یەکێتی زانایانی ئایینی ئیسلامی کوردستان پەیامێکی پیرۆزبایی بە بۆنەی هاتنەوەی  جەژنی رەمەزانی پیرۆز ئاراستەی موسڵمانان بەگشتی و کوردستانیان بەتایبەتی دەکات، ئەمەی خوارەوە دەقەکەیەتی:

بەناوی خوای بەخشندەی میهرەبان

{ذَلِكَ وَمَنْ يُعَظِّمْ شَعَائِرَ اللَّهِ فَإِنَّهَا مِنْ تَقْوَى الْقُلُوبِ} الحج:32.

بە بۆنەی هاتنەی جەژنی پیرۆزی رەمەزان؛ پیرۆزباییەکی گەرم ئاراستەی سەرجەم موسڵمانان بەگشتی و کوردستانیانی ئازیز بە تایبەتی دەکەین، لە خوای گەورە داواکارین رۆژوو تاعەت و خواپەرستی هەموو لایەک قەبوڵ بێت و، ئەم جەژنەش بکاتە مایەی خێر بۆ هەموو لایەک.

لە ئیسلامدا جەژن دروشمێکی گرنگەو لوتکەی خۆشحاڵبوونە بە ئەنجامدانی خواپەرستی، دەربڕینی شادی و بڵاوکردنەوەی ئاشتی و لێبوردەیی و پتەوکردنی پەیوەندی کۆمەڵایەتی و سەردان و جەژنانەیە.

هیوادارین جەژن هاندەر بێت بۆ ئاشتەوایی نیشتمانی و لێک نزیککبوونەوەی لایەنەکان، لە پێناو بەرژەوەندی گشتی گەل و وڵات و چارەسەرکردنی کێشەکان، یەکگرتن و تەبایی بکەنە هەوێنی هەنگاوەکان و هەمیشە دڵی میللەت خۆش و ئاسوودە بکەن.

هەر لێرەشەوە سوپاسی تایبەتی تەواوی مامۆستایانی بەرێزی ئایینی دەکەین، کە خزمەتێکی گەورەیان لە مانگی رەمەزان پێشکەش کرد، هەروەها سوپاس بۆ سەرجەم موسڵمانان و دام و دەزگا حکومیەکان و خێرخوازان و دەزگا خێرییەکان، کە بە رێزگرتن و کۆمەکی و یارمەتیدان خزمەتی زۆریان نواند.

دووبارە جەژن لە هەموولایەک پیرۆز بێت و کوردستان هەر ئاوەدان.

مەکتەبی تەنفیزی یەکێتی زانایانی ئایینی ئیسلامی کوردستان

9ی4ی2024