یه‌کێتی زانایان پشتگیری داواکانی فه‌رمانبه‌ران ده‌کات
به‌ناوی خوای به‌خشنده‌ی میهره‌بان
لای هه‌موو كه‌سێك روونه كه ماوه‌ی چوار ساڵه به‌هۆی قه‌یرانی داراییه‌وه نه‌هامه‌تی و ناخۆشییه‌كانی خه‌ڵكی كوردستان به گشتی و فه‌رمانبه‌ران به‌تایبه‌تی گه‌یشتۆته ئاستێكی زۆر ترسناك و مه‌ترسیدار، ئه‌مه‌ش وای كرد فه‌رمانبه‌ران به‌تایبه‌تی كه‌رته‌كانی په‌روه‌رده‌و ته‌ندروستی ده‌ست بكه‌نه خۆپیشاندان و بایكۆتكردنی ده‌وامه‌كه‌یان، ئێمه وه‌ك یه‌كێتی زانایانی ئایینی ئیسلامی كوردستان هه‌ر له ساته‌وه‌ختی ده‌رچوونی بڕیاری پاشه‌كه‌وته‌وه تا ده‌گاته ئێستا هه‌موو كاتێك ناڕازیبوونی خۆمان ده‌ربڕیوه‌و له هه‌موو سه‌ردان و دانیشتن و دیداره‌كانمان جه‌ختمان له‌سه‌ری كردیته‌وه‌و چه‌ندین جاریش به‌یاننامه‌مان له‌سه‌ری ده‌ركردووه، به‌تایبه‌تی ره‌وشی مامۆستایانی ئاینی له دۆخێكی یه‌كجار خراپ و دژوارو پڕ نه‌هامه‌تی دایه، وێڕای مووچه‌ی که‌م، كه‌مترین ده‌رفه‌تی كاركردن و ئیشی زیاده‌یان هه‌یه، هه‌روه‌ك ته‌واوی فه‌رمانبه‌رانی هه‌رێمی كوردستان، كه به‌وپه‌ڕی ناخۆشی و كۆله‌مه‌رگییه‌وه پێداویستییه‌كانی ژیانیان دابین ده‌كه‌ن و به هه‌ناسه‌ی قولی پڕ ئه‌سه‌فه‌وه به دیار منداڵه بێنازه‌كانیان داده‌نیشن.
بۆیه وه‌ك یه‌كێتی زانایان كه به وردی چاودێری ئه‌م بارودۆخه ده‌كه‌ین، پشتگیری له داوا ره‌واكانی فه‌رمانبه‌ران ده‌كه‌ین، داوا له حكومه‌تی هه‌رێمی كوردستان ده‌كه‌ین هه‌رچی زووه كۆتایی به پاشه‌كه‌وتكردنی مووچه‌ی فه‌رمانبه‌ران بێنن و ژیانێكی شایسته بۆ فه‌رمانبه‌ران بگێڕنه‌وه. به پێویستیشی ده‌زانین هه‌موو حزب و لایه‌نه سیاسیه‌كان پێكه‌وه هاوكار بن بۆ كۆتاییهێنان به‌م بابه‌ته، خه‌می سه‌ره‌كیان پاراستنی ئارامی کوردستان و چاككردنی بارو گوزه‌رانی هاووڵاتیان به گشتی و فه‌رمانبه‌ران به‌تایبه‌تی بێت. بێگومان گه‌ل و میلله‌تێك كه له كۆن و نوێوه به‌رگه‌ی هه‌موو ئازارو ناخۆشییه‌كی گرتووه شایانی جوانترین ژیانه.
یه‌کێتی زانایانی ئایینی ئیسلامی کوردستان
26/3/2018
یەکێتی زانایان بە هاوبەشی سەنتەری روح ئەلحەیات دیدارێکی زانستی (چارەسەری تەندروستی لە نێوان شەریعەت و زانستی پزیشکیدا) بەرێوە دەبات
