ئەمرۆ 12ی10ی2023 بەرێز مامۆستا مەلا جەلال خەیلانی جێگری سەرۆکی یەکێتی زانایان بەشداری شەشەمین سیمپۆزیۆمی (یادی لەدایک بوونی پێغەمبەرمان- درودی خوای لەسەر بێت) لە شاری هەولێر کرد، کە لەلایەن کۆلێژی زانستە ئیسلامیەکانی زانکۆی سەلاحەددین بە بەشداری سەرۆکی زانکۆی سەلاحەددین و نوێنەری وەزارەتی ئەوقاف و مامۆستایانی زانکۆو قوتابیانی کۆلێژی ناوبراو ساز کرا بوو.
لەم سیمپۆزیۆمە چەندین وتارو توێژینەوەی زانستی سەبارەت بە گەورەیی کەسایەتی پێغەمبەر(درودی خوای لەسەر بێت) پێشکەش کران، بەتایبەت لە بواری مافی ئافرەت و رێزگرتنی ئەو زاتە لە پێگەی ئافرەتان.
بەم بۆنەوە بەرێز مامۆستا مەلا جەلال خەیلانی وتارێکی پێشکەش کردو تێیدا وێڕای دەستخۆشی و پیرۆزبایی کردنەوەی سیمپۆزیۆمی یادی لەدایکبوونی پێغەمبەر- درودی خوای لەسەر بێت- دواتر چەندین بەڵگەی لە ئایەت و فەرموودە هێنایەوە سەبارەت بە دروستی و رەوایەتی یادکردنەوەی لەدایکبوونی پێغەمبەر (درودی خوای لەسەر بێت)، لەگەڵ ئەوەش ئاماژەی بە رابردوی میللەتی کورد کرد کە چەندە بە تامەزرۆوە ئەم بۆنەیان بەرز راگرتووە.
هەروەها لە وتارەکەی ئاماژەی بە گرنگیدانی پێغەمبەر (درودی خوای لەسەر بێت) بە مافی ئافرەت و رێزگرتن لێی و پاراستنی مافەکانی، لەو روانگەوە چەند نمونەیەکی جوانی لەم بارەیەوە هێنایەوەو وتیشی ئەگەر بەراوردێک بکەین لە سەردەمی پێش هاتنی پێغەمبەرو دوای پێغەمبەر (درودی خوای لەسەر بێت) ئەوەمان بۆ روون دەبێتەوە ئافرەت چ رێزێکی پێ بڕاوە، دواتریش هاتە سەر واقعی کوردستان و رۆڵی زانایانی ئایینی لە بایەخدانیان بە گەیاندنی پەیامی هۆشیاری پەیوەست بە رێزگرتن لە ئافرەتان لە روانگەی ئایینیەوە.
