.عومەر مرۆو د.حسن خۆشناو و د.دلشاد گەڵاڵی و مەلا عبدالله شێرکاوەیی ئەندامانی مەکتەبی تەنفیزی و مامۆستا مەلا عزیزی خەزنەیی ئەندامی ئەنجومەنی باڵای فەتوا پێشوازیان لە بەرێز سەماحەتی سەید علی ئەلتالەقانی بانگخوازی دیارو ناودار لە نەجەف و شاندێکی یاوەری کرد.
لە دیدارێکدا وێڕای بەگەرمی بەخێرهێنان بەرێز سەرۆکی یەکێتی زانایان پوختەیەکی لە مێژوو و کارو هەنگاوو بەرنامەی ستراتیژی یەکێتی زانایان بۆ باس کردو ئاماژەی لە رۆڵی یەکێتی زانایان لە گەیاندنی پەیامی ئاشتی و خزمەتی کۆمەڵگەو پاراستنی رێڕەوی دینداری خەڵک و بایەخدان بە گوتاری ئیسلامی و دروستکردنی پەیوەندی لەگەڵ جیهانی ئیسلامی و دامەزراوەو ناوەندە زانستی و ئەکادیمیە ئایینیەکان کردو تیشکی خستە سەر پەیوەندی نێوان کوردو شیعە و زانایانی هەردوولاو ئەرکی هەنووکەیی لە پتەوکردنی پەیوەندیەکان و گەیاندنی پەیامی ئایینی و ئینسانی و رووبەروو بوونەوەی هەموو ئەو تەحەدیانەی دەبنە کۆسپ لەبەردەم پێکەوەژیان و گەشەی پەیوەندی برایانەی نێوان پێکهاتەکان.
لەلایەن خۆشیەوە بەرێز سەید عەلی تالەقانی سوپاسی پێشوازی گەرمی یەکێتی زانایانی کردو ئاماژەی بەوەدا کە هەمووان لە ژێر کاریگەری هەژموونی ئیسلام و لە چوارچێوەی بنەماکانی رەوشت و مامەڵەی مرۆڤدۆستی هەنگاو بنێین و ئەوەمان لەبەر چاو بێت یەکێک لە هۆکارەکانی سەقامگیری ناو کۆمەڵگە هەستی دیندارییە، هەروەها گوتاری ئیسلامی رۆڵی گەورەی هەیە لە بایەخدان بە ئاشتی کۆمەڵایەتی و بەرەو پێشبردنی کۆمەڵگە، بۆیە پێوستە بە وریایی و دووربینیەوە مامەڵەی لەگەڵ بکرێت.
هەروەها گوتیشی: ئێوە وەکو یەکێتی زانایان شایستەی سوپاس و دەستخۆشین لەبەرامبەر ئەو کارو هەنگاوە گرنگانەی ئەنجامتان داوەو زۆریش خۆشحاڵ بووم لە نزیکەوە بە دیدارتان شاد بووم بەلای منەوە کورد گەلێکی باش و دیندارن و خزمەتیان دەکەم.
شایەنی باسە لەدانیشتنەکە هەردوولا تەئکیدیان لە پەیوەندی نێوان زانایانی کوردو شیعەو هەماهەنگی نێوانیان کردەوە.