مزگه‌وتی عمر أبی حفصه له خانقین كرایه‌وه
دانا ملا حمه‌أمین- گه‌رمیان
سه‌ر له‌ئێواره‌ی ڕۆژی پێنج شه‌مه ڕێكه‌وتی 5/8/2010 به ئاماده‌بوونی لێپرسراوی لقی گه‌رمیانی یه‌كێتی زانایان و ژماره‌یه‌ك له كارگێڕانی لق و لێپرسراو و ئه‌ندامانی ناوچه‌ی خانه‌قینی یه‌كێتی زانایان و وه‌زیری ئه‌وقاف و كاروباری ئاینی هه‌رێمی كوردستان و به‌ڕێوه‌به‌ری وه‌قفی سونی دیاله‌و نوێنه‌ری لقی دیاله‌ی رابیته‌ی زانایانی موسوڵمان وه زۆرێك له مامۆستایانی ئاینی و حزب و لایه‌نه سیاسیه‌كان و پارێزگاری دیاله‌و قایمقامی خانقین، مزگه‌وتی عمر أبی حفصه له شاری خانقین كرایه‌وه و له‌و مه‌راسیمه‌دا چه‌ندین ووتار پێشكه‌ش كرا. به‌ڕێز م.مه‌لاحمه‌أمین كه‌لاری ووتاری یه‌كێتی زانایانی ئاینی ئیسلامی كوردستانی پێشكه‌ش كرد و وێڕای پیرۆزبایی له دانشتوانی خانقین ده‌ستخۆشی له ئه‌نجامده‌رانی ئه‌م پرۆژه خێردارو مه‌زنه كرد، هیوای خواست و داوای له دانشتوانی نزیكی ئه‌و مزگه‌وته كرد كه به تاعه‌ت و عیباده‌ت ئاوه‌دانی بكه‌نه‌وه و پاكوخاوێنی ڕابگرن.
شایانی ئاماژه پێدانه ئه‌م مزگه‌وته له‌سه‌ر ڕووبه‌ری 5000 مه‌تر دووجا دروست كراوه‌و وه جواترین و نوێترین كه‌ره‌سته‌ی بیناسازی تێدا به‌كارهێنراوه و به دیزاین و نه‌خشه‌یه‌كی هاوچه‌رخ دروست كراوه، مناره‌یه‌كی بڵندی 42 م له‌گه‌ڵ گومه‌زیه‌كی 21 م بۆ دروست كراوه كه ده‌كاته 63 م وه‌كو ئاماژه‌یه‌ك بۆ ته‌مه‌نی پێغه‌مبه‌ر (درودی خوای له‌سه‌ربێ). حه‌ره‌می مزگه‌وت 6 مه‌تر به‌رزه‌و له‌سه‌ر شێوه‌ی پێنج گۆشه‌یی دروست كراوه وه‌كو ئامه‌ژه‌یه‌ك بۆ ڕوكنه‌كانی ئیسلام و پێنج فه‌رزه‌ی نوێژ. جێ نوێژی حه‌ره‌می پیاوان 800 م چوارگۆشه‌یه و جێ نوێژی حه‌ره‌می ژنان 110 م چوارگۆشه‌یه وه هۆڵی پرسه‌شی تیادا دروستكراوه. به‌مه‌ش ده‌بێته گه‌وره‌ترین مزگه‌وتی قه‌زاكه.
| 
