لەگەڵ هاتنەوەی جەژنی رەمەزانی پیرۆز یەکێتی زانایانی ئایینی ئیسلامی کوردستان پەیامێکی پیرۆزبایی ئاراستەی موسڵمانان بەگشتی و کوردستانیان بەتایبەتی دەکات و هاوکات وەک هەستی بەرپرسیارێتی و پەرۆشی بۆ دۆخی ئێستای کوردستان داوایەکی ئاراستەی سەرجەم لایەنە سیاسیەکانیش دەکات، ئەمەی خوارەوە دەقەکەیەتی:

بەناوی خوای بەخشندەی میهرەبان

(وَاعْتَصِمُوا بِحَبْلِ اللَّهِ جَمِيعًا وَلَا تَفَرَّقُوا وَاذْكُرُوا نِعْمَةَ اللَّهِ عَلَيْكُمْ) آل عمران: 103.

لەگەڵ هاتنەوەی جەژنی پیرۆزی رەمەزان، پیرۆزباییەکی گەرم ئاراستەی سەرجەم موسڵمانان دەکەین، لەخوای گەورە داواکارین تاعەت و رۆژوو و خواپەرستی هەموو لایەک قەبوڵ بێ و، ئەم جەژنە بکاتە مایەی خێرو خۆشی بۆ گەلانی جیهان و گەلی کورد بە تایبەتی.

جەژن دەربڕینی شادی و بڵاوکردنەوەی ئاشتی و لێبوردەیی و ئارامی و پتەکردنی پەیوەندی کۆمەڵایەتی و رێزگرتن و پاداشتە لەسەر ئەنجامدانی کارو کردەوەی خێرو خواپەرستی لە رەمەزاندا.

لەم سۆنگەوە بە پێویستی دەزانین بەناوی سەرجەم زانایانی ئایینی لە کوردستان داوا لەتەواوی لایەنە سیاسیەکان بکەین، کە جەژن بکەنە دەرفەتێکی گرنگ و موژدەبەخش بۆ راگەیاندنی ئاشتەوایی نیشتمانی و دانیشتن لەسەر مێزی گفتوگۆ و کۆتایی هێنان بەم دۆخە چەقبەستووە سیاسیەی دروست بووە، بۆ ئەوەی بێتاقەتی خەڵک لەم دۆخە کەمبکەنەوەو گرژییەکان نەهێڵن، لە چوارچێوەی بەهای نیشتمانی و نەتەوەیی و لەبەرچاوگرتنی بەرژەوەندی گشتی هەوڵی چارەسەرکردنی گرفتەکان بدەن، بەدڵنیاییەوە بەهێزبوون و سەرکەوتن لە یەکگرتن و تەبایی و سەقامگیری نێو ماڵی کوردایە، بە تەجرەبەش دەرکەوتووە ئەگەر کورد یەک بێت دەسکەوتی گەورە بەرهەم دێت، بەڵام لە ناکۆکی و پەرتەوازەیی هەنگاوەکان بەرەو پێش نابەن و شپرزەیی و چەقبەستوویی زیاد دەکەن و دواجار زیانی گەورە بەر کوردو کوردستان دەکەوێت.

لە کۆتاییدا بە پێویستی دەزانین سوپاسی تایبەتی تەواوی مامۆستایانی ئایینی بکەین، کە خزمەتێکی گەورەیان پێشکەش کرد، هەروەها پێزانینی زۆرمان بۆ سەرجەم موسڵمانان و دام و دەزگا حکومیەکان بۆ رێزگرتن لە پیرۆزی ئەم مانگە، وە دەستخۆشی زۆریش بۆ خێرخوازان و دەزگا خێرییەکان، کە بە کۆمەک و یارمەتیدان خزمەتێکی زۆریان پێشکەش کردو زۆر ماڵی هەژاریان رووناک کردەوە.

جارێکی تر پیرۆزبایی خۆمان ئاراستە هەموولایەک دەکەین و خوای گەورە مانگی رەمەزانی لەهەمووان قەبوڵ کرد بێت.

مەکتەبی تەنفیزی یەکێتی زانایانی ئایینی ئیسلامی کوردستان

20ی4ی2023