لە ساڵانی ڕابردوو دا ڕۆشنبیران لە ڕيگای مێدیای كوردییەوە داوای جودایی دین و سیاسەتیان كردووە. ئەوە شتێكی غەیرە تەبیعییە كە دین لە سیاسەت ھەڵاوێردرێ چونكە دنیای واقیع پێچەوانەی ئەوەمان بۆ دەردەخا.
لە لایەكی دیكەوە و لە بەرامبەر ئەو تەفریتە دا كە مەلا بە كوللی لە ساحەی سیاسەت دوور دەخاتەوە، ئێستا حاڵەتی عەكسی ئەوەمان بۆ خوڵقاوە. ڕۆشنبیری كورد ڕۆڵی گەورەی " بەرقراربوونی ئاشتی، پێكەوە ژیان و جێبەجێكردنی حەقی سرووشتی و مرۆیی كوردستانیان " لە بەرامبەر ھێرشی تۆپخانەكانی ئێران و بۆردومانی تەیارەكانی توركیە دەسپێرێ بە مەلای كورد و سەیدەكان و وەزاڕەتی ئەوقاف و بەم جۆرە دین و سیاسەت تێكەڵ بە یەك دەكاتەوە.
ڕاوەستان لە بەرامبەر ھێرشی میلیتاریی دەرەوەی حدوودەكان بۆ سەر خاكی عێڕاق و سەیادەی سیاسیی ئەو وڵاتە ئەركێكە كە لە ئەستۆی شوڕای ئەمنیەتی ئومەمی موتتەحیدە، وەزاڕتی دیفاعی ئەمریكا، وەزاڕەتی دیفاعی عێڕاق و وەزاڕەتی پێشمەرگەی كوردستانە و لەو بارەوە وەزاڕەتی ئەوقافی كوردستان ئەركێكی لە ئەستۆ نیە. ئەو بەشە ھیچ بۆدجە و ئیختیار و دەستەڵات و ئیمكاناتێكی بۆ كێشەی لەو نەوعە بۆ تەرخان نەكراوە و مەلای مزگەوت و بنەماڵە سەیدەكان چ سەڵاحییەت و ئوتوریتەیەكی سیاسی عەسكەری و ئیدارییان بۆ دیاری نەكراوە. بە تایبەتی ئارشیوی تلڤزیۆنەكان پڕن لەو دروشمانە كە لێرە و لەوێ ڕۆشنبیران داوایان كردووە دین و سیاسەت لێك جودا بێ. ئەوان گوتوویانە حكوومەتێكی سێكۆلاریان دەوێ، جا كە وایە چۆن وەزارەتی ئەوقاف و مەلا و ماڵە سەید ھەستن لە سەر ئەو ھەمووە مونەززەممە نێودەوڵەتی و دوەلی و ھەرێمییە ڕا دەركی مزگەوت داخەن و مێزەر دانێن و بچن كێشەی سیاسیی وا قووڵ وەك ھێرشی دەرەكیی وڵاتان حەل بكەن؟!!! تۆ بڵێی بە تەسبیح ڕاوەشاندن بكرێ بەری ڕاجیمە بگیرێ ئەگەر بودجە و سەڵاحیەت و مەشق لە دەست مەلای كورد و ماڵە سەید و ئەوقاف دا نەبێ؟! پێت وایە ئەگەر مەلا سەر سنووری گرت بۆ دیفاع لە خاكی كوردستان ڕۆشنبیران لێی لە ھەرا نادەن و داوای لێ ناكەن بچێتەوە نێو مزگەوت و خەریكی پێوەندیی نێوان خۆی و خودای خۆی بێ؟!!
بەڵێ ڕاستە مێژووی كورد بە بەرسەھاتی فیداكاریی مەلا و سەید و خەڵكی دیكەی كورد پڕ كراوەتەوە، وەك مەلا مستەفا و شێخ محمود و قازی محمد و ...، كە چی ئەمڕۆ بۆ ئەركی وەستاندنی ھوجوومی لەشكری دەرەكی مادام دەزگای دەوڵەت ھەیە و پێوەندیی بە مەركەزەوە بەردەوامە و ڕەئیس جمھور كوردە و ھێزی ئەمریكا دەستی بە سەر عێڕاق داگرتووە، ئیتر تەوەققوعێكی ناسیاسییانەیە داوا لە وەزاڕەتی ئەوقاف و مەلا و سەید بكرێ بۆ پێشگرتنی تۆپباران و بۆردومانی تەیارەكان ھەنگاو بنێن. لە وڵاتانی دەرەوەش بۆ مەسەلەی ھەڕەشەی عەسكەری دەرەوەی حدوودەكان قەشە و پیاوی دینی لێی مەسئوول نین.
جا ئەوە كەی ڕەوایە ھەتا دنیا بێدەنگە بە مەلا بڵێین لە سیاسەت وەدوور كەوە! و ئەگەر ھوجووممان بۆ ھات ئێمە پاڵ دەینەوە و بە وان بڵێین بچن پێش لەشكرمان بۆ بگرن؟!
لێرە دا دەقی داوای ڕۆشنبیرێكی كورد لە سایتی كوردستان نێت ـەوە دێنم كە داوای تەداخولی مەلا و سەید و ئەوقاف و بە گشتی دین لە سیاسەت دا دەكا، بەم شێوەیە:
بۆ وەزارەتی ئەوقاف و هەموو مەلا و سەیدەكانی كوردستان .. مێزەرەكانتان دابنێن و دەرگای مزگەوتەكان دابخەن! … سەلام عەبدوڵڵا
بە بەرچاوی خۆتانەوە دەبینن چۆن حكومەتی ئیسلامی حزبی(ئاكەپە)لە توركیا و كۆماری ئیسلامی لە ئیران و حكومەتی ئیسلامی لە عیراق چۆن لەبری داننان بە مافە سەرەتاییەكانی گەلی كوردستان، بەهاوشێوەی قاعیدە بەشێوەیەكی وەحشیانە خەڵكی كوردستان بۆردومان و ئاوارە دەكەن و لە عیراقیشدا بە تەعریبكردنی ناوچە بەزۆرەملی دابڕێنراوەكان درێژە بە سیاسەتی بەعس دەدەن .
مرۆڤ ناتوانێ بڵێ حكومەتی ئیران، قاعیدە، توركیا و عیراق حكومەتگەل و رێكخراوی ئیسلامی نین. هەر یەكێكیان بە گوێرەی ئیجتهادی خۆی ئیسلامییە و بەپێی یاسا و رێسای ئیسلامی تاوانەكانیان دژ بە ئێمە ئەنجام دەدەن .
ئەگەر من مەلا بم مێزەرەكەم دادەنێم و دەرگای مزگەوتەكەم دادەخەم تا ئەو حكومەتانە كۆتایی بە كوشتنی مناڵی كوردستان دەهێنن .
حەقوایە ئێوەش ئیتر لەپێناو بەرقراربوونی ئاشتی، پێكەوە ژیان و جێبەجێكردنی حەقی سرووشتی و مرۆیی كوردستانیان، بەرپرسیارییەتی خۆتان لەئەستۆ بگرن و ئەم جۆرە خەباتە مەدەنی و ئاشتیخوازە بەكاربهێنن.
سەلام عەبدوڵڵا خانەقین
سەرچاوە:
http://www.kurdistannet.org/2011/index.php?option=com_content&view=article&id=4365&catid=15&Itemid=198 |
