ئەمرۆ 31ی10ی2023 بەرێز د. عبدالله مەلا وەیسی سەرۆکی یەکێتی زانایان بە ئامادەیی بەرێز مامۆستا مەلا جەلال خەیلانی جێگری سەرۆک و د.حسن موفتی سەرۆکی ئەنجومەنی باڵای فەتواو ژمارەیەک لە ئەندامانی مەکتەبی تەنفیزی و سەرکردایەتی و ئەنجومەنی باڵای فەتوا، پێشوازیان لە بەرێز بەختیار حیدر سەرۆکی سەندیکای پارێزەرانی کوردستان و شاندێکی یاوەری کرد.
سەرەتای دانیشتنەکە بەرێز بەختیار حیدر نەقیبی سەندیکای پارێزەران خۆشحاڵی خۆی بە دیداری یەکێتی زانایان دەربڕی و رۆڵی یەکێتی زانایانی لە خزمەتکردنی کۆمەڵگەو پرسە ئایینیەکان بەرز نرخاندو سوپاسی سەرۆک و ئەندامانی مەکتەبی تەنفیزی کرد بۆ پێشوازی گەرمیان.
دواتر بەرێز د. عبدالله مەلا وەیسی سەرۆکی یەکێتی زانایان وێڕای بەخێر هێنان و خۆشحاڵی دەربڕین بە سەردانی سەرۆکی سەندیکای پارێزەران و شاندی یاوەری، باسی لە گرنگی پەیوەندی و هەماهەنگی نێوان هەردوولا کردەوەو رۆڵی یاساو دامەزراوەی یاسایی و پیشەی پارێزەری لە چارەسەرکردنی کێشەکان و رێکخستنی کاروبارەکانی خەڵک بە گرنگ وەسف کرد.
پاشان هەردوولا باسیان لە گرنگی و هەستیاری رۆڵی شەریعەت و یاساو دامەزراوەیی ئایینی و یاسایی لەخزمەتکردنی کۆمەڵگەو بەرەو پێشبردنی دۆخی هەرێم کردو گفتوگۆش لەبارەی ئەو نیگەرانی و هەڵە تێگەیشتنەی ناو سۆشیال میدیا سەبارەت بە فەتوای ئەنجومەنی باڵای فەتوا لەسەر پرسی کرێی پارێزەری بڵاوبوویەوە کراو، هەردوولا تەئکیدیان لەوە کردەوە، کە وەک یەکێتی زانایان و سەندیکای پارێزەران تەواوکەری یەکترین و ئامانجی سەرەکی خزمەت کردنی کۆمەڵگەو لەبەرچاوگرتنی بەرژەوەندی گشتییە، لەم سۆنگەشەوە وردەکاری و سەرنج و تێبینیەکان گەنگەشە کران و راگۆڕینەوەی تەواویان لەبارەوە.
هەر لە دانیشتنەکە تەئکید لە پێویستی هەماهەنگی و پەیوەندی نێوان هەردوولاو کاری پێکەوەیی کرایەوەو بەباش زانرا لە پێناو خزمەتی گشتی و پیشەیی لە ئایندە کۆبوونەوەو دیداری نێوان هەردوولا بەردەوامی هەبێت.
