ئەمرۆ 22ی10ی2023 بەرێز د. عبدالله مەلا وەیسی سەرۆکی یەکێتی زانایان بە یاوەری بەرێز مامۆستا مەلا جەلال خەیلانی جێگری سەرۆک و د.حسن خۆشناو و د. دلشاد گەڵاڵی و مەلا عبدالله شێرکاوەیی ئەندامانی مەکتەبی تەنفیزی، بەمەبەستی گەیاندنی پەیامی هاوخەمی بۆ گەلی فەڵەستین سەردانی قونسولگەری گشتی وڵاتی فەڵەستتین لە هەرێمی کوردستان کردو لەلایەن بەرێز نەزمی حوزوری قونسوڵی فەڵەستین بەگەرمیەوە پێشوازی کران.
لەدانیشتنێکدا بەرێز سەرۆکی یەکێتی زانایان پەیامی هاوخەمی و پەرۆشی زانایانی ئایینی لە هەرێمی کوردستان سەبارەت بە دۆخی فەڵەستین و غەززە گەیاندە کونسوڵی گشتی و نیگەرانی خۆی لە بارەی رەوشی غەززە دەربڕی، گوتیشی: ئێمە وەکو زانایانی ئایینی لەهەرێمی کوردستان پەیامی پیشەیی خۆمان راگەیاندووەو هاوسۆزی گەلی فەڵەستینین، بەتایبەت کە قودسی شەریف خوای گەورە رێزدارو بەرەکەتداری کردووە تەنها موڵکی عەرەب و گەلی فەڵەستین نیە، بەڵکو بۆ هەموو موسڵمانان و جیهانی ئیسلامی وەک یەکەو پیرۆزە، بۆیە هیوامان وایە بە زووترین کات شەڕ بوەستێت.
هەروەها گوتیشی: گەلی کوردو گەلی فەڵەستین مێژووێکی هاوبەشیان هەیەو هەردوولا هەست بە ئازاری ستەم و نەگەیشتن بە مافی چارەنووس دەکەن، وە کورد هاریکارێکی گەورەی قودس و خەڵکی فەڵەستین بووە.
لەلایەن خۆشیەوە بەرێز نەزمی حوزوری کونسوڵی گشتی فەڵەستین وێڕای خۆشحاڵی بە سەردانی یەکێتی زانایان، هەڵوێست‌و پشتیوانی زانایانی كوردی بەرز نرخاندو تەئكیدیشی لەوە كردەوە، كە هەمیشە یەكێتی زانایان هاوكارو هاوهەڵوێست بووە لەگەڵ گەلە ستەم لێكراوەكان.
گوتیشی: ئێمە هەر زانایەکی کورد بە نەوەی سەڵاحەددینی ئەیوبی دەزانین و هەمیشە یەکێتی زانایانی و هەڵوێستی دیاری ئایینی و ئینسانیان بەرز دەنرخێنین.
شایەنی باسە لە دانیشتنەکەدا کۆمەڵێک تەوەری تری پەیوەست بە بارودۆخی فەڵەستین و هەڵوێست و کاردانەوەو لێکەوتەکانیەوە گفتوگۆی تێرو تەسەلی لەبارەوە کرا.
